Iran-US Talks: అమెరికాతో చర్చలు నిలిపివేసిన ఇరాన్.. వచ్చే వారంలో ఒప్పందం కుదురుతుందన్న ట్రంప్
ఈ వార్తాకథనం ఏంటి
లెబనాన్లో ఇజ్రాయెల్ సైనిక చర్యలకు నిరసనగా అమెరికాతో జరుగుతున్న చర్చలను ఇరాన్ తాత్కాలికంగా నిలిపివేసింది. ఈ విషయాన్ని ఇరాన్కు చెందిన సెమీ అధికారిక వార్తా సంస్థ టస్నీమ్ వెల్లడించింది. మధ్యవర్తుల ద్వారా జరుగుతున్న చర్చలు, పత్రాల మార్పిడిని కూడా నిలిపివేస్తున్నట్లు ఇరాన్ చర్చల బృందం నిర్ణయించినట్లు పేర్కొంది. గత మూడు నెలలుగా కొనసాగుతున్న ఘర్షణల్లో ప్రధానంగా ఇరాన్, లెబనాన్లలో వేలాది మంది ప్రాణాలు కోల్పోయిన నేపథ్యంలో ఈ పరిణామం చోటుచేసుకుంది.
వివరాలు
అమెరికాతో చర్చలను నిలిపివేస్తామని హెచ్చరించిన ఇరాన్
ఇరాన్ పార్లమెంట్ స్పీకర్ మహమ్మద్ బాఘర్ ఘాలిబాఫ్ మాట్లాడుతూ, ఇజ్రాయెల్ దాడులు కొనసాగితే ఇరాన్ మరింత కఠిన నిర్ణయాలు తీసుకునే అవకాశం ఉందని హెచ్చరించారు. ప్రస్తుతం చర్చలను నిలిపివేయడమే కాకుండా అవసరమైతే జియోనిస్ట్ ప్రభుత్వానికి వ్యతిరేకంగా నేరుగా నిలబడతామని ఆయన అన్నారు. భవిష్యత్తులో ఏదైనా ఒప్పందం కుదిరితే అన్ని ప్రాంతాల్లో, ముఖ్యంగా లెబనాన్లో దాడులు పూర్తిగా నిలిపివేయడం అందులో భాగమవుతుందని స్పష్టం చేశారు. మరోవైపు, ఇరాన్ విదేశాంగ శాఖ కూడా కాల్పుల విరమణ ఒప్పంద ఉల్లంఘనలకు అమెరికానే బాధ్యత వహించాలని ఆరోపించింది.
వివరాలు
ఇజ్రాయెల్-హిజ్బుల్లా కాల్పుల విరమణ కుదిరింది: ట్రంప్
ఇదిలా ఉండగా, అమెరికా అధ్యక్షుడు డొనాల్డ్ ట్రంప్ ఇజ్రాయెల్ ప్రధాని బెంజమిన్ నెతన్యాహూతో పాటు హెజ్బొల్లా ప్రతినిధులతో కూడా మాట్లాడినట్లు తెలిపారు. ఇరుపక్షాలు పరస్పర దాడులు ఆపేందుకు అంగీకరించాయని, బీరూట్కు ఎలాంటి సైన్యాన్ని పంపబోమని నిర్ణయించుకున్నట్లు తెలిపారు. వాషింగ్టన్లోని లెబనాన్ రాయబార కార్యాలయం కూడా అమెరికా ప్రతిపాదించిన పరస్పర కాల్పుల విరమణ ప్రతిపాదనను హెజ్బొల్లా అంగీకరించినట్లు వెల్లడించింది. దీనిలో భాగంగా బీరూట్ దక్షిణ శివారు ప్రాంతాలపై ఇజ్రాయెల్ దాడులు నిలిపివేయగా, హెజ్బొల్లా కూడా ఇజ్రాయెల్పై దాడులు చేయకుండా ఉండేందుకు ఒప్పుకున్నట్లు తెలిపింది.
వివరాలు
చర్చలు సానుకూలంగా ఉన్నాయన్నట్రంప్
ఏబీసీ న్యూస్కు ఇచ్చిన ఇంటర్వ్యూలో ట్రంప్ చర్చలు సానుకూల దిశగా సాగుతున్నాయని పేర్కొన్నారు. ప్రస్తుతం అమల్లో ఉన్న తాత్కాలిక కాల్పుల విరమణను పొడిగించడం, అలాగే ప్రపంచ చమురు రవాణాకు అత్యంత కీలకమైన హోర్ముజ్ జలసంధిని మళ్లీ పూర్తిగా తెరవడం వంటి అంశాలపై వచ్చే వారంలో ఇరాన్తో ఒప్పందం కుదిరే అవకాశాలు ఉన్నాయని ఆశాభావం వ్యక్తం చేశారు. ఈ రోజు కొంత ఆటంకం ఎదురైనప్పటికీ దాన్ని త్వరగా పరిష్కరించినట్లు ట్రంప్ తెలిపారు. లెబనాన్పై ఇజ్రాయెల్ దాడుల కారణంగా ఇరాన్ అసంతృప్తి వ్యక్తం చేయడమే ఆ ఆటంకానికి కారణమని ఆయన వివరించారు.
వివరాలు
హోర్ముజ్ జలసంధిని పూర్తిగా మూసివేసే ఆలోచనలో టెహ్రాన్
ఇక టస్నీమ్ కథనం ప్రకారం, ప్రపంచ చమురు సరఫరాలో కీలక పాత్ర పోషించే హోర్ముజ్ జలసంధిని పూర్తిగా మూసివేసే అంశాన్ని టెహ్రాన్ పరిశీలిస్తోంది. ఇరాన్ ఖుద్స్ ఫోర్స్ అధిపతి ఇస్మాయిల్ ఖానీ మాట్లాడుతూ, ఇజ్రాయెల్ సైనిక చర్యలు కొనసాగితే బాబ్ ఎల్-మందెబ్ జలసంధిలో కూడా రవాణాకు అంతరాయం కలిగే పరిస్థితులు తలెత్తవచ్చని హెచ్చరించారు. అవసరమైతే ఇతర ప్రాంతాలను కూడా క్రియాశీలం చేసి, బాబ్ ఎల్-మందెబ్లో పరిస్థితిని హోర్ముజ్ జలసంధి తరహాలోకి తీసుకెళ్తామని పేర్కొన్నారు. ఈ వార్తల ప్రభావంతో అంతర్జాతీయ మార్కెట్లో ముడి చమురు ధరలు బ్యారెల్కు 6 డాలర్లకు పైగా పెరిగినట్లు సమాచారం.