India Poland: పోలెండ్‌ ప్రధానితో మోదీ కీలక భేటి...ఉక్రెయిన్‌, ఇరాన్‌లో శాంతికి మద్దతు
ఈ వార్తాకథనం ఏంటి
ఉక్రెయిన్‌, ఇరాన్‌లో కొనసాగుతున్న యుద్ధాలకు శాంతియుత పరిష్కారం లభించాలన్న భారత్‌ ఆకాంక్షను ప్రధానమంత్రి నరేంద్ర మోదీ మరోసారి స్పష్టం చేశారు. పోలాండ్‌ ప్రధాని డొనాల్డ్‌ టస్క్‌తో గురువారం జరిగిన సమావేశంలో ఈ అంశంపై చర్చించారు. అదే సమయంలో భారత్‌-పోలాండ్‌ వ్యూహాత్మక భాగస్వామ్యాన్ని మరింత బలోపేతం చేసుకోవాలని నిర్ణయించారు. 2030 నాటికి ఇరు దేశాల మధ్య ద్వైపాక్షిక వాణిజ్యాన్ని రెట్టింపు చేయడమే లక్ష్యంగా పెట్టుకున్నట్లు మోదీ ప్రకటించారు.
Details
రక్షణ, అంతరిక్ష రంగాలపై ప్రత్యేక దృష్టి
మోదీ, టస్క్‌ భేటీలో రక్షణ, అణుశక్తి, అంతరిక్ష రంగాల్లో సహకారం ప్రధానంగా ప్రస్తావనకు వచ్చింది.
ఈ రంగాల్లో భారతీయ సంస్థలతో కలిసి పరిశోధన, అభివృద్ధి చేపట్టడంతో పాటు ఉమ్మడిగా ఉత్పత్తులు తయారు చేసేందుకు పోలాండ్‌ కంపెనీలను భారత్‌ ఆహ్వానించింది.
కీలక ఖనిజాల రంగంలోనూ భాగస్వామ్యాన్ని పెంచుకోవాలని సూచించింది. వాణిజ్యం, పెట్టుబడులతో పాటు కొత్త సాంకేతిక పరిజ్ఞానం, పునరుత్పాదక ఇంధనం, విద్య రంగాల్లోనూ సహకారానికి ఇరు దేశాలు ప్రాధాన్యం ఇస్తున్నాయి.
Details
బెంగళూరులో వ్యాపార సమావేశాలు
మూడు రోజుల పర్యటన కోసం బుధవారం భారత్‌కు వచ్చిన టస్క్‌.. ఢిల్లీలో చర్చల అనంతరం బెంగళూరులో ఐటీ, రక్షణ, అంతరిక్ష రంగాలకు చెందిన భారతీయ వ్యాపారవేత్తలతో సమావేశాల్లో పాల్గొననున్నారు.
ఈ పర్యటన ద్వారా ఇరు దేశాల కంపెనీలకు కొత్త పెట్టుబడి అవకాశాలు అందుబాటులోకి వచ్చే అవకాశం ఉంది.
Details
భారత్‌కు పోలాండ్‌ ఎందుకు కీలకం?
మధ్య, తూర్పు యూరప్‌లో భారత్‌కు పోలాండ్‌ అతిపెద్ద వాణిజ్య భాగస్వామి. ఆధునిక తయారీ, రక్షణ సాంకేతికత, రవాణా రంగాల్లో పోలాండ్‌ సామర్థ్యాలు భారత్‌కు ఉపయోగపడతాయి.
మరోవైపు, భారత్‌లో పెరుగుతున్న మధ్యతరగతి, విస్తృత మార్కెట్‌ పోలాండ్‌ కంపెనీలకు అవకాశాలను అందిస్తున్నాయి.
భారత్‌-యూరోపియన్‌ యూనియన్‌ వాణిజ్య ఒప్పందం నేపథ్యంలో యూరప్‌తో ఆర్థిక సంబంధాలను విస్తరించేందుకు భారత్‌ ప్రయత్నిస్తోంది.
ఉక్రెయిన్‌ యుద్ధం తర్వాత యూరప్‌లో భద్రతా అంశాలు ప్రాధాన్యం సంతరించుకున్న నేపథ్యంలో, పోలాండ్‌తో బలమైన సంబంధాలు భారత్‌కు వ్యూహాత్మకంగానూ ఉపయోగపడనున్నాయి.