'గూఢచారి' బెలూన్ శిథిలాలను చైనాకు అప్పగించేది లేదు: అమెరికా
అమెరికా మోంటానాలోని అణు ప్రయోగ కేంద్రం గగనతలంలో ఎగురుతున్న చైనా 'గూఢచారి' బెలూన్ను శనివారం అగ్రరాజ్య బలగాలు కూల్చేశాయి. అయితే ఆ బెలూన్ శిథిలాలను తిరిగి చైనాకు అప్పగించేది లేదని తాజాగా అమెరికా ప్రకటించింది. అంతేకాదు ఈ ఘటన వల్ల అమెరికా-చైనా సంబంధాలు బలహీనపడలేదని అధ్యక్షుడు జో బైడెన్ ప్రకటించడం గమనార్హం. ఇప్పటికే సముద్ర ఉపరితలంలోని కొన్ని బెలూన్ అవశేషాలను సేకరించినట్లు అమెరికా జాతీయ భద్రతా మండలి ప్రతినిధి జాన్ కిర్బీ చెప్పారు. పరిస్థితులు అనుకూలించకపోవడం వల్ల సముద్రం గర్భంలోని ఇతర శిథిలాలను సేకరించలేదని పేర్కొన్నారు. రెండు రోజుల క్రితం మోంటానాలోని అణు ప్రయోగ కేంద్రం గగనతలంలో ఎగురుతున్న చైనా బెలూన్ను ఫైటర్ జెట్ సాయంతో అమెరికా కూల్చివేసింది.
బెలూన్ గురించి ముఖ్యమైన సమాచారాన్నిసేకరించాం: అమెరికా
కొన్ని రోజుల్లోనే సముద్రంలోని ఉన్న మిగతా భాగాలను సేకరించి పరిశీలిస్తామని జాన్ కిర్బీ వెల్లడించారు. దీనికి సంబంధించిన ప్రక్రియ ఇప్పటికే ప్రారంభించినట్లు పేర్కొన్నారు. ప్రాథమిక సమాచారం ప్రకారం ఇది నిఘా బెలూన్ అని వైట్ హౌస్ స్పష్టం చేసినట్లు కిర్బీ పేర్కొన్నారు. కూల్చివేయడానికి ముందే, బెలూన్ గురించి తగినంత ముఖ్యమైన సమాచారాన్ని సేకరించినట్లు కిర్బీ చెప్పారు. బెలూన్ దానంతట అది ప్రయాణించగల సామర్థ్యాన్ని కలిగి ఉందనేది నిజమేనని, అయితే దాని వేగాన్ని నియంత్రించడానికి అందులో ప్రొపెల్లర్లు ఉన్నట్లు కిర్బీ వివరించారు. ఆ బెలూన్ 200 అడుగుల ఎత్తు వరకు ఉంటుందని నార్తర్న్ కమాండ్ కమాండర్ జనరల్ గ్లెన్ వాన్‌హెర్క్ చెప్పారు. దీని బరువు చిన్నపాటి జెట్ విమానం అంత ఉంటుందని పేర్కొన్నారు.
