JD Vance: భారత్‌పై వ్యాఖ్యలకు పశ్చాత్తాపం.. హద్దులు దాటి మాట్లాడానన్న జేడీ వాన్స్!
ఈ వార్తాకథనం ఏంటి
అమెరికా ఉపాధ్యక్షుడు జేడీ వాన్స్ (JD Vance) భారత్‌, హెచ్‌-1బీ వీసాదారులపై గతంలో చేసిన వ్యాఖ్యలపై తాజాగా పశ్చాత్తాపం వ్యక్తం చేశారు. భారతీయ ఐటీ కంపెనీలైన కాగ్నిజెంట్, ఇన్ఫోసిస్, టాటా, విప్రో, హెచ్‌సీఎల్‌, క్యాప్‌జెమినీలను పర్మ్‌ (PERM - Permanent Labor Certification Program) నుంచి సస్పెండ్ చేసిన నేపథ్యంలో ఆయన గతంలో తీవ్ర వ్యాఖ్యలు చేశారు. అయితే తాజాగా జరిగిన ఓ సమావేశంలో స్పందిస్తూ.. భారత్‌ విషయంలో తాను హద్దులు దాటి మాట్లాడానని అంగీకరించారు. భారత్‌ విషయంలో ఆ రోజు నేను హద్దులు దాటి మాట్లాడాను. 'విదేశీ ఒప్పంద పనివాళ్లు' అనే పదాన్ని ఉపయోగించడం సరైనది కాదు.
వివరాలు
అమెరికా కంపెనీలు, వీసా వ్యవస్థపైనే నా వ్యాఖ్యలు: వాన్స్
నా ప్రసంగంలో ఏమైనా లోపాలు ఉంటే అది నా తప్పే. హెచ్‌-1బీ వీసాదారులను లక్ష్యంగా చేసుకోవాలన్నది నా ఉద్దేశం కాదు" అని వాన్స్ స్పష్టం చేశారు.
అమెరికాలోని కంపెనీలు, అక్కడి వీసా వ్యవస్థ గురించి మాట్లాడాలనే ఉద్దేశంతోనే తాను గతంలో ఆ వ్యాఖ్యలు చేసినట్లు జేడీ వాన్స్ వివరించారు.
హెచ్‌-1బీ వీసా ద్వారా విదేశీ ఉద్యోగులను అమెరికాకు తీసుకొస్తున్న కంపెనీలు.. ఆ ఉద్యోగాలు చేసేందుకు తగిన అమెరికన్‌ కార్మికులు అందుబాటులో లేరని పేర్కొంటాయని ఆయన అన్నారు.
దీంతో స్థానిక అమెరికన్లకు ఉద్యోగ అవకాశాలు దక్కకుండా పోతున్నాయని వాన్స్ అభిప్రాయపడ్డారు. అమెరికాలో తరచూ ఇలాంటి పరిస్థితులు ఎదురవుతున్నాయని పేర్కొన్నారు.
ఈ అంశాన్ని ప్రస్తావించాలనే ఉద్దేశంతోనే తాను అలా మాట్లాడాల్సి వచ్చిందని వివరణ ఇచ్చారు.
వివరాలు
నాడు విదేశీ ఉద్యోగులను ఏమని పిలిచారంటే?
గతంలో హెచ్‌-1బీ వీసాల ద్వారా నియమించుకునే విదేశీ ఉద్యోగులను జేడీ వాన్స్ 'విదేశీ ఒప్పంద పనివాళ్లు'గా అభివర్ణించారు.
ఈ వీసా కార్యక్రమాన్ని ఉపయోగించుకునే కంపెనీలను 'వీసా మిల్లులు'గా పేర్కొన్నారు. ఆయన చేసిన ఈ వ్యాఖ్యలు అప్పట్లో తీవ్ర చర్చకు దారితీశాయి.
వాన్స్ వ్యాఖ్యలపై భారత కేంద్ర విదేశాంగ శాఖ తీవ్ర అభ్యంతరం వ్యక్తం చేసింది.
నిపుణుల రాకతో భారతీయులకు అవకాశాలు లభించడమే కాకుండా, అమెరికా కంపెనీల సంపద కూడా పెరుగుతోందని పేర్కొంది.
వివరాలు
అమెరికా కంపెనీలకు భారతీయ నిపుణులు కీలకం
భారతీయ నిపుణులు అమెరికాలోని కంపెనీలకు ఎంతో కీలకమని కేంద్ర విదేశాంగ శాఖ స్పష్టం చేసింది.
అత్యాధునిక నైపుణ్యాలు కలిగిన ఉద్యోగులు ఆవిష్కరణలు, పరిశోధన, ఉత్పాదకత, పోటీతత్వం, ఉద్యోగ కల్పన వంటి రంగాల్లో కంపెనీలకు సహాయపడుతున్నారని వివరించింది.
అమెరికా కంపెనీల అభివృద్ధికి నిపుణుల వలసలు దోహదపడుతున్నాయని పేర్కొన్న విదేశాంగ శాఖ.. ఈ అంశంపై వాన్స్ చేసిన వ్యాఖ్యలు అనవసరమని అభిప్రాయపడింది.
తాజాగా తన వ్యాఖ్యలపై వాన్స్ పశ్చాత్తాపం వ్యక్తం చేయడం, హెచ్‌-1బీ వీసాదారులను లక్ష్యంగా చేసుకోవడం తన ఉద్దేశం కాదని చెప్పడం ప్రాధాన్యం సంతరించుకుంది.