Iran War Cost 132 Billion Dollars : ట్రంప్‌కు భారీ షాక్..ఇరాన్ ఉద్రిక్తతలతో అమెరికాకు 132 బిలియన్ డాలర్ల నష్టం

వ్రాసిన వారు Jayachandra Akuri

Jun 21, 2026

01:45 pm

ఈ వార్తాకథనం ఏంటి

మధ్యప్రాచ్యంలో అమెరికా-ఇరాన్ మధ్య కొన్ని వారాలపాటు కొనసాగిన ఉద్రిక్తతలు అమెరికా ఆర్థిక వ్యవస్థపై తీవ్ర ప్రభావం చూపినట్లు తెలుస్తోంది. ఇరాన్‌తో దాదాపు 107 రోజుల పాటు కొనసాగిన యుద్ధం అమెరికా ప్రజలపై భారీ ఆర్థిక భారాన్ని మోపిందని ప్రముఖ మీడియా సంస్థ 'ది న్యూయార్క్ టైమ్స్' వెల్లడించింది. ఈ ఘర్షణల కారణంగా అమెరికాకు మొత్తం 132 బిలియన్ డాలర్ల (భారత కరెన్సీలో సుమారు రూ.11 లక్షల కోట్లకు పైగా) నష్టం వాటిల్లినట్లు అంచనా వేస్తున్నారు. ఈ నష్టంలో కేవలం సైనిక వ్యయాలు మాత్రమే కాకుండా ఇంధన ధరల పెరుగుదల, ముడి పదార్థాల ఖర్చులు, వడ్డీ రేట్ల పెరుగుదల వంటి పరోక్ష ఆర్థిక ప్రభావాలు కూడా ఉన్నాయని నివేదిక పేర్కొంది.

వివరాలు

పెట్రోల్, డీజిల్ కొనుగోళ్లపై అదనంగా 60 బిలియన్ డాలర్లు ఖర్చు

యుద్ధం కారణంగా అమెరికా వినియోగదారులు పెట్రోల్, డీజిల్ కొనుగోళ్లపై అదనంగా 60 బిలియన్ డాలర్లు ఖర్చు చేసినట్లు వెల్లడించింది. ఇరాన్‌తో ఘర్షణలకు ముందు పరిస్థితులతో పోలిస్తే, ఉద్రిక్తతల అనంతరం ప్రతి అమెరికన్ కుటుంబంపై సగటున 460 డాలర్ల అదనపు భారం పడినట్లు నివేదిక తెలిపింది. ఇరాన్ దాడుల ప్రభావంతో వాణిజ్య నౌకల రాకపోకలకు అంతరాయం ఏర్పడిందని పేర్కొంది. ప్రపంచ చమురు సరఫరాలో కీలకమైన హర్మూజ్ జలసంధి మూతపడటంతో అమెరికాలో పెట్రోల్ ధరలు గణనీయంగా పెరిగాయి. ఉద్రిక్తతలకు ముందు గ్యాలన్ పెట్రోల్ ధర 2.98 డాలర్లుగా ఉండగా, యుద్ధానంతరం అది దాదాపు 4 డాలర్లకు చేరుకుందని నివేదిక వెల్లడించింది. చమురు ధరల పెరుగుదలతో రవాణా వ్యయాలు కూడా భారీగా పెరిగాయి.

వివరాలు

వార్షిక ప్రాతిపదికన 4.2 శాతం పెంపు

ముడి పదార్థాలు, తయారీ ఉత్పత్తుల రవాణా ఖర్చులు పెరగడంతో వస్తువుల ధరలు కూడా పెరిగినట్లు పేర్కొంది. అమెరికా కార్మిక గణాంకాల బ్యూరో (BLS) గణాంకాల ప్రకారం, గత నెలలో వినియోగదారుల ధరల సూచీ (CPI) నెలవారీగా 0.5 శాతం, వార్షిక ప్రాతిపదికన 4.2 శాతం పెరిగింది. ఇంధన ధరలు ఒక్క నెలలోనే 3.9 శాతం పెరగడంతో మొత్తం ద్రవ్యోల్బణ పెరుగుదలలో 60 శాతానికి పైగా వాటా కల్పించాయి. అదే సమయంలో ఆహార ధరలు కూడా వార్షికంగా 3.1 శాతం పెరిగాయి. అమెరికా రక్షణ శాఖ గత నెల ప్రతినిధుల సభకు సమర్పించిన నివేదిక ప్రకారం, ఇరాన్ యుద్ధానికి సంబంధించిన ప్రత్యక్ష సైనిక వ్యయం 29 బిలియన్ డాలర్లుగా నమోదైంది.

వివరాలు

అమెరికా సైనిక స్థావరాల మరమ్మతు ఖర్చులు ఈ లెక్కల్లో చేర్చలేదు

అయితే ఇరాన్ దాడుల వల్ల దెబ్బతిన్న అమెరికా సైనిక స్థావరాల మరమ్మతు ఖర్చులు ఈ లెక్కల్లో చేర్చలేదని వెల్లడైంది. మధ్యప్రాచ్యంలో అమెరికా విమాన వాహక నౌకల మోహరింపు, సైనిక సిబ్బంది నిర్వహణ, ఆయుధాల వినియోగం వంటి అంశాలపై భవిష్యత్తులో మరింత ఖర్చు అయ్యే అవకాశం ఉందని నిపుణులు హెచ్చరిస్తున్నారు. దీంతో అమెరికాపై ఆర్థిక భారం మరింత పెరిగే అవకాశాలు కనిపిస్తున్నాయి.