H-1B visa:హెచ్-1బీ వీసాలపై ట్రంప్ సర్కార్ కఠిన చర్యలు.. ఏడాదిలో కీలక మార్పులు
ఈ వార్తాకథనం ఏంటి
ఏడాదిలోగా హెచ్-1బీ వీసా విధానంలో కీలక మార్పులు రానున్నాయి. అమెరికాలో విదేశీ కార్మికుల వీసాలకు సంబంధించి మోసాలను అరికట్టేందుకు డొనాల్డ్ ట్రంప్ ప్రభుత్వం కఠిన చర్యలు చేపడుతోంది. ఈ నేపథ్యంలో హెచ్-1బీ వీసా విధానంలో భారీ మార్పులు చోటుచేసుకునే అవకాశం కనిపిస్తోంది. అమెరికా కార్మిక శాఖ ఇన్స్పెక్టర్ జనరల్ ఆంథోనీ డి'ఎస్పోసిటో ఈ విషయాన్ని స్వయంగా వెల్లడించారు.
వివరాలు
365 రోజుల్లో మార్పులు..
ఇటీవల ఓ ఇంటర్వ్యూలో మాట్లాడిన ఆంథోనీ డి'ఎస్పోసిటో.. రాబోయే 365 రోజుల్లో విదేశీ కార్మిక వీసా కార్యక్రమంలో కీలక మార్పులు జరుగుతాయని తెలిపారు.
వీసా కార్యక్రమంలో మోసాలకు పాల్పడుతున్న వారిపై కఠిన చర్యలు తీసుకునేందుకు దర్యాప్తు బృందాలు ఆధారాలు సేకరిస్తున్నాయని చెప్పారు.
అవసరమైతే అరెస్టులు చేసేందుకు కూడా సిద్ధంగా ఉన్నామని పేర్కొన్నారు.
సేకరించిన వాస్తవాలను అమెరికా ప్రజల ముందు ఉంచుతున్నామని తెలిపారు.
ఆయన వ్యాఖ్యలను బట్టి హెచ్-1బీ వీసా మోసాలపై అమెరికా ప్రభుత్వం ఎంతటి ప్రాధాన్యంతో వ్యవహరిస్తోందో స్పష్టమవుతోంది.
వివరాలు
వేతనాల అవకతవకలపైనా దృష్టి..
నకిలీ వీసా దరఖాస్తులు, వేతనాల్లో అక్రమాలు, విదేశీ కార్మికుల దోపిడీ, అమెరికా ఉద్యోగులను తొలగించడం వంటి అంశాలపై అధికారులు ప్రధానంగా దృష్టి సారిస్తున్నారు.
విదేశీ కార్మిక వీసా వ్యవస్థలో అక్రమాలను అరికట్టేందుకు ప్రభుత్వం చేపడుతున్న విస్తృత వ్యూహంలో భాగంగానే ఈ చర్యలు కొనసాగుతున్నట్లు తెలుస్తోంది.
ఇప్పటికే కొంతమంది హెచ్-1బీ వర్కర్ల అమెరికా ప్రవేశంపై ఆంక్షలను ప్రభుత్వం పొడిగించింది.
అంతేకాకుండా హెచ్-1బీ వీసా దరఖాస్తులను సమీక్షించే సమయంలో సంబంధిత కంపెనీ గతంలో ఉద్యోగులను తొలగించిన చరిత్రను కూడా పరిగణనలోకి తీసుకోవాలని ఏజెన్సీలను ఆదేశించింది.
వివరాలు
'ప్రాజెక్ట్ ఫైర్వాల్' వంటి కార్యక్రమాలు..
అమెరికాలోని స్థానిక టెక్ ఉద్యోగాలను విదేశీ నిపుణులతో భర్తీ చేయకుండా నిరోధించేందుకు గతంలో 'ప్రాజెక్ట్ ఫైర్వాల్' వంటి కార్యక్రమాలను కూడా చేపట్టారు.
అమెరికన్ ఉద్యోగాల పరిరక్షణకు ఈ చర్యలు ఉద్దేశించినవిగా అధికారులు చెబుతున్నారు.
అయితే హెచ్-1బీ వీసా విధానంపై భిన్నాభిప్రాయాలు ఉన్నాయి. కొన్ని కంపెనీలు, ఔట్సోర్సింగ్ సంస్థలు అమెరికన్ల వేతనాలు, ఉద్యోగాలను దెబ్బతీసేందుకు హెచ్-1బీ విధానాన్ని దుర్వినియోగం చేస్తున్నాయని విమర్శకులు ఆరోపిస్తున్నారు.
మరోవైపు అమెరికాలో నిపుణుల కొరతను తీర్చేందుకు హెచ్-1బీ వీసా విధానం ఎంతో అవసరమని దాని మద్దతుదారులు వాదిస్తున్నారు.