Georgia: ట్రంప్‌కు షాక్.. జార్జియా సెనేట్ ఎన్నికల్లో జాన్ ఒస్సాఫ్ ఘన విజయం
ఈ వార్తాకథనం ఏంటి
అమెరికా మధ్యంతర ఎన్నికల్లో డెమోక్రటిక్ పార్టీకి కీలక విజయం దక్కింది. జార్జియా రాష్ట్రం నుంచి డెమోక్రటిక్ సెనేటర్ జాన్ ఒస్సాఫ్ (39) మరోసారి ఎన్నికయ్యారు. రిపబ్లికన్ పార్టీ అభ్యర్థి మైక్ కాలిన్స్‌పై గెలుపొందిన ఆయన రెండోసారి సెనేట్‌లో అడుగుపెట్టనున్నారు. 2026 మధ్యంతర ఎన్నికల ప్రచారం మొదలైనప్పటి నుంచి ఒస్సాఫ్ రిపబ్లికన్లకు ప్రధాన లక్ష్యంగా మారారు. 2024 అధ్యక్ష ఎన్నికల్లో డొనాల్డ్ ట్రంప్‌కు మద్దతు లభించిన జార్జియాలో డెమోక్రటిక్ పార్టీ తరఫున తిరిగి ఎన్నికల బరిలో నిలిచిన ఏకైక సెనేటర్ ఒస్సాఫ్ మాత్రమే. అయినప్పటికీ ట్రంప్ విధానాలను తీవ్రంగా విమర్శిస్తూ ఆయన ప్రచారం నిర్వహించారు.
వివరాలు
రిపబ్లికన్ అభ్యర్థి మైక్ కాలిన్స్‌కు ట్రంప్ మద్దతు
ఈ ఎన్నికల్లో ఒస్సాఫ్‌కు భారీగా విరాళాలు అందాయి. ఆయన ప్రచారానికి 100 మిలియన్ డాలర్లకు పైగా నిధులు సమకూరాయి.
ట్రంప్ పాలన, రాజకీయ అవినీతి, ఆర్థిక విధానాలపై విమర్శలు గుప్పిస్తూ ఓటర్లను ఆకట్టుకున్నారు.
ఈ విజయంతో 2028 అధ్యక్ష ఎన్నికల్లో ఒస్సాఫ్ పోటీ చేసే అవకాశాలపై కూడా రాజకీయ వర్గాల్లో చర్చ మొదలైంది.
మరోవైపు రిపబ్లికన్ అభ్యర్థి మైక్ కాలిన్స్‌కు ట్రంప్ మద్దతు ప్రకటించారు.
అయినప్పటికీ ఆయన ప్రచారం ఆశించిన స్థాయిలో ముందుకు సాగలేదు.
నిధుల సమీకరణలో ఇబ్బందులు ఎదుర్కోవడంతోపాటు జాత్యహంకార ఆరోపణలు, గతంలో సామాజిక మాధ్యమాల్లో చేసిన వ్యాఖ్యలు, ప్రతినిధుల సభలో పెండింగ్‌లో ఉన్న నైతిక విచారణ కాలిన్స్‌కు ప్రతికూలంగా మారాయి.
వివరాలు
జార్జియా నుంచి తొలి యూదు సెనేటర్‌గా ఒస్సా.. తొలి నల్లజాతి సెనేటర్‌గా వార్నాక్
కాలిన్స్‌పై ఒస్సాఫ్ తీవ్ర విమర్శలు చేశారు. ట్రంప్ ఏం చెబితే కాలిన్స్ అదే చేస్తారని, సొంతంగా ఆలోచించే సామర్థ్యం ఆయనకు లేదని ఆరోపించారు.
దీనికి ప్రతిగా ఒస్సాఫ్ విధానాలు అతివాదంగా ఉన్నాయని, తన ఓటింగ్ విధానంపై ప్రజలకు సమాధానం చెప్పాలని కాలిన్స్ విమర్శించారు.
2020లో తొలిసారి ఒస్సాఫ్ సెనేటర్‌గా ఎన్నికయ్యారు. అదే సమయంలో డెమోక్రటిక్ నేత రాఫెల్ వార్నాక్ కూడా విజయం సాధించారు.
జార్జియా నుంచి తొలి యూదు సెనేటర్‌గా ఒస్సాఫ్, తొలి నల్లజాతి సెనేటర్‌గా వార్నాక్ చరిత్ర సృష్టించారు.
తాజా విజయంతో ఒస్సాఫ్ మరోసారి తన రాజకీయ బలాన్ని నిరూపించుకున్నారు. ట్రంప్ విధానాలను వ్యతిరేకిస్తున్న డెమోక్రటిక్ పార్టీకి ఈ విజయం కీలకంగా మారింది.