Trump: ఒప్పందమైనా దాడులైనా ఆదివారమే జరగొచ్చు: ఇరాన్‌కు ట్రంప్ హెచ్చరిక
ఈ వార్తాకథనం ఏంటి
ఇరాన్‌పై అమెరికా, ఇజ్రాయెల్ మరోసారి సైనిక దాడులకు దిగవచ్చన్న వార్తల నేపథ్యంలో అమెరికా అధ్యక్షుడు డొనాల్డ్ ట్రంప్ కీలక వ్యాఖ్యలు చేశారు. ఇరాన్‌తో శాంతి ఒప్పందం కుదుర్చుకునేందుకు చర్చలు కొనసాగుతున్నాయని తెలిపారు. అయితే, తమ డిమాండ్లకు టెహ్రాన్ అంగీకరించకపోతే సైనిక చర్యకు దిగే అవకాశాన్ని కొట్టిపారేయలేమని హెచ్చరించారు. ఆదివారం నాటికి ఇరాన్‌తో అద్భుతమైన ఒప్పందం కుదరవచ్చని, లేదంటే దాడులు జరిగే పరిస్థితి కూడా రావచ్చని పేర్కొన్నారు. ఇరాన్ నాయకులు తమ మాట వినకపోతే సైనిక చర్య ద్వారా అయినా దౌత్య ఒప్పందాన్ని కుదుర్చుకునేందుకు ప్రయత్నిస్తామని ట్రంప్ స్పష్టం చేశారు. అయితే, ఒప్పందం కుదిరినప్పటికీ ఇరాన్ దానికి కట్టుబడి ఉంటుందనే నమ్మకం తనకు లేదని వ్యాఖ్యానించారు.
వివరాలు
ఇజ్రాయెల్‌తో కలిసి ఇరాన్‌పై మరోసారి భారీ స్థాయిలో దాడులు
ఇరాన్ ఎట్టి పరిస్థితుల్లోనూ అణ్వాయుధాలను అభివృద్ధి చేయకుండా చూడటమే తమ ప్రభుత్వ ప్రధాన లక్ష్యమని ట్రంప్ వెల్లడించారు.
ఈ లక్ష్యాన్ని సాధించేందుకు అవసరమైతే ఎన్ని సైనిక చర్యలకైనా వెనుకాడబోమని స్పష్టం చేశారు.
అయితే, ఇరాన్‌పై దాడులు ఎప్పుడు చేపడతారనే విషయాన్ని మాత్రం ఆయన వెల్లడించలేదు.
మరోవైపు, నవంబర్‌లో అమెరికాలో మధ్యంతర ఎన్నికలు జరగనున్న నేపథ్యంలో అప్పటివరకు ట్రంప్ ఇరాన్‌పై దాడులకు దూరంగా ఉండవచ్చని సంబంధిత వర్గాలు అంచనా వేస్తున్నాయి.
ఎన్నికలు పూర్తయిన తర్వాత ఇజ్రాయెల్‌తో కలిసి ఇరాన్‌పై మరోసారి భారీ స్థాయిలో దాడులు చేసే అవకాశం ఉందని ఆ వర్గాలు పేర్కొంటున్నాయి.
వివరాలు
పశ్చిమాసియా దిశగా అమెరికా యుద్ధ విమానాలు, నౌకాదళ బలగాలు
ఇదే సమయంలో అమెరికా యుద్ధ విమానాలు, నౌకాదళ బలగాలు తిరిగి పశ్చిమాసియా దిశగా కదులుతున్నట్లు వస్తున్న వార్తలు గల్ఫ్ దేశాల్లో ఆందోళనకు కారణమవుతున్నాయి.
అమెరికా తదుపరి ఎలాంటి నిర్ణయం తీసుకుంటుంది? ఇరాన్‌తో చర్చలు ఒప్పందానికి దారితీస్తాయా? లేక మరోసారి సైనిక ఘర్షణ మొదలవుతుందా? అన్న అంశాలపై ఉత్కంఠ నెలకొంది.