Donald Trump: భారత్-పాక్ యుద్ధాన్ని నేనే ఆపేశా.. మరోసారి ప్రకటించిన డొనాల్డ్ ట్రంప్
ఈ వార్తాకథనం ఏంటి
గత ఏడాది భారత్-పాకిస్థాన్ మధ్య జరిగిన సైనిక ఉద్రిక్తతను తన జోక్యంతోనే నిలిపివేశానని అమెరికా అధ్యక్షుడు డొనాల్డ్ ట్రంప్ మరోసారి పేర్కొన్నారు. బుధవారం తుర్కియే పర్యటన ముగించుకుని ఎయిర్ ఫోర్స్ వన్ విమానంలో ప్రయాణిస్తున్న సందర్భంగా మీడియాతో మాట్లాడిన ఆయన, భారత్-పాక్ ఘర్షణ సమయంలో మొత్తం 11 యుద్ధ విమానాలు కూలిపోయాయని చెప్పారు. అయితే, ఆ విమానాలు ఏ దేశానికి చెందినవో మాత్రం వెల్లడించలేదు. భారత్-పాక్ ఘర్షణతో పాటు ప్రపంచవ్యాప్తంగా మొత్తం ఎనిమిది యుద్ధాలను తాను నిలిపివేశానని ట్రంప్ వెల్లడించారు. ఈ చర్యల కారణంగానే నోబెల్ శాంతి బహుమతికి తానే అన్ని విధాలా అర్హుడినని స్పష్టం చేశారు. తనకంటే ఎక్కువ అర్హత ఉన్న వ్యక్తి మరెవరు ఉన్నారో చెప్పాలని ప్రశ్నించారు.
వివరాలు
అణు యుద్ధం జరిగి ఉంటే ప్రాణనష్టం మరింత భారీగా ఉండేది: ట్రంప్
తాను జోక్యం చేసుకోకపోయి ఉంటే భారత్-పాకిస్తాన్ మధ్య పరిస్థితి అణు యుద్ధానికి దారితీసేదని ట్రంప్ వ్యాఖ్యానించారు. ఆ ఘర్షణను నిలిపివేయడం వల్ల సుమారు మూడు కోట్ల నుంచి ఐదు కోట్ల మంది ప్రజల ప్రాణాలను కాపాడినట్లు పాకిస్తాన్ ప్రధాని షెహబాజ్ షరీఫ్ తనను అభినందించారని గుర్తు చేశారు. ఒకవేళ అణు యుద్ధం జరిగి ఉంటే ప్రాణనష్టం మరింత భారీగా ఉండేదని ఆయన అభిప్రాయపడ్డారు. కాగా, పహల్గాం ఉగ్రదాడికి ప్రతీకారంగా భారత సాయుధ దళాలు గత ఏడాది మే 7న పాకిస్తాన్ భూభాగంలోని ఉగ్రవాద సంస్థల స్థావరాలపై 'ఆపరేషన్ సిందూర్' పేరుతో లక్ష్యిత దాడులు నిర్వహించిన విషయం తెలిసిందే.