Netanyahu: నన్ను అరెస్ట్ చేస్తే.. ఇజ్రాయెల్ స్పెషల్ ఫోర్స్ రంగంలోకి: నెతన్యాహు
ఈ వార్తాకథనం ఏంటి
ఇజ్రాయెల్ ప్రధాని బెంజమిన్ నెతన్యాహుపై అంతర్జాతీయ క్రిమినల్ కోర్టు (ICC) జారీ చేసిన అరెస్టు వారంట్ నేపథ్యంలో అమెరికా పర్యటనకు ముందే వివాదం చెలరేగింది. న్యూయార్క్ నగర మేయర్ జోహ్రాన్ మమ్దానీ చేసిన వ్యాఖ్యలకు నెతన్యాహు ఘాటుగా స్పందిస్తూ.. తనను ఎవరైనా అరెస్ట్ చేయడానికి ప్రయత్నిస్తే ఇజ్రాయెల్ ప్రత్యేక దళాలు రంగంలోకి దిగుతాయని హెచ్చరించారు. అలాగే ఐక్యరాజ్యసమితి సర్వసభ్య సమావేశంలో పాల్గొనేందుకు తాను తప్పకుండా న్యూయార్క్కు వస్తానని స్పష్టం చేశారు. మమ్దానీ వ్యాఖ్యలు యూదులపై విద్వేషాన్ని రెచ్చగొట్టే ఉద్దేశంతో చేసినవేనని నెతన్యాహు ఆరోపించారు. అంతర్జాతీయ క్రిమినల్ కోర్టును అవినీతిమయమైన సంస్థగా అభివర్ణిస్తూ, తనపై జారీ చేసిన అరెస్టు వారంట్ పూర్తిగా నకిలీదని కొట్టిపారేశారు.
వివరాలు
ఇటీవల కీలక వ్యాఖ్యలు చేసిన నెతన్యాహు
భవిష్యత్తులో ఇజ్రాయెల్ రాజకీయ నాయకులు, సైనికాధికారులపై కూడా ఇలాంటి కేసులు పెట్టే ప్రయత్నాలు జరుగుతాయని విమర్శించారు.
త్వరలో అమెరికా పర్యటనకు వెళ్లనున్న నెతన్యాహుపై ఇటీవల న్యూయార్క్ మేయర్ జోహ్రాన్ మమ్దానీ తీవ్ర వ్యాఖ్యలు చేశారు.
గాజా, లెబనాన్లపై కొనసాగుతున్న సైనిక చర్యల నేపథ్యంలో నెతన్యాహును యుద్ధ నేరస్థుడిగా అభివర్ణించిన ఆయన.. పాలస్తీనియన్లను పూర్తిగా నిర్మూలించాలనే ఉద్దేశంతో ఇజ్రాయెల్ దాడులు కొనసాగిస్తోందని ఆరోపించారు.
అయితే, ఓ దేశ ప్రధాని హోదాలో ఉన్న నెతన్యాహును అరెస్టు చేసే చట్టపరమైన అధికారం న్యూయార్క్ నగర అధికారులకు లేదని కూడా స్పష్టం చేశారు.
అయినప్పటికీ, నెతన్యాహు అమెరికా పర్యటనకు వచ్చినప్పుడు ఆయనను అరెస్టు చేయాలని ట్రంప్ ప్రభుత్వాన్ని మమ్దానీ కోరారు.
వివరాలు
ఐసీసీ వారంట్ ఎందుకు?
దీనిపై స్పందించిన అమెరికా అధ్యక్షుడు డొనాల్డ్ ట్రంప్.. నెతన్యాహును అరెస్టు చేసే ఉద్దేశం తమకు లేదని స్పష్టంచేశారు.
గాజా యుద్ధం నేపథ్యంలో ఇజ్రాయెల్ ప్రధాని బెంజమిన్ నెతన్యాహు, మాజీ రక్షణ మంత్రి యోవ్ గాలంట్పై 2024 నవంబరులో అంతర్జాతీయ క్రిమినల్ కోర్టు (ICC) అరెస్టు వారంట్ జారీ చేసింది.
దీంతో ఐసీసీ సభ్యదేశాల్లోకి వీరు ప్రవేశిస్తే, వారిని అరెస్టు చేసే అవకాశం ఉండటంతో ఈ అంశం అంతర్జాతీయంగా ప్రాధాన్యం సంతరించుకుంది.