US Election Commission Website: అమెరికా ఫెడరల్ ఎన్నికల కమిషన్ వెబ్‌సైట్‌పై హ్యాకర్ల దాడి.. నిలిచిపోయిన సేవలు
ఈ వార్తాకథనం ఏంటి
అమెరికా మధ్యంతర ఎన్నికలకు కొద్ది రోజుల ముందు ఫెడరల్ ఎన్నికల కమిషన్ (FEC) వెబ్‌సైట్‌పై హ్యాకర్లు దాడి చేసినట్లు రాయిటర్స్ వార్తా సంస్థ వెల్లడించింది. ఈ దాడి కారణంగా రాజకీయ పార్టీలకు, ఎన్నికల ప్రచార సంస్థలకు సంబంధించిన ఖర్చుల వివరాలను సమర్పించే ఎలక్ట్రానిక్ ఫైలింగ్ వ్యవస్థ నిలిచిపోయింది. నవంబర్ 3న జరగనున్న ఎన్నికలకు వారం రోజుల ముందు ఈ ఘటన చోటుచేసుకోవడం ప్రాధాన్యం సంతరించుకుంది. తమ వ్యవస్థలను చొరబాటుదారులు లక్ష్యంగా చేసుకున్నారని, అందువల్ల వెబ్‌సైట్ ద్వారా అందించే కొన్ని సేవలను తాత్కాలికంగా నిలిపివేయాల్సి వచ్చిందని FEC అధికారులు ప్రచార ఆర్థిక వ్యవహారాలను పర్యవేక్షించే సంస్థలకు పంపిన ఈమెయిల్‌లో పేర్కొన్నారు. తమ ఐటీ సిబ్బంది సేవలను పునరుద్ధరించేందుకు ప్రయత్నిస్తున్నారని కమిషన్ తెలిపింది.
వివరాలు
ప్రచార ఖర్చుల నివేదికలకు అంతరాయం
అయితే, గతంలో సమర్పించిన నివేదికలను వెబ్‌సైట్‌లో వెతికే సదుపాయం అందుబాటులో ఉన్నట్లు వెల్లడించింది.
సమస్యను గుర్తించామని, పరిష్కారాన్ని అమలు చేస్తున్నామని అధికారులు తెలిపారు.
ఈ అంతరాయం వల్ల ఓటర్లు తమ ఓటు హక్కును వినియోగించుకోవడంపై ఎలాంటి ప్రభావం ఉండదని అధికారులు స్పష్టం చేశారు.
అమెరికా ఎన్నికలను నిర్వహించే బాధ్యత FECకి లేదు. అయితే, రాజకీయ ప్రచారాలకు నిధులు సమకూర్చే సంస్థలు 24 గంటలు, 48 గంటల్లో సమర్పించాల్సిన ఖర్చుల నివేదికలను దాఖలు చేయలేకపోతున్నాయి.
దీంతో ఏ అభ్యర్థి కోసం ఎంత ఖర్చు చేస్తున్నారు? నిధులు ఎక్కడి నుంచి వస్తున్నాయి? అనే వివరాలను తెలుసుకోవడం కష్టంగా మారింది.
వివరాలు
అమెరికా ఎన్నికల్లో రికార్డు ఖర్చులు.. రోజుకు రూ.420 కోట్లకు పైగా వ్యయం
ఈ ఏడాది అమెరికా మధ్యంతర ఎన్నికలు చరిత్రలోనే అత్యంత ఖరీదైనవిగా నిలిచాయి.
రాజకీయ ప్రకటనలు,వాటి కోసం ముందస్తు బుకింగ్‌లకు ఇప్పటివరకు సుమారు 11.21 బిలియన్ డాలర్లు (దాదాపు రూ.94 వేల కోట్లు) ఖర్చయినట్లు AdImpact అంచనా వేసింది.
సంపన్న వ్యక్తులు,సంస్థల నుంచి భారీగా నిధులు పొందే సూపర్ పీఏసీలు, ఇతర రాజకీయ సంస్థలు ఈ ఖర్చులో కీలక పాత్ర పోషిస్తున్నాయి.
గత వారంలోనే సూపర్ పీఏసీలు, ఇతర సంస్థలు రోజుకు సగటున 50 మిలియన్ డాలర్లకు పైగా ఖర్చు చేసినట్లు OpenSecrets పరిశోధన విభాగం తెలిపింది.
ఎన్నికల చివరి రోజుల్లో నిధుల ప్రవాహాన్ని తెలుసుకోవడానికి ఈ నివేదికలే కీలకమని నిపుణులు పేర్కొన్నారు. సైబర్ దాడి వెనుక ఎవరున్నారనే వివరాలు మాత్రం ఇంకా వెల్లడికాలేదు.