US Army: అమెరికా సైన్యం కొత్త ప్లాన్.. డ్రోన్ల కొనుగోళ్లకు అమెజాన్ తరహా స్టోర్
ఈ వార్తాకథనం ఏంటి
ఆధునిక యుద్ధ విధానాల్లో డ్రోన్ల పాత్ర రోజు రోజుకీ కీలకంగా మారుతున్న వేళ, వాటిని సైనికులకు త్వరగా, సులభంగా అందించేందుకు అమెరికా రక్షణ శాఖ కీలక నిర్ణయం తీసుకుంది. ఈ దిశగా ప్రముఖ టెక్నాలజీ సంస్థ అమెజాన్'తో భాగస్వామ్యం కుదుర్చుకుని ప్రత్యేక ఆన్లైన్ మార్కెట్ప్లేస్ను రూపొందించింది. ఈ వేదిక ద్వారా సైనిక విభాగాలు, ప్రభుత్వ భాగస్వాములు, మిత్రదేశాలు నేరుగా డ్రోన్లను ఆన్లైన్లో కొనుగోలు చేయవచ్చు. Amazon Web Services (AWS) క్లౌడ్ సాంకేతికత ఆధారంగా రూపొందించిన ఈ ప్లాట్ఫామ్కు 'అన్మ్యాన్డ్ ఎయిర్క్రాఫ్ట్ సిస్టమ్స్ (UAS) మార్కెట్ప్లేస్' అని పేరు పెట్టారు. ఇందులో సైనిక అవసరాలకు అనుగుణంగా ముందుగానే పరీక్షించబడిన,ఆమోదం పొందిన డ్రోన్ వ్యవస్థలను అందుబాటులో ఉంచారు.
వివరాలు
మార్కెట్ప్లేస్ ద్వారా కొత్త ఆవిష్కర్తలకు అవకాశాలు
వినియోగదారులు విభిన్న డ్రోన్లను సరిపోల్చి చూడడం, ఆర్డర్ చేయడం, అలాగే తమ అభిప్రాయాలను పంచుకోవడం వంటి సౌకర్యాలను ఉపయోగించవచ్చు. దీర్ఘకాలంగా కొనసాగుతున్న నెమ్మదైన, అధిక వ్యయంతో కూడిన రక్షణ కొనుగోలు విధానానికి ముగింపు పలకడమే ఈ ప్రణాళిక ప్రధాన లక్ష్యం. కొద్దిమంది పెద్ద కాంట్రాక్టర్ల ఆధిపత్యం,అధికార వ్యవస్థలోని సంక్లిష్టతలను తగ్గిస్తూ, పారదర్శకతను పెంచే ప్రయత్నం జరుగుతోంది. ఈ మార్కెట్ప్లేస్ ద్వారా కొత్త ఆవిష్కర్తలకు అవకాశాలు లభించి, రక్షణ రంగంలో ఆరోగ్యకరమైన పోటీ పెరుగుతుందని అధికారులు ఆశాభావం వ్యక్తం చేస్తున్నారు.
వివరాలు
అమెరికా సైనిక శక్తి మరింత బలోపేతం
ఈ నేపథ్యంలో యూఎస్ ఆర్మీ అక్విజిషన్ విభాగాధిపతి బ్రెంట్ ఇంగ్రహమ్ మాట్లాడుతూ, "రక్షణ రంగంలోకి కొత్త ఆలోచనలను తీసుకువచ్చే ఆవిష్కర్తలను ప్రోత్సహించడం ద్వారా మా పారిశ్రామిక సామర్థ్యాన్ని బలోపేతం చేస్తున్నాం. ఇది మా సైనిక శక్తిని మరింత దృఢపరచడంలో కీలకం" అని పేర్కొన్నారు. అలాగే యూఎస్ ఆర్మీ యూఏఎస్ ప్రాజెక్ట్ మేనేజర్ కల్నల్ డేనియల్ మెడగ్లియా తెలిపిన ప్రకారం, ఈ కొత్త విధానం ద్వారా అత్యాధునిక టెక్నాలజీని వేగంగా,పెద్ద పరిమాణంలో సైనికులకు అందించడం సాధ్యమవుతుంది. ఈ చర్య అమెరికా సైనిక శక్తిని మరింత బలోపేతం చేస్తుందని రక్షణ విశ్లేషకులు అభిప్రాయపడుతున్నారు.