Trump: ట్రంప్‌కు మరో తలనొప్పి.. డెమోక్రాట్ అభ్యర్థికి రిపబ్లికన్ మాజీ గవర్నర్ల మద్దతు
ఈ వార్తాకథనం ఏంటి
అమెరికా మధ్యంతర ఎన్నికల వేళ దక్షిణ కరోలినా సెనేట్ పోరు ఆసక్తికరంగా మారుతోంది. అధ్యక్షుడు డొనాల్డ్ ట్రంప్ మద్దతున్న రిపబ్లికన్ అభ్యర్థి డార్లిన్ గ్రాహమ్‌కు పోటీగా బరిలోకి దిగిన డెమోక్రాట్ అభ్యర్థి, డాక్టర్ అన్నీ ఆండ్రూస్‌కు ఇద్దరు మాజీ గవర్నర్లు మద్దతు ప్రకటించారు. మాజీ గవర్నర్లు డేవిడ్ బీస్లీ, జిమ్ హాడ్జెస్ సోమవారం విడుదల చేసిన ఓ వీడియో ద్వారా ఆండ్రూస్‌కు తమ మద్దతు తెలిపారు. వీరిలో డేవిడ్ బీస్లీ తొలుత డెమోక్రాట్ పార్టీ తరఫున గవర్నర్‌గా పనిచేశారు. ఆ తర్వాత రిపబ్లికన్ పార్టీలో చేరారు. ఆయన తర్వాత గవర్నర్‌గా బాధ్యతలు చేపట్టిన జిమ్ హాడ్జెస్ డెమోక్రాట్ పార్టీకి చెందినవారు.
వివరాలు
రిపబ్లికన్ పార్టీ అనుసరిస్తున్న విధానాలపై విమర్శలు
అమెరికాలో రాజకీయ విభజన రోజురోజుకూ పెరుగుతోందని, రాజకీయ నాయకుల వ్యాఖ్యలు హద్దులు దాటుతున్నాయని ఈ ఇద్దరు నేతలు ఆందోళన వ్యక్తం చేశారు.
ప్రజల్లో కోపాన్ని పెంచడం నాయకత్వం కాదని, సమస్యలకు పరిష్కారాలు చూపించడమే నిజమైన నాయకుడి లక్షణమని బీస్లీ పేర్కొన్నారు.
గతంలో రిపబ్లికన్ గవర్నర్ల సంఘానికి అధ్యక్షుడిగా పనిచేసిన డేవిడ్ బీస్లీ.. ట్రంప్ నాయకత్వంలో రిపబ్లికన్ పార్టీ అనుసరిస్తున్న విధానాలపై ఇటీవల విమర్శలు చేశారు.
ప్రస్తుతం పార్టీ అనుసరిస్తున్న వైఖరి తాను గతంలో చూసిన రిపబ్లికన్ పార్టీకి భిన్నంగా ఉందని, ఇప్పుడు దాన్ని తన పార్టీగా భావించలేకపోతున్నానని వ్యాఖ్యానించారు.
మరోవైపు, రిపబ్లికన్ల ఆధిపత్యం ఉన్న రాష్ట్రాల్లోనూ కొందరు మాజీ నేతలు డెమోక్రాట్ అభ్యర్థులకు మద్దతుగా నిలుస్తున్నారు.
వివరాలు
జేమ్స్ తలారికోకు అండగా బుష్ కుటుంబానికి చెందిన పలువురు నేతలు
కాన్సాస్‌లో ఇద్దరు మాజీ రిపబ్లికన్ గవర్నర్లు.. ప్రస్తుత రిపబ్లికన్ సెనేటర్ రోజర్ మార్షల్‌పై పోటీ చేస్తున్న డెమోక్రాట్ అభ్యర్థి ఆడమ్ హామిల్టన్‌కు మద్దతు ప్రకటించారు.
అలాగే, టెక్సాస్‌లో బుష్ కుటుంబానికి చెందిన పలువురు నేతలు డెమోక్రాట్ అభ్యర్థి జేమ్స్ తలారికోకు అండగా నిలిచారు.
మాజీ గవర్నర్ల మద్దతు లభించడంతో అన్నీ ఆండ్రూస్‌కు రాజకీయంగా కొంత బలం చేకూరినప్పటికీ.. ఆమె విజయం సాధించడం అంత సులభం కాదు.
దక్షిణ కరోలినాలో ఈ శతాబ్దంలో ఇప్పటివరకు డెమోక్రాట్లు ఒక్క సెనేట్ స్థానాన్ని కూడా గెలుచుకోలేదు.
వివరాలు
ఈ రాష్ట్రంలో 17 శాతానికి పైగా ఓట్ల ఆధిక్యంతో ట్రంప్
రెండేళ్ల క్రితం జరిగిన అధ్యక్ష ఎన్నికల్లోనూ డొనాల్డ్ ట్రంప్ ఈ రాష్ట్రంలో 17 శాతానికి పైగా ఓట్ల ఆధిక్యంతో విజయం సాధించారు.
ఈ ఏడాది రాజకీయ పరిస్థితులు డెమోక్రాట్లకు కొంత అనుకూలంగా ఉన్నప్పటికీ, స్వతంత్ర ఎన్నికల విశ్లేషణ సంస్థ కుక్ పొలిటికల్ రిపోర్ట్ మాత్రం దక్షిణ కరోలినా సెనేట్ పోరును రిపబ్లికన్లకు అనుకూలంగా ఉన్న పోటీగా అంచనా వేసింది.
ఈ నేపథ్యంలో మాజీ గవర్నర్ల మద్దతు, నిధుల సేకరణలో ఆండ్రూస్‌కు ఉన్న ఆధిక్యం ఎన్నికల్లో ఆమెకు ఎంతవరకు ఉపయోగపడతాయన్నది ఆసక్తికరంగా మారింది.