'Habibi meaning': అమెరికా మిడ్‌టర్మ్‌ ఫలితాల తర్వాత ట్రెండింగ్‌లో హబీబీ మీనింగ్
ఈ వార్తాకథనం ఏంటి
అమెరికా మిడ్‌టర్మ్‌ ఎన్నికల ఫలితాల నేపథ్యంలో 'హబీబీ మీనింగ్' అనే పదం ఇప్పుడు నెట్టింట ట్రెండింగ్‌లో నిలిచింది. రిపబ్లికన్‌ పార్టీకి గట్టి ఎదురుదెబ్బ తగలగా.. డెమోక్రాట్లు ఉభయ సభల్లో ఆధిపత్యం సాధించారు. ఈ ఫలితాల తర్వాత నెటిజన్లు 'హబీబీ' అనే పదానికి అర్థం ఏమిటంటూ ఇంటర్నెట్‌లో వెతుకుతున్నారు. ఇంతకీ ఈ పదం ఎందుకు ట్రెండ్‌ అవుతోంది? మిషిగన్‌ సెనేటర్‌గా డెమోక్రటిక్‌ పార్టీ అభ్యర్థి అబ్దుల్‌ ఎల్‌ సయెద్‌ (Abdul El-Sayed) విజయం సాధించారు. గెలుపు అనంతరం అమెరికా ఉపాధ్యక్షుడు జేడీ వాన్స్‌ను ఉద్దేశించి ఆయన చేసిన వ్యాఖ్యలు ఇప్పుడు చర్చనీయాంశంగా మారాయి. ''జేడీ.. హబీబీ.. జనవరిలో నా ప్రమాణస్వీకారం చేయించాల్సిన బాధ్యత నీపైనే ఉంది. ఇది నిజంగా విచిత్రమైన పరిస్థితి''అని అబ్దుల్‌ వ్యాఖ్యానించారు.
వివరాలు
అబ్దుల్‌ పేరును హేళన చేసిన ట్రంప్
ఎన్నికల ప్రచార సమయంలో అమెరికా అధ్యక్షుడు డొనాల్డ్‌ ట్రంప్, ఉపాధ్యక్షుడు జేడీ వాన్స్‌ అబ్దుల్‌పై జాతి, మతపరమైన విమర్శలు చేశారు.
అబ్దుల్‌ పేరును ట్రంప్ హేళన చేస్తూ మాట్లాడారు. ఈ నేపథ్యంలో ఎన్నికల్లో విజయం సాధించిన అనంతరం అబ్దుల్‌ చేసిన వ్యాఖ్యలు ప్రాధాన్యం సంతరించుకున్నాయి.
అమెరికా చట్టాల ప్రకారం ఉపాధ్యక్షుడు సెనెట్‌ అధ్యక్షుడిగా వ్యవహరిస్తారు.
కొత్తగా ఎన్నికైన సెనేటర్లతో ఆయన ప్రమాణస్వీకారం చేయిస్తారు. ఈ క్రమంలోనే తన ప్రమాణస్వీకారం చేయించాల్సిన బాధ్యత జేడీ వాన్స్‌పై ఉందని అబ్దుల్‌ వ్యాఖ్యానించారు.
ప్రచార సమయంలో రిపబ్లికన్‌ నేతలు చేసిన విద్వేషపూరిత వ్యాఖ్యలకు 'హబీబీ' అంటూ ఆయన బదులిచ్చారు. దీంతో ఈ పదం సామాజిక మాధ్యమాల్లో విస్తృతంగా చర్చకు వచ్చింది.
వివరాలు
'హబీబీ' అనేది అరబిక్‌ పదం
'హబీబీ' అనేది అరబిక్‌ పదం. దీని అర్థం 'నా ప్రియమైన వ్యక్తి' లేదా 'నా ప్రేమ' (My Love). సాధారణంగా స్నేహితులు, కుటుంబ సభ్యులను ప్రేమగా సంబోధించేందుకు ఈ పదాన్ని ఉపయోగిస్తారు.
అబ్దుల్‌ వ్యాఖ్యలతో ఈ పదం ట్రెండింగ్‌లోకి రావడంతో దాని అర్థం తెలుసుకునేందుకు నెటిజన్లు ఆసక్తి చూపిస్తున్నారు.