Germany Gen Z Protests: జర్మనీలో హింసాత్మకంగా మారిన జెన్-జీ నిరసనలు.. ఫ్రాంక్‌ఫర్ట్‌లో దుకాణాల లూటీ
ఈ వార్తాకథనం ఏంటి
జర్మనీలో యువత చేపట్టిన నిరసనలు హింసాత్మకంగా మారాయి. 'జెన్ జెడ్ రెగెల్ట్'(Gen Z Regelt)పేరుతో శనివారం రాత్రి నిర్వహించిన ఆందోళనల్లో దేశంలోని పలు నగరాల్లో ఘర్షణలు చోటుచేసుకున్నాయి. ముఖ్యంగా ఫ్రాంక్‌ఫర్ట్‌లో పరిస్థితి ఉద్రిక్తంగా మారింది. నిరసనకారులు దుకాణాలను లూటీ చేయడంతో పాటు పోలీసులపై మోలోటోవ్ కాక్‌టెయిల్స్‌తో దాడులకు పాల్పడ్డారు. విద్యా రంగానికి నిధుల కేటాయింపులో కోతలు, పెరుగుతున్న జీవన వ్యయం, ప్రజా సేవల నాణ్యత తగ్గడం, తప్పనిసరి సైనిక సేవ వంటి అంశాలకు వ్యతిరేకంగా యువత ఈ నిరసనలు చేపట్టింది. బెర్లిన్, ఫ్రాంక్‌ఫర్ట్, మ్యూనిచ్‌ సహా జర్మనీ వ్యాప్తంగా మొత్తం 34 నగరాల్లో ఆందోళనలు జరిగాయి. వేలాది మంది యువతీ యువకులు వీధుల్లోకి వచ్చి ప్రభుత్వ విధానాలపై తమ అసంతృప్తిని వ్యక్తం చేశారు.
వివరాలు
ఫ్రాంక్‌ఫర్ట్‌లో దుకాణాల లూటీ.. పోలీసులపై దాడులు
ఫ్రాంక్‌ఫర్ట్ నగరంలో నిరసనలు తీవ్ర హింసకు దారితీశాయి. నగర కేంద్రంలోని రెండు దుకాణాలను ఆందోళనకారులు లూటీ చేశారు.
అంతేకాకుండా పలు దుకాణాల అద్దాలను ధ్వంసం చేశారు. ఒక ఆయుధాల దుకాణంపై కూడా దాడికి ప్రయత్నించారు.
ఈ ఘటనలో పోలీసులు ఇద్దరిని అదుపులోకి తీసుకుని వారి నుంచి ఆయుధాలను స్వాధీనం చేసుకున్నారు.
ఆందోళనకారులు పోలీసులపై రాళ్లు, సీసాలు, మోలోటోవ్ కాక్‌టెయిల్స్ విసరడంతో పరిస్థితి మరింత ఉద్రిక్తంగా మారింది. దీంతో పోలీసులు అప్రమత్తమై జీల్ షాపింగ్ వీధిని మూసివేశారు.
నగర కేంద్రంలోని ప్రాంతాలను ఖాళీ చేయాలని ప్రజలకు హెచ్చరికలు జారీ చేశారు.
వివరాలు
పలు నగరాల్లో ఘర్షణలు.. పోలీసుల బలప్రయోగం
ఫ్రాంక్‌ఫర్ట్‌తో పాటు హ్యాంబర్గ్, కొలోన్, బెర్లిన్ నగరాల్లోనూ హింసాత్మక ఘటనలు నమోదయ్యాయి. హ్యాంబర్గ్‌లో నిరసనకారులు బారికేడ్లకు నిప్పుపెట్టారు.
ఇతర నగరాల్లోనూ ఆందోళనకారులు, పోలీసుల మధ్య ఘర్షణలు చోటుచేసుకున్నాయి. నిరసనకారులను చెదరగొట్టేందుకు పోలీసులు వాటర్ క్యానన్లు, పెప్పర్ స్ప్రే ప్రయోగించారు.
ఈ ఘర్షణల్లో పలువురు పోలీసు సిబ్బంది గాయపడ్డారు. ఆందోళనలకు పాల్పడిన అనేక మందిని పోలీసులు అరెస్టు చేశారు.
ఈ నిరసనలకు నాయకత్వం వహించిన నిర్వాహకురాలు లినా ఫ్రెడ్రిక్ మాట్లాడుతూ.. తాము శాంతి, స్వేచ్ఛ కోసం పోరాడుతున్నామని, యుద్ధం, బలవంతం కోసం కాదని తెలిపారు.
వివరాలు
విద్య, ఆరోగ్య రంగాలకు నిధులు పెంచాలని డిమాండ్
విద్య, ఆరోగ్య రంగాలకు ప్రభుత్వం మరిన్ని నిధులు కేటాయించాలని, తప్పనిసరి సైనిక సేవను రద్దు చేయాలని నిరసనకారులు డిమాండ్ చేస్తున్నట్లు పేర్కొన్నారు.
ఇదిలా ఉండగా, జర్మనీలో చోటుచేసుకున్న ఈ హింసాత్మక ఘటనలు ఫ్రాన్స్‌లో గతంలో జరిగిన అల్లర్లను గుర్తుచేస్తున్నాయని అధికారులు అభిప్రాయపడుతున్నారు.
తీవ్రవాద గ్రూపులు యువత నిరసనలను తమ ప్రయోజనాలకు ఉపయోగించుకుంటున్నాయా? అనే అనుమానాలను కూడా వ్యక్తం చేస్తున్నారు.
అంతర్జాతీయ మీడియా కథనాల ప్రకారం.. జర్మనీలోని చాలా నగరాల్లో నిరసనలు తొలుత శాంతియుతంగానే ప్రారంభమయ్యాయి.
అయితే సాయంత్రం సమయానికి కొన్ని ప్రాంతాల్లో పరిస్థితి అదుపుతప్పి హింసాత్మక ఘర్షణలకు దారితీసింది.