US Navy: యూఎస్ఎస్ అబ్రహం లింకన్లో కలకలం.. 8 మంది సైనికుల ఆత్మహత్యాయత్నం
ఈ వార్తాకథనం ఏంటి
అమెరికా నావికాదళానికి చెందిన యూఎస్ఎస్ అబ్రహం లింకన్ క్యారియర్ స్ట్రైక్ గ్రూప్లో పనిచేస్తున్న ఎనిమిది మంది సైనికులు ఒకే మోహరింపు సమయంలో ఆత్మహత్యకు ప్రయత్నించినట్లు నేవీ వెల్లడించింది. ఈ విషయాన్ని యాక్టింగ్ నేవీ సెక్రటరీ హంగ్ కావో.. సెనేటర్ కిర్స్టెన్ గిల్లీబ్రాండ్కు పంపిన లేఖలో అధికారికంగా తెలిపారు. సెప్టెంబర్ 22న రాసిన ఈ లేఖ ప్రస్తుతం అమెరికా రాజకీయ వర్గాల్లో చర్చకు దారితీసింది. యూఎస్ఎస్ అబ్రహం లింకన్ నౌకతో పాటు దాని అనుబంధ విభాగాల్లో పనిచేస్తున్న సిబ్బందిలో మొత్తం ఎనిమిది మంది ఆత్మహత్యకు ప్రయత్నించినట్లు హంగ్ కావో పేర్కొన్నారు. నౌకలో పరిస్థితులు సరిగా లేవని, సైనికులు తీవ్ర ఒత్తిడిని ఎదుర్కొంటున్నారనే ఆరోపణలు గతంలో వచ్చాయి.
వివరాలు
సెనేటర్ కిర్స్టెన్ గిల్లీబ్రాండ్కు నేవీ కార్యదర్శి లేఖ ద్వారా వెల్లడి
ఈ అంశంపై సెనేటర్ గిల్లీబ్రాండ్తో పాటు మరో 14 మంది సెనేటర్లు ఆగస్టులో ప్రభుత్వానికి లేఖ రాశారు. దీనికి సమాధానంగా నేవీ తాజా వివరాలను వెల్లడించింది.
ఈ వ్యవహారంపై సెనేటర్ గిల్లీబ్రాండ్ తీవ్రంగా స్పందించారు.
అధ్యక్షుడు డొనాల్డ్ ట్రంప్, రక్షణ కార్యదర్శి పీట్ హెగ్సెత్పై ఆమె విమర్శలు చేశారు.
సైనికుల పరిస్థితులపై గతంలో ట్రంప్, హెగ్సెత్ చేసిన వ్యాఖ్యలను ఆమె ప్రస్తావించారు.
అప్పట్లో ఈ ఆరోపణలను 'ఫేక్ న్యూస్'గా కొట్టిపారేశారని, అయితే ఇప్పుడు సైనికులు ఎదుర్కొంటున్న పరిస్థితులపై ఆందోళనలు ఎందుకు వచ్చాయో స్పష్టమవుతోందని ఆమె అన్నారు.
సైనికులు, వారి కుటుంబాలు దేశం కోసం ఎన్నో త్యాగాలు చేస్తున్నప్పటికీ వారికి తగిన ప్రాధాన్యం ఇవ్వడం లేదని గిల్లీబ్రాండ్ ఆరోపించారు.
వివరాలు
సైనికుల బాగోగులు పట్టించుకోవడం లేదంటూ ప్రభుత్వంపై తీవ్ర విమర్శలు
ప్రభుత్వం బాంబులు, బిలియనీర్ల కోసం ప్రజాధనాన్ని ఖర్చు చేయగలుగుతున్నప్పటికీ, సైనికుల సంక్షేమాన్ని పట్టించుకోవడం లేదని ఆమె విమర్శించారు.
సైనికుల విషయంలో ఇలాంటి పరిస్థితులు కొనసాగడం ఆమోదయోగ్యం కాదని పేర్కొన్నారు.
మార్చిలో జరిగిన ఓ ఘటనను నేవీ తన లేఖలో ప్రత్యేకంగా ప్రస్తావించింది.
ఓ సైనికుడు నౌకపై నుంచి సముద్రంలోకి దూకేందుకు ప్రయత్నించగా, అతని తోటి సైనికులు అడ్డుకున్నట్లు తెలిపింది.
వివరాలు
సైనికుల బాగోగులు పట్టించుకోవడం లేదంటూ ప్రభుత్వంపై తీవ్ర విమర్శలు
అనంతరం అతనికి వైద్య సహాయం అందించి, ఇంటికి పంపించినట్లు వెల్లడించింది.
మిగిలిన ఏడు ఆత్మహత్యాయత్నాలకు సంబంధించిన పూర్తి వివరాలను మాత్రం నేవీ బయటపెట్టలేదు.
తాజాగా వెలుగులోకి వచ్చిన ఈ ఘటనలు అమెరికా నావికాదళంలో సైనికుల మానసిక ఆరోగ్యం, పని పరిస్థితులు, వారికి అందుతున్న సహాయక సేవలపై మరోసారి దృష్టిని మళ్లించాయి.
సైనికుల సంక్షేమం, మానసిక ఆరోగ్యానికి అవసరమైన సహాయాన్ని మరింత బలోపేతం చేయాలనే డిమాండ్లు కూడా పెరుగుతున్నాయి.