France Riots: ఫ్రాన్స్‌ అల్లర్లు, భారత్‌ నిరసనల లింక్‌ ఇదేనా? 9 దేశాల్లో 101 సంస్థలపై నివేదిక!
ఈ వార్తాకథనం ఏంటి
ఫ్రాన్స్‌లో జరిగిన అల్లర్లు, భారత్‌లో చీఫ్‌ ఎలక్షన్‌ కమిషనర్‌ (CEC) జ్ఞానేశ్‌ కుమార్‌ రాజీనామాను కోరుతూ జరుగుతున్న నిరసనల మధ్య సంబంధాలు ఉన్నాయని ఫాక్స్‌ న్యూస్‌ (Fox News) ప్రచురించిన ఓ దర్యాప్తు నివేదిక ఆరోపించింది. మొత్తం 9 దేశాల్లోని 101 సంస్థలు పరస్పరం అనుసంధానమై ఉన్నాయని, నిరసనలకు మద్దతు ఇవ్వడం, వాటిని నిర్వహించడం, ప్రచారం చేయడంలో ఈ సంస్థలు భాగస్వాములవుతున్నాయని పేర్కొంది. సీనియర్‌ ఎడిటర్‌ అస్రా నోమానీ రూపొందించిన 'గ్లోబల్‌ ఖయాస్‌ ఇంక్‌ గ్రోస్‌ టు 101 గ్రూప్స్‌' (Global Chaos Inc Grows to 101 Groups) అనే నివేదికలో ఈ వ్యవస్థను 'రెడ్‌-గ్రీన్‌ ప్రొటెస్ట్‌ ఎకోసిస్టమ్‌'గా అభివర్ణించారు.
వివరాలు
కొన్ని సమూహాల మధ్య సంబంధాలున్నాయి
కమ్యూనిస్టు, ఇస్లామిస్ట్‌ సంస్థలుగా నివేదిక పేర్కొన్న కొన్ని సమూహాల మధ్య సంబంధాలు ఉన్నాయని ఆరోపించారు.
కార్మిక సంఘాలు, విద్యార్థి సంఘాలు, ప్రచార నెట్‌వర్క్‌లు, మీడియా సంస్థలు సైతం ఈ వ్యవస్థలో భాగస్వాములుగా ఉన్నాయని నివేదిక తెలిపింది.
ఈ నెట్‌వర్క్‌ ఫ్రాన్స్‌కే పరిమితం కాలేదని, అమెరికా, బ్రిటన్‌, గ్రీస్‌, బ్రెజిల్‌, భారత్‌ సహా పలు దేశాలకు విస్తరించిందని నివేదిక పేర్కొంది.
ఆయా దేశాల్లోని సంస్థలు మద్దతుదారులను సమీకరించడం, నిరసనలకు పిలుపునివ్వడం, అంతర్జాతీయ మీడియా సంస్థల ద్వారా ప్రచారాన్ని విస్తృతం చేయడం వంటి కార్యకలాపాల్లో పాల్గొంటున్నాయని ఆరోపించింది.
వివరాలు
'పీపుల్స్‌ ఫోరమ్‌'తో భాగస్వామ్యం ఉంది
ఈ నివేదికలో ఫ్రాన్స్‌ కేంద్రంగా పనిచేస్తున్న 'ఇండియన్‌ అలయన్స్‌ పారిస్‌' (IAP) సంస్థను ప్రత్యేకంగా ప్రస్తావించారు.
ఫ్రాన్స్‌, భారత్‌లో జరుగుతున్న నిరసనలకు సంబంధించిన సందేశాలను అనుసంధానించడంలో ఈ సంస్థ కీలక పాత్ర పోషిస్తోందని నివేదిక ఆరోపించింది.
న్యూయార్క్‌లోని 'పీపుల్స్‌ ఫోరమ్‌'తోనూ దీనికి భాగస్వామ్యం ఉందని పేర్కొంది. అంతర్జాతీయ సంస్థ 'ప్రోగ్రెసివ్‌ ఇంటర్నేషనల్‌' (PI) అక్టోబర్‌ 16న తన వెబ్‌సైట్‌లో ప్రచురించిన ఓ బ్రీఫింగ్‌లో ఫ్రాన్స్‌, స్పెయిన్‌, భారత్‌, అల్బేనియాలో జరుగుతున్న నిరసనలను ఒకే సందర్భంలో ప్రస్తావించినట్లు నివేదిక వెల్లడించింది.
వివిధ దేశాల్లో చోటుచేసుకుంటున్న నిరసనల మధ్య సంబంధాలను ఈ విధంగా చూపించే ప్రయత్నం జరిగిందని పేర్కొంది.
వివరాలు
విదేశీ నిధుల ఆరోపణలు.. నెవిల్‌ రాయ్‌ సింగమ్‌ పేరు
యూరప్‌లో జరుగుతున్న నిరసనలకు కమ్యూనిస్టు భావజాలంతో సంబంధాలున్న సంస్థలు మద్దతు ఇస్తూ ప్రచారం చేస్తున్నాయని అస్రా నోమానీ నివేదిక ఆరోపించింది.
'బ్రేక్‌త్రూ న్యూస్‌', 'కోడ్‌పింక్‌', 'పార్టీ ఫర్‌ సోషలిజం అండ్‌ లిబరేషన్‌' వంటి సంస్థలను ప్రస్తావించింది. చైనాలో నివసిస్తున్న అమెరికాలో జన్మించిన టెక్నాలజీ వ్యాపారవేత్త నెవిల్‌ రాయ్‌ సింగమ్‌ ఈ సంస్థలకు నిధులు లేదా ఇతర రూపాల్లో మద్దతు అందిస్తున్నారని నివేదిక పేర్కొంది.
ఇవి నివేదికలో చేసిన ఆరోపణలేనని గమనించాలి. సింగమ్‌ భార్య, కోడ్‌పింక్‌ వ్యవస్థాపకురాలు జోడీ ఇవాన్స్‌ అక్టోబర్‌ 14న ప్రచురితమైన బ్రేక్‌త్రూ న్యూస్‌ ఇంటర్వ్యూలో ఫ్రాన్స్‌, స్పెయిన్‌, భారత్‌లో జరుగుతున్న నిరసనల గురించి ప్రస్తావించినట్లు కథనం తెలిపింది.
ప్రజలు వీధుల్లోకి వచ్చి నిరసనల్లో పాల్గొనాలని ఆమె పిలుపునిచ్చినట్లు నివేదిక పేర్కొంది.