Donald Trump: రష్యా-ఉక్రెయిన్ మధ్య కాల్పుల విరమణ.. ట్రంప్ ప్రకటనపై జెలెన్‌స్కీ ఏమన్నారంటే!
ఈ వార్తాకథనం ఏంటి
రష్యా-ఉక్రెయిన్ యుద్ధానికి సంబంధించి అమెరికా అధ్యక్షుడు డొనాల్డ్ ట్రంప్ కీలక ప్రకటన చేశారు. ఇరు దేశాల మధ్య తక్షణమే ఎనర్జీ కాల్పుల విరమణ (Energy Ceasefire) అమల్లోకి వచ్చిందని వెల్లడించారు. అయితే ఈ ప్రకటన తనకు కొత్త విషయమని ఉక్రెయిన్ అధ్యక్షుడు వొలోడిమిర్ జెలెన్‌స్కీ పేర్కొన్నారు. రష్యా అంగీకరిస్తే తాము కూడా కాల్పుల విరమణకు సిద్ధమని స్పష్టం చేశారు. రష్యా-ఉక్రెయిన్ మధ్య కొనసాగుతున్న యుద్ధానికి ముగింపు పలికేందుకు అమెరికా అధ్యక్షుడు డొనాల్డ్ ట్రంప్ ప్రయత్నాలు కొనసాగిస్తున్నారు. ఈ క్రమంలో ఆదివారం ఆయన కీలక ప్రకటన చేశారు. ఇరు దేశాల మధ్య తక్షణమే ఎనర్జీ కాల్పుల విరమణ అమల్లోకి వచ్చిందని తన ట్రూత్ సోషల్ వేదికగా వెల్లడించారు.
వివరాలు
ఈ విషయం నాకు తెలియదు
అయితే ఈ ఒప్పందం ఎప్పటి వరకు కొనసాగుతుంది? దీన్ని ఏ విధంగా అమలు చేస్తారు? అనే విషయాలను ఆయన స్పష్టం చేయలేదు.
ఈప్రకటనపై రష్యా క్రెమ్లిన్, వైట్‌హౌస్ నుంచి కూడా ఎలాంటి అధికారిక స్పందన రాలేదు. ట్రంప్ ప్రకటనపై ఉక్రెయిన్ అధ్యక్షుడు జెలెన్‌స్కీ స్పందిస్తూ.. ఈవిషయం తనకు తెలియదని అన్నారు.
రష్యా ఎనర్జీ మౌలిక సదుపాయాలపై దాడులు నిలిపివేస్తే, తాము కూడా రష్యా చమురు శుద్ధి కర్మాగారాలపై దాడులు ఆపేందుకు సిద్ధంగా ఉన్నామని చెప్పారు.
ట్రంప్, రష్యా అధ్యక్షుడు వ్లాదిమిర్ పుతిన్‌తో చర్చించి ఈ ఒప్పందాన్ని కుదిర్చి ఉంటే, కాల్పుల విరమణ ఎప్పటి నుంచి అమల్లోకి వస్తుందో తమకు తెలియజేయాలని కోరారు.
ఒప్పందానికి తాము అంగీకరిస్తామని ఆయన ఆక్సియోస్ వార్తా సంస్థకు తెలిపారు.
వివరాలు
ఉక్రెయిన్‌కు కొత్త అధ్యక్షుడు కావాలన్న ట్రంప్
ఉక్రెయిన్‌లో కొత్త అధ్యక్షుడు రావాలని ట్రంప్ వ్యాఖ్యానించిన మరుసటి రోజే ఈ పరిణామం చోటుచేసుకుంది. 2019 తర్వాత ఉక్రెయిన్‌లో అధ్యక్ష ఎన్నికలు జరగలేదు.
రష్యాతో శాంతి ఒప్పందాన్ని కుదుర్చుకోవడంలో జెలెన్‌స్కీ విఫలమయ్యారని ట్రంప్ విమర్శించారు. రష్యా ఇటీవల అమెరికాకు డీజిల్ ఎగుమతి చేసేందుకు ఒప్పందం కుదుర్చుకున్న నేపథ్యంలో ఆయన ఈ వ్యాఖ్యలు చేశారు.
'ఒప్పందం చేసుకోగలిగే కొత్త నాయకుడిని ఉక్రెయిన్ ఎన్నుకోవాలని సూచిస్తున్నాను. ఎందుకో తెలియదు కానీ, జెలెన్‌స్కీ మాత్రం ఎప్పుడూ ఒప్పందం చేసుకోలేకపోతున్నారని ట్రంప్ వ్యాఖ్యానించారు.
దీనిపై జెలెన్‌స్కీ స్పందిస్తూ.. తమ దేశానికి ఎవరు నాయకత్వం వహించాలనేది ఉక్రెయిన్ ప్రజలే నిర్ణయిస్తారని స్పష్టం చేశారు.
వివరాలు
ప్రజలు నిర్ణయించాలి
''అధ్యక్షుడు ట్రంప్‌పై పూర్తి గౌరవం ఉంది. అయితే, ఎవరిని నాయకుడిగా ఎన్నుకోవాలనేది మా సమాజం, మా ప్రజలు తీసుకోవాల్సిన నిర్ణయమని పేర్కొన్నారు.
యుద్ధ సమయంలో ఎన్నికలు నిర్వహించడం చాలా కష్టమని జెలెన్‌స్కీ వివరించారు. ప్రజలు ఓటు వేసేందుకు బయటకు వచ్చే ముందు ఎన్నికలకు అవసరమైన మౌలిక సదుపాయాలు, భద్రతను నిర్ధారించాల్సి ఉంటుందని తెలిపారు.
పుతిన్ కూడా ఉక్రెయిన్ నాయకత్వంలో మార్పు రావాలని కోరుకుంటున్నారని వ్యాఖ్యానించారు.
యుద్ధాన్ని వీలైనంత త్వరగా ముగించేందుకు అమెరికా, యూరప్ మిత్రదేశాల సహకారాన్ని ఆశిస్తున్నట్లు జెలెన్‌స్కీ చెప్పారు. అయితే, తమ దేశాన్ని రక్షించుకోవడం తప్ప మరో మార్గం లేదని స్పష్టం చేశారు.
వివరాలు
కాల్పుల విరమణకు ఉక్రెయిన్ షరతు ఏమిటి?
ఈ యుద్ధాన్ని వీలైనంత త్వరగా ఆపాలి. పుతిన్‌ను నిలువరించేందుకు అమెరికా, యూరప్‌లోని మా మిత్రదేశాలపై ఆశలు పెట్టుకున్నాం.
ఏ పరిస్థితుల్లోనైనా మమ్మల్ని మేము రక్షించుకుంటాం. లేదంటే మా ప్రాణాలు, ఇళ్లు, స్వేచ్ఛ, స్వాతంత్ర్యం, చివరకు మా దేశాన్నే కోల్పోవాల్సి వస్తుంది. అలా జరగనివ్వలేం'' అని జెలెన్‌స్కీ పేర్కొన్నారు.
రష్యా తన ఎనర్జీ మౌలిక సదుపాయాలపై దాడులు నిలిపివేస్తే, తాము కూడా రష్యా చమురు శుద్ధి కర్మాగారాలపై దాడులను ఆపేస్తామని జెలెన్‌స్కీ అంతకుముందు ఎక్స్‌ (X) వేదికగా వెల్లడించారు.
రష్యా మా ఎనర్జీ మౌలిక సదుపాయాలపై దాడులు ఆపితే, ఆ దేశంలోని చమురు శుద్ధి కర్మాగారాలపై దాడులు నిలిపివేయడానికి ఉక్రెయిన్ సిద్ధంగా ఉంది.
వివరాలు
రష్యాతో ట్రంప్ ఒప్పందంపై వివాదం
ఉద్రిక్తతలను తగ్గించేందుకు తీసుకునే ఏ చర్య అయినా ఇరు పక్షాల నుంచి సమానంగా ఉండాలి. అంతేకాకుండా వాటికి వాస్తవమైన హామీలు ఉండాలి'' అని ఆయన పేర్కొన్నారు.
ప్రపంచ మార్కెట్లలోకి డీజిల్ సరఫరా చేసేందుకు రష్యాతో ట్రంప్ ఒప్పందం కుదుర్చుకోవడంతో ఇరు దేశాల మధ్య ఉద్రిక్తతలు మరోసారి చర్చనీయాంశమయ్యాయి.
ఇందుకు ప్రతిఫలంగా రష్యాపై ఆంక్షల నుంచి ఉపశమనం కల్పించే అంశం ఈ ఒప్పందంలో ఉంది. ఈ నిర్ణయాన్ని జెలెన్‌స్కీ బలహీనమైన చర్యగా అభివర్ణించారు.
దీనివల్ల రష్యా మరింత దూకుడుగా ఉక్రెయిన్‌పై దాడులు చేసే అవకాశం ఉందని ఆందోళన వ్యక్తం చేశారు. మరోవైపు, ఇంధన ధరలు పెరగడానికి ఉక్రెయిన్ కారణమని ట్రంప్ ఆరోపించారు.