Trump: ఇరాన్ కొత్త శాంతి ప్రతిపాదనపై సమీక్ష… ఆమోదయోగ్యం కాదని ట్రంప్ తిరస్కరణ
ఈ వార్తాకథనం ఏంటి
అమెరికా అధ్యక్షుడు డొనాల్డ్ ట్రంప్ ఇరాన్ సమర్పించిన 14 అంశాల శాంతి ప్రతిపాదనను పరిశీలిస్తానని ప్రకటించారు. అయితే అది ఆమోదయోగ్యంగా ఉండదని ముందుగానే స్పష్టం చేశారు. గత 47 ఏళ్లుగా ఇరాన్ తన చర్యలకు తగిన మూల్యం చెల్లించలేదని ఆయన వ్యాఖ్యానించారు. ఫ్లోరిడాలో ఎయిర్ ఫోర్స్ వన్ ఎక్కేముందు విలేకరులతో మాట్లాడిన ట్రంప్, ఆ ప్రతిపాదనను ఇంకా పూర్తిగా పరిశీలించలేదని తెలిపారు. "ఇప్పుడు చూస్తున్నాను... తర్వాత వివరాలు చెబుతాను" అని పేర్కొన్నారు. తర్వాత ట్రూత్ సోషల్ వేదికలో స్పందిస్తూ ట్రంప్, ఇరాన్ పంపిన ప్రతిపాదనను త్వరలో సమీక్షిస్తానని, కానీ అది ఆమోదయోగ్యంగా ఉండకపోవచ్చని అభిప్రాయపడ్డారు.
వివరాలు
తాత్కాలిక కాల్పుల విరమణకు బదులుగా శాశ్వత పరిష్కారం
మానవాళికి, ప్రపంచానికి ఇరాన్ చేసిన చర్యలకు ఇప్పటికీ సరైన మూల్యం చెల్లించలేదని మరోసారి విమర్శించారు. ఇరాన్ ఈ 14 అంశాల ప్రతిపాదనను పాకిస్తాన్ ద్వారా అమెరికాకు పంపింది. ఇది అమెరికా రూపొందించిన 9 అంశాల ప్రణాళికకు ప్రతిస్పందనగా వచ్చినదిగా తెలుస్తోంది. ఈ ప్రతిపాదనలో ప్రాంతీయ సంఘర్షణలు,ముఖ్యంగా లెబనాన్తో ఉన్న ఉద్రిక్తతలు ముగించాలనే అంశం ఉంది. తాత్కాలిక కాల్పుల విరమణకు బదులుగా 30రోజుల్లో శాశ్వత పరిష్కారం తీసుకురావాలని సూచించింది. భవిష్యత్తులో ఇరాన్పై ఎలాంటి సైనిక దాడులు జరగకుండా బలమైన భద్రతా హామీలు ఇవ్వాలని కోరింది. అలాగే ప్రాంతం నుంచి అమెరికా దళాలను ఉపసంహరించుకోవాలని పేర్కొంది. ఆర్థిక ఆంక్షలు పూర్తిగా ఎత్తివేయడంతో పాటు జప్తు చేసిన ఆస్తులను తిరిగి ఇవ్వాలని, నష్టాలకు పరిహారం చెల్లించాలని సూచించింది.
వివరాలు
మూడు వారాల కాల్పుల విరమణ అమల్లో
హోర్ముజ్ జలసంధి ద్వారా సరఫరాలు సజావుగా సాగేందుకు కొత్త పాలనా విధానం ప్రతిపాదించింది. ఇప్పటికే తాత్కాలిక కాల్పుల విరమణకు ఇరాన్ అంగీకరించినప్పటికీ, దీర్ఘకాలిక ఒప్పందానికి బలమైన హామీలు కోరుతోంది. ఇటీవలి ఇరాన్-అమెరికా ఉద్రిక్తతల నేపథ్యంలో ఈ పరిణామం చోటుచేసుకుంది. ట్రంప్ గతంలో కూడా ఇరాన్ ప్రతిపాదనలను సరిపోవని పేర్కొని తిరస్కరించిన సందర్భాలు ఉన్నాయి. ప్రస్తుతం మూడు వారాల కాల్పుల విరమణ అమల్లో ఉన్నట్లు సమాచారం.
వివరాలు
ఒకవైపు ఒప్పందానికి ఆసక్తి.. మరోవైపు ఇరాన్పై ఒత్తిడి
హోర్ముజ్ జలసంధి మూసివేత చమురు సరఫరాలపై తీవ్ర ప్రభావం చూపే అవకాశం ఉండటంతో ప్రపంచవ్యాప్తంగా ఆందోళనలు వ్యక్తమవుతున్నాయి. అణ్వాయుధాలు, క్షిపణి వ్యవస్థలు, ఆంక్షల ఎత్తివేత విషయంలో ఇరాన్ తన గట్టి వైఖరిని కొనసాగిస్తోంది. ట్రంప్ ఒకవైపు ఒప్పందానికి ఆసక్తి చూపుతూనే, మరోవైపు ఇరాన్పై ఒత్తిడిని కొనసాగిస్తున్నారు. ఇరువైపులా హెచ్చరికలు కొనసాగుతుండటంతో పరిస్థితి అత్యంత సున్నితంగా మారింది. చిన్న తప్పిదం కూడా పెద్ద యుద్ధానికి దారితీయవచ్చనే ఆందోళన నెలకొంది. ప్రపంచ ఆర్థిక వ్యవస్థ, మధ్యప్రాచ్య స్థిరత్వం ఈ పరిణామాలపైనే ఆధారపడి ఉన్నాయి.