White House: అమెరికాలో హై అలర్ట్.. వైట్ హౌస్ సమీపంలో కాల్పుల కలకలం
ఈ వార్తాకథనం ఏంటి
అమెరికా రాజధాని వాషింగ్టన్లోని అమెరికా అధ్యక్షుడి అధికారిక నివాసం వైట్ హౌస్ సమీపంలో శనివారం రాత్రి చోటుచేసుకున్న కాల్పుల ఘటన తీవ్ర ఉద్రిక్తతకు దారితీసింది. సీక్రెట్ సర్వీస్ వెల్లడించిన వివరాల ప్రకారం.. ఓ దుండగుడు వైట్ హౌస్ పరిసరాల్లోని 17వ స్ట్రీట్, పెన్సిల్వేనియా అవెన్యూ వద్ద ఉన్న సీక్రెట్ సర్వీస్ చెక్పాయింట్ దగ్గరకు చేరుకున్నాడు. అనంతరం ఒక్కసారిగా తన వద్ద ఉన్న ఆయుధాన్ని బయటకు తీసి అక్కడ విధుల్లో ఉన్న భద్రతా సిబ్బందిపై కాల్పులకు పాల్పడ్డాడు. ఈ ఆకస్మిక దాడితో అప్రమత్తమైన సీక్రెట్ సర్వీస్ అధికారులు వెంటనే ఎదురుకాల్పులు జరిపారు. ఈ కాల్పుల్లో దుండగుడు అక్కడికక్కడే మృతి చెందినట్లు అధికారులు వెల్లడించారు.
వివరాలు
సాధారణ పౌరుడికి గాయాలు
అయితే పరస్పర కాల్పుల సమయంలో అక్కడ ఉన్న ఓ సాధారణ పౌరుడు ప్రమాదవశాత్తు గాయపడినట్లు సమాచారం. ఘటన సమయంలో అమెరికా అధ్యక్షుడు డొనాల్డ్ ట్రంప్ వైట్ హౌస్లోనే ఉన్నప్పటికీ, భద్రతా సిబ్బంది అప్రమత్తతతో ఆయనకు ఎలాంటి ప్రమాదం జరగలేదని వైట్ హౌస్ అధికారులు స్పష్టం చేశారు. ట్రంప్ పూర్తిగా సురక్షితంగా ఉన్నారని తెలిపారు. కాల్పుల ఘటన అనంతరం అధికారులు వెంటనే స్పందించి వైట్ హౌస్ పరిసర ప్రాంతాలను తాత్కాలికంగా లాక్డౌన్ చేశారు. పరిస్థితి అదుపులోకి వచ్చిన తర్వాత ఆంక్షలను ఎత్తివేశారు. ఈ దాడి వెనుక ఉన్న కారణాలు, ఉద్దేశాలపై ప్రస్తుతం ఫెడరల్ బ్యూరో ఆఫ్ ఇన్వెస్టిగేషన్ దర్యాప్తు ప్రారంభించింది.