Us Court: అమెరికా న్యాయస్థానం సంచలన తీర్పు.. గర్భంలో శిశువు మరణించినందుకు మహిళకు 18 ఏళ్ల జైలు శిక్ష
ఈ వార్తాకథనం ఏంటి
అమెరికాలోని ఓ న్యాయస్థానం తాజాగా సంచలనాత్మక తీర్పును వెలువరించింది. గర్భంలో ఉన్న శిశువు మృతికి బాధ్యురాలిగా తేలిన ఓ మహిళకు కోర్టు ఏకంగా 18 ఏళ్ల జైలు శిక్ష విధించింది. ఈ నిర్ణయం అగ్రరాజ్యం అమెరికా వ్యాప్తంగా తీవ్ర చర్చకు దారి తీసింది. గర్భస్థ శిశువు మరణం విషయంలో తల్లికే శిక్ష విధించడం ప్రపంచ చరిత్రలోనే అరుదైన ఘటనగా అభివర్ణిస్తున్నారు. అలబామా రాష్ట్రానికి చెందిన బ్రూకర్ షూమేకర్ గర్భవతిగా ఉన్న సమయంలో, 2017లో ఆమె కడుపులోని శిశువు మృతి చెందింది. గర్భధారణ సమయంలో ఆమె మాదకద్రవ్యాలను వినియోగించిందనే ఆరోపణలు వెలుగులోకి వచ్చాయి. ఈ కారణంగానే శిశువు ప్రాణాలు కోల్పోయినట్లు అభియోగాలు నమోదు కావడంతో కేసు న్యాయస్థానానికి చేరింది.
వివరాలు
కొత్త చర్చకు దారి తీసిన తీర్పు
విచారణలో భాగంగా జరిగిన దర్యాప్తులో, రసాయన పదార్థాల ప్రభావమే శిశువు మరణానికి కారణమని తేలింది. దీంతో కోర్టు ఆమెను దోషిగా నిర్ధారించి, 18 సంవత్సరాల జైలు శిక్ష విధిస్తూ సంచలన తీర్పును ప్రకటించింది. ఈ తీర్పు వెలువడిన వెంటనే దేశవ్యాప్తంగా కొత్త తరహా చర్చ ప్రారంభమైంది. గర్భస్థ శిశువు మరణానికి తల్లినే నేరస్థురాలిగా పరిగణించి శిక్షించడంపై అనేక ప్రశ్నలు లేవనెత్తుతున్నారు. ఒకవైపు మహిళా హక్కుల సంస్థ అయిన 'ప్రెగ్నెన్సీ జస్టిస్' ఈ తీర్పును సమర్థిస్తూ కోర్టు నిర్ణయాన్ని స్వాగతించింది. మరోవైపు మాత్రం ఇది తప్పుదోవ పట్టిన తీర్పని, మహిళలపై అన్యాయంగా చట్టాన్ని ప్రయోగించడమేనని పలువురు విమర్శిస్తున్నారు.
వివరాలు
కొత్త చర్చకు దారి తీసిన తీర్పు
గర్భధారణ సమయంలో ఎదురయ్యే విషాదకర ఘటనలను నేరాలుగా పరిగణించాలా? లేక వాటిని వైద్య, సామాజిక కోణంలో చూడాలా? అనే అంశంపై పెద్ద ఎత్తున చర్చ జరుగుతోంది. శిశువు మరణం సహజ కారణాల వల్ల జరిగినా, నిర్లక్ష్యం వల్ల జరిగినా, అన్ని సందర్భాల్లోనూ తల్లిని చట్టపరంగా శిక్షించడం ఎంతవరకు సమంజసం అనే ప్రశ్నలు వినిపిస్తున్నాయి. మహిళలను నేరస్థులుగా ముద్రవేసి జైలుకు పంపడం సరైన పరిష్కారమేనా? అనే వివాదం ఇప్పుడు అమెరికా సమాజంలో తీవ్రంగా కొనసాగుతోంది.