UK Bathukamma Festival Attack: బ్రిటన్‌లో బతుకమ్మ వేడుకల్లో కలకలం.. ఇద్దరు భారతీయులపై దాడి
ఈ వార్తాకథనం ఏంటి
బ్రిటన్‌లోని ఉత్తర ఇంగ్లాండులో దసరా, బతుకమ్మ వేడుకల సందర్భంగా విద్వేష దాడి చోటుచేసుకుంది. వేక్‌ఫీల్డ్‌ జిల్లాలో జరిగిన ఈ ఘటనలో భారతీయ సమాజానికి చెందిన ఇద్దరు వ్యక్తులు గాయపడ్డారు. ఆసట్‌ టౌన్‌హాలులో శనివారం రాత్రి నిర్వహించిన వేడుకల్లో పాల్గొని బయటకు వెళుతున్న వారిపై ముసుగులు ధరించిన కొందరు దుండగులు దాడి చేశారు. ఈ ఘటన స్థానికంగా కలకలం రేపింది.
వివరాలు
బాటిళ్లతో తలలపై దాడి
దసరా, బతుకమ్మ వేడుకల్లో పాల్గొని బయటకు వస్తున్న ఇద్దరు వ్యక్తులను మాస్కులు ధరించిన దుండగులు మొదట దూషించారు.
అనంతరం వెనుక నుంచి బాటిళ్లతో వారి తలలపై కొట్టి గాయపరిచారు. అప్పటివరకు ప్రశాంతంగా సాగుతున్న వేడుకల్లో ఈ ఘటన ఒక్కసారిగా ఆందోళనకు దారితీసింది.
ఈ దాడి గురించి వేడుకల నిర్వాహకులు పోలీసులకు సమాచారం అందించారు. భారతీయ సమాజానికి చెందిన వ్యక్తులపై జరిగిన ఈ దాడిని పోలీసులు తీవ్రంగా పరిగణిస్తున్నారు.
వివరాలు
నిందితుల కోసం పోలీసుల గాలింపు
ఈ ఘటనపై వెస్ట్‌ యార్క్‌షైర్‌ పోలీస్‌ ఇన్‌స్పెక్టర్‌ ఆండ్రూ డికిన్‌సన్‌ స్పందించారు. దాడిని తీవ్రంగా పరిగణిస్తున్నామని, నిందితులను గుర్తించేందుకు ప్రయత్నాలు కొనసాగుతున్నాయని తెలిపారు.
సామాజిక కార్యక్రమాల్లో ప్రతి ఒక్కరికీ ఎలాంటి భయం లేకుండా, సురక్షితంగా పాల్గొనే హక్కు ఉందని ఆయన పేర్కొన్నారు.
ఈ నేపథ్యంలో దాడికి పాల్పడిన వారిని గుర్తించేందుకు పోలీసులు దర్యాప్తు ముమ్మరం చేశారు.
వివరాలు
బైకులపై అనుమానాస్పదంగా తిరిగిన వ్యక్తులపై ఆరా
దాడి జరిగిన సమయంలో టౌన్‌హాలు పరిసరాల్లో సుర్‌-రాన్‌ ఈ బైకులపై అనుమానాస్పదంగా తిరుగాడిన వ్యక్తుల గురించి పోలీసులు ఆరా తీస్తున్నారు.
ఈ ఘటనకు సంబంధించి ఏదైనా సమాచారం తెలిసినవారు తమను సంప్రదించాలని అధికారులు కోరారు.
బ్రిటన్‌ ప్రభుత్వం విద్వేష నేరాలపై నివేదికను వెల్లడించిన కొద్ది రోజుల వ్యవధిలోనే ఈ దాడి జరగడం గమనార్హం.
దసరా, బతుకమ్మ వంటి భారతీయ పండుగల వేడుకల సందర్భంగా ఈ ఘటన చోటుచేసుకోవడం అక్కడి భారతీయ సమాజంలో ఆందోళనకు కారణమైంది.