Middle East War: ఇరాన్‌పై దాడులకు సిద్ధంగా ఉండండి.. మిత్రదేశాలకు అమెరికా సంకేతాలు
ఈ వార్తాకథనం ఏంటి
పశ్చిమాసియాలో ఉద్రిక్తతలు మరింత పెరిగే సూచనలు కనిపిస్తున్నాయి. నవంబర్ 3న అమెరికా మిడ్‌టర్మ్ ఎన్నికలు ముగిసిన తర్వాత ఇరాన్‌పై మరోసారి సైనిక దాడులు జరిగే అవకాశం ఉందని వార్తలు వస్తున్నాయి. ఈ నేపథ్యంలో పశ్చిమాసియాలోని తమ మిత్రదేశాలను అమెరికా అప్రమత్తం చేసినట్లు అంతర్జాతీయ మీడియా కథనాలు వెల్లడించాయి. ఇరాన్‌పై కొత్తగా దాడులు చేసే అవకాశముందని, అందుకు సిద్ధంగా ఉండాలని అమెరికా సూచించినట్లు ఇద్దరు దౌత్యవేత్తలను ఉటంకిస్తూ కథనాలు పేర్కొన్నాయి. ఈ సైనిక చర్యలు ప్రారంభమైతే కొన్ని రోజుల పాటు కొనసాగవచ్చని సమాచారం. అయితే, ఇరాన్‌పై తాజా దాడులకు సంబంధించి అమెరికా అధ్యక్షుడు డొనాల్డ్ ట్రంప్ ఇంకా తుది నిర్ణయం తీసుకోలేదని తెలుస్తోంది.
వివరాలు
ఇరాన్ దౌత్య ప్రయత్నాలు.. ఘర్షణలు వద్దంటున్న యూఏఈ
అయినప్పటికీ, మిడ్‌టర్మ్ ఎన్నికల తర్వాత ఇరాన్‌పై దాడులకు ఆదేశాలు ఇచ్చే అంశాన్ని పరిశీలిస్తున్నట్లు ట్రంప్ ఇప్పటికే పలుమార్లు సంకేతాలిచ్చారు.
అమెరికా మళ్లీ సైనిక చర్యలకు దిగితే గల్ఫ్‌ దేశాల్లోని మౌలిక సదుపాయాలపై ఇరాన్ ప్రతిదాడులకు పాల్పడే అవకాశం ఉందనే ఆందోళనలు వ్యక్తమవుతున్నాయి.
ఇప్పటికే టెహ్రాన్ దాడులతో యూఏఈ, సౌదీ అరేబియా సహా పలు దేశాలు ఇబ్బందులు ఎదుర్కొంటున్నాయి.
ఈ పరిణామాలు చమురు సంపదతో కీలకంగా ఉన్న గల్ఫ్‌ దేశాల భవిష్యత్ ప్రణాళికలపై ప్రభావం చూపే ప్రమాదం ఉంది.
అయితే, తాజా మీడియా కథనాలపై వైట్‌హౌస్‌ లేదా అమెరికా అధికారులు ఇప్పటివరకు అధికారికంగా స్పందించలేదు.
వివరాలు
ఇరాన్ దౌత్య ప్రయత్నాలు.. ఘర్షణలు వద్దంటున్న యూఏఈ
మరోవైపు, ఇరాన్ దౌత్యపరమైన ప్రయత్నాలను కొనసాగిస్తోంది. గత నెలలో తాము ప్రతిపాదించిన అంశాలపై మధ్యవర్తులతో చర్చలు జరుపుతున్నట్లు ఆ దేశ విదేశాంగ మంత్రి అబ్బాస్ అరాగ్చీ ఎక్స్‌ వేదికగా వెల్లడించారు.
అయితే, ఇరాన్ ప్రతిపాదనలను ట్రంప్ ఇప్పటికే తిరస్కరించారు.
ఈ నేపథ్యంలో మరోసారి ఘర్షణలు తలెత్తకుండా, ఇరు పక్షాలు చర్చల ద్వారా పరిష్కారాలను కనుగొనాలని యూఏఈ విదేశాంగ శాఖ ఒక ప్రకటనలో విజ్ఞప్తి చేసింది.
వివరాలు
మిలిటరీ ప్లానర్‌పై హెగ్సెత్ వేటు
ఇరాన్‌పై అమెరికా మరోసారి దాడులకు సిద్ధమవుతోందంటూ వార్తలు వస్తున్న సమయంలో పెంటగాన్‌లో కీలక అధికారి తొలగింపు చర్చనీయాంశంగా మారింది.
అమెరికా రక్షణ మంత్రి పీట్ హెగ్సెత్.. జాయింట్ చీఫ్స్ ఆఫ్ స్టాఫ్‌లో ప్రణాళికలు, వ్యూహాల విభాగానికి అధిపతిగా పనిచేస్తున్న ఆర్మీ లెఫ్టినెంట్ జనరల్ బ్రెట్ సిల్వియాను పదవి నుంచి తొలగించారు.
ఇదిలా ఉండగా, ఇదే పదవిలో గతంలో పనిచేసిన లెఫ్టినెంట్ జనరల్ జోసెఫ్ మెక్‌గీని కూడా గత ఏడాది అక్టోబర్‌లో బలవంతంగా రాజీనామా చేయించిన విషయం గమనార్హం.
ఇరాన్‌తో ఉద్రిక్తతలు కొనసాగుతున్న వేళ అమెరికా సైనిక నాయకత్వంలో చోటుచేసుకుంటున్న ఈ మార్పులు ప్రాధాన్యం సంతరించుకున్నాయి.