Houthis: మక్కా, మదీనాలపై దాడులు చేయలేదు.. సౌదీ చమురు కేంద్రాలే మా లక్ష్యం: హౌతీలు
ఈ వార్తాకథనం ఏంటి
మక్కా, మదీనా వంటి ఇస్లాం పవిత్ర నగరాలపై దాడులు చేశామన్న వార్తలను యెమెన్‌కు చెందిన ఇరాన్ మద్దతుగల హౌతీ తిరుగుబాటుదారులు ఖండించారు. సౌదీ అరేబియాలోని విమానాశ్రయాలు,చమురు శుద్ధి కర్మాగారాలు,సైనిక స్థావరాలే తమ లక్ష్యమని స్పష్టం చేశారు. మరోవైపు, మక్కా,మదీనా వైపు వచ్చిన బాలిస్టిక్ క్షిపణులను అడ్డుకున్నామని సౌదీ అరేబియా ప్రకటించింది. ఈ క్రమంలో క్షిపణుల శకలాలు పలుప్రాంతాల్లో పడినట్లు వెల్లడించింది. శనివారం సౌదీ రక్షణదళాలు రెండు బాలిస్టిక్ క్షిపణులను గాల్లోనే అడ్డుకుని ధ్వంసం చేశాయి. మక్కా సమీపంతో పాటు జెడ్డా,తాయిఫ్,రబీఘ్ ప్రాంతాల్లో వాటి శకలాలు పడినట్లు సౌదీ సివిల్ డిఫెన్స్ విభాగం తెలిపింది. యన్బు,తాయిఫ్ ప్రాంతాలను లక్ష్యంగా చేసుకుని ప్రయోగించిన రెండు క్షిపణులను నిర్వీర్యం చేసినట్లు సౌదీ నేతృత్వంలోని సంకీర్ణ దళాలు పేర్కొన్నాయి.
వివరాలు
రియాద్, దమ్మామ్ విమానాశ్రయాలపై దాడులు చేశామని తెలిపిన హౌతీలు
అయితే,ఈ దాడులపై హౌతీ సైనిక ప్రతినిధి యహ్యా సరీ మరో విధంగా స్పందించారు.
రియాద్‌లోని కింగ్ ఖాలిద్ అంతర్జాతీయ విమానాశ్రయం,యన్బులోని అరామ్‌కో చమురు కేంద్రం, రబీఘ్ ఆయిల్ రిఫైనరీతో పాటు పలు చమురు పంపింగ్ స్టేషన్లను లక్ష్యంగా చేసుకుని దాడులు చేసినట్లు వెల్లడించారు.
దమ్మామ్‌లోని కింగ్ ఫహద్ విమానాశ్రయం,నజ్రాన్ విమానాశ్రయంపైనా దాడులు జరిపినట్లు తెలిపారు.
అయితే, ఈ దాడులు నిర్దేశించిన లక్ష్యాలను చేరుకున్నాయా లేదా అనే విషయంపై సౌదీ అధికారులు ఎలాంటి స్పష్టత ఇవ్వలేదు.
యెమెన్‌లోని దక్షిణ ప్రాంతాలకు కూడా ఈ ఘర్షణలు విస్తరించాయి.
అంతర్జాతీయ గుర్తింపు పొందిన యెమెన్ ప్రభుత్వ నియంత్రణలో ఉన్న ఏడెన్ నగరంలోని కోస్ట్ గార్డ్ ప్రధాన కార్యాలయంపై మూడు బాలిస్టిక్ క్షిపణులతో దాడి చేసినట్లు హౌతీలు ప్రకటించారు.
వివరాలు
హౌతీల ఆధీనంలో యెమెన్ రాజధాని సనాతో పాటు ఉత్తర ప్రాంతంలోని అధిక భాగం
అక్కడ సౌదీ అధికారులు ఉన్న సైనిక శిబిరాలను లక్ష్యంగా చేసుకున్నట్లు పేర్కొన్నారు.
2022లో ఐక్యరాజ్యసమితి మధ్యవర్తిత్వంతో కుదిరిన కాల్పుల విరమణ ఒప్పందం తాజా దాడులతో మరింత బలహీనపడింది.
యెమెన్‌లో అంతర్జాతీయ గుర్తింపు పొందిన ప్రభుత్వానికి సౌదీ నేతృత్వంలోని సంకీర్ణ దళాలు మద్దతు ఇస్తున్నాయి.
మరోవైపు, యెమెన్ రాజధాని సనాతో పాటు ఉత్తర ప్రాంతంలోని అధిక భాగం హౌతీల ఆధీనంలో ఉంది.
ఈ నేపథ్యంలో మక్కా, మదీనా వంటి పవిత్ర నగరాలను లక్ష్యంగా చేసుకుని దాడులు చేశామన్న ప్రచారంలో వాస్తవం లేదని హౌతీలు మరోసారి స్పష్టం చేశారు.