Trump: ట్రంప్కు అసలు నిజం తెలియదా? అమెరికా ఆయుధ నిల్వలపై కొత్త అనుమానాలు
ఈ వార్తాకథనం ఏంటి
ఇరాన్తో ఉద్రిక్తతలు మరింత పెరిగే సూచనలు కనిపిస్తున్న నేపథ్యంలో,అమెరికా సైనిక సామర్థ్యంపై అధికారులు,రక్షణ నిపుణులు ఆందోళన వ్యక్తం చేస్తున్నారు. ముఖ్యంగా, దీర్ఘకాలం యుద్ధాన్ని కొనసాగించేందుకు అవసరమైన కీలక ఆయుధ నిల్వలు అమెరికా వద్ద ఉన్నాయా అనే అంశంపై అధికారులు,రక్షణ నిపుణులు సందేహాలు వ్యక్తం చేస్తున్నారు. అంతేకాదు, పెంటగాన్ వద్ద ఉన్న వాస్తవ పరిస్థితి గురించి వైట్ హౌస్కు,ముఖ్యంగా అధ్యక్షుడు డొనాల్డ్ ట్రంప్కు పూర్తి సమాచారం అందడం లేదన్న వార్తలు కూడా వెలువడుతున్నాయి. మంగళవారం లెబనాన్ అధ్యక్షుడు జోసెఫ్ అవూన్తో వైట్ హౌస్లో సమావేశమైన సందర్భంగా అధ్యక్షుడు డొనాల్డ్ ట్రంప్ మాట్లాడుతూ,ఇరాన్ విషయంలో అమెరికా సైనిక లక్ష్యాలు ఇంకా పూర్తికాలేదని సంకేతాలు ఇచ్చారు. దీంతో ఇరాన్పై మరిన్ని సైనిక చర్యలు ఉండొచ్చనే చర్చ మొదలైంది.
వివరాలు
అమెరికా సైన్యం వద్ద తగ్గుతున్న కీలక క్షిపణులు ఇతర ఆయుధాల నిల్వలు
అయితే, ది వాషింగ్టన్ పోస్ట్ కథనం ప్రకారం, ఇరాన్కు సంబంధించిన సైనిక చర్యల్లో పాల్గొంటున్న ఓ అమెరికా అధికారి కీలక విషయాలను వెల్లడించారు.
ప్రస్తుతం అమెరికా సైన్యం వద్ద కీలక క్షిపణులు, ఇతర ఆయుధాల నిల్వలు వేగంగా తగ్గుతున్నాయని, యుద్ధం మరింత తీవ్రరూపం దాల్చితే దాన్ని ఎక్కువకాలం కొనసాగించడం కష్టమవుతుందని ఆయన హెచ్చరించారు.
"అమెరికా మరింత విస్తృత యుద్ధానికి సిద్ధమవుతోంది. కానీ ఆ స్థాయిలో సైనిక చర్యలను సురక్షితంగా కొనసాగించేందుకు అవసరమైన ఆయుధాలు ప్రస్తుతం లేవు. ఈ వాస్తవ పరిస్థితి గురించి వైట్ హౌస్కు పూర్తిగా తెలియదని నేను భావిస్తున్నాను" అని ఆ అధికారి పేర్కొన్నట్లు కథనంలో వెల్లడైంది.
వివరాలు
ట్రంప్ ప్రభుత్వం తెహ్రాన్పై మరిన్ని చర్యలు తీసుకునే అవకాశం
విమాన దాడులను అడ్డుకునే ఎయిర్ డిఫెన్స్ ఇంటర్సెప్టర్ క్షిపణులు, దూర లక్ష్యాలను కచ్చితంగా ఛేదించే ప్రెసిషన్ గైడెడ్ మ్యూనిషన్స్ నిల్వలు తగ్గిపోతున్నాయని ఆయన తెలిపారు.
అలాగే, ఇటీవల జరిగిన సైనిక చర్యల కారణంగా దెబ్బతిన్న యుద్ధ సామగ్రిని భర్తీ చేయడం, అదనపు సైనికులు, యుద్ధ విమానాలు, ఇతర పరికరాలను తక్షణమే మోహరించే సామర్థ్యం కూడా పరిమితంగానే ఉందని చెప్పారు.
ఇవన్నీ భవిష్యత్తులో ఇరాన్పై చేపట్టే సైనిక చర్యలకు అడ్డంకిగా మారే అవకాశం ఉందని హెచ్చరించారు.
ఇదే సమయంలో, ట్రంప్ ప్రభుత్వం అవసరమైతే తెహ్రాన్పై మరిన్ని చర్యలు తీసుకునే అవకాశాన్ని కొట్టిపారేయడం లేదు.
గత కొన్ని వారాలుగా ప్రాంతంలో కొనసాగుతున్న సైనిక ఉద్రిక్తతల నేపథ్యంలో అమెరికా వైఖరి మరింత కఠినంగా మారినట్లు సంకేతాలు కనిపిస్తున్నాయి.
వివరాలు
అంతర్గత వ్యవహారాలపైనా ఆందోళనలు
రక్షణ విశ్లేషకులు కూడా ఇదే తరహా ఆందోళనలు వ్యక్తం చేస్తున్నారు.
సెంటర్ ఫర్ స్ట్రాటజిక్ అండ్ ఇంటర్నేషనల్ స్టడీస్ (CSIS)లో రక్షణ,భద్రతా కార్యక్రమాల అధిపతి సేథ్ జోన్స్ మాట్లాడుతూ, పరిస్థితులు మరింత ఉద్రిక్తమైనా అమెరికా భూసేనలను రంగంలోకి దింపడం సరైన నిర్ణయం కాదన్నారు.
సముద్ర జలసంధిలోని దీవులు లేదా భూభాగాల్లో అమెరికా భూసేనలను మోహరించడం పెద్ద తప్పిదమవుతుందని ఆయన అభిప్రాయపడ్డారు.
అవసరమైతే అమెరికా భూసేనలను మోహరించే అవకాశాన్ని ట్రంప్ పూర్తిగా ఖండించలేదు.
మరోవైపు,ది టెలిగ్రాఫ్ వెల్లడించిన మరో కథనం ప్రకారం,పెంటగాన్లో కేవలం క్షిపణుల కొరత మాత్రమే కాకుండా అంతర్గత వ్యవహారాలపైనా ఆందోళనలు నెలకొన్నాయి.
వివరాలు
వాస్తవ పరిస్థితులను ఉన్నతాధికారుల దృష్టికి తీసుకెళ్లేందుకు వెనుకంజ
రక్షణ శాఖలో అధికారులు స్వేచ్ఛగా తమ అభిప్రాయాలను వెల్లడించలేని పరిస్థితి నెలకొన్నట్లు ఆ కథనం పేర్కొంది.
ప్రతికూల నివేదికలు లేదా వాస్తవ పరిస్థితులను ఉన్నతాధికారుల దృష్టికి తీసుకెళ్లేందుకు కొందరు అధికారులు వెనుకంజ వేస్తున్నట్లు వెల్లడించింది.
రక్షణ మంత్రి పీట్ హెగ్సెత్ సీనియర్ సైనిక అధికారులను పక్కన పెడతారనే అభిప్రాయం కారణంగా కొందరు అధికారులు వాస్తవ పరిస్థితిని వెల్లడించేందుకు సంకోచిస్తున్నట్లు సమాచారం.
అయితే, ఈ కథనాలపై ఇప్పటివరకు వైట్ హౌస్ గానీ,పెంటగాన్ గానీ అధికారికంగా స్పందించలేదు.
ఇరాన్తో దీర్ఘకాల సైనిక ఘర్షణ తలెత్తితే అమెరికా ఆయుధ నిల్వలు,సైనిక వనరులు, కార్యాచరణ సామర్థ్యంపై తీవ్ర ఒత్తిడి పడే అవకాశం ఉందని అధికారులు, రక్షణ విశ్లేషకులు హెచ్చరిస్తున్నారు.
దీంతో అమెరికా యుద్ధ సన్నద్ధతపై కొత్త చర్చ మొదలైంది.