Foreign Student Visa Policy: అమెరికా స్టూడెంట్ వీసా నిబంధనల్లో భారీ మార్పులు.. భారతీయ విద్యార్థులకు కొత్త చిక్కులు!
ఈ వార్తాకథనం ఏంటి
భారతీయ టెక్ నిపుణులు ఎక్కువగా వినియోగించే హెచ్-1బీ వీసాలపై కఠిన ఆంక్షలు తీసుకొచ్చిన అమెరికా అధ్యక్షుడు డొనాల్డ్ ట్రంప్ ప్రభుత్వం ఇప్పుడు విదేశీ విద్యార్థుల వీసా విధానంలోనూ కీలక మార్పులకు శ్రీకారం చుట్టింది. ముఖ్యంగా అమెరికాలో పెద్ద సంఖ్యలో చదువుతున్న భారతీయ విద్యార్థులపై ఈ నిర్ణయం ప్రభావం చూపే అవకాశం ఉందని నిపుణులు భావిస్తున్నారు. తాజా ప్రతిపాదన ప్రకారం, అంతర్జాతీయ విద్యార్థులు అమెరికాలో ఎంతకాలం ఉండవచ్చో ముందుగానే నిర్ణయించి, వీసాపై స్పష్టమైన గడువు తేదీని పేర్కొంటారు. ఇందుకు సంబంధించిన ప్రతిపాదనకు అమెరికా హోమ్ల్యాండ్ సెక్యూరిటీ విభాగం పంపిన ఫైల్కు వైట్హౌస్ ఆమోదం తెలిపింది.
వివరాలు
నాలుగేళ్లకే పరిమితి?
ఈ నిర్ణయం త్వరలో అమల్లోకి వచ్చే అవకాశం ఉందని సమాచారం. కొత్త నిబంధనల ప్రకారం, విదేశీ విద్యార్థులు స్టూడెంట్ వీసాపై అమెరికాలో గరిష్టంగా నాలుగేళ్లపాటు మాత్రమే ఉండగలరని బ్లూమ్బర్గ్ వెల్లడించింది. ఎఫ్-1 స్టూడెంట్ వీసాలు, జె-1 ఎక్స్చేంజ్ విజిటర్ వీసాలు, ఇతర విద్యా సంబంధిత వీసా కేటగిరీలకు చెందిన వారందరికీ ఈ నిబంధనలు వర్తించే అవకాశం ఉంది. ఇది అమెరికాలో అత్యధిక సంఖ్యలో ఉన్న భారతీయ విద్యార్థులపై ప్రత్యక్ష ప్రభావం చూపనుంది. ముఖ్యంగా నాలుగేళ్లకు మించి కొనసాగే పీహెచ్డీ, పరిశోధన, ఇతర దీర్ఘకాలిక విద్యా కోర్సుల్లో చదువుతున్న వారికి ఇబ్బందులు తలెత్తే అవకాశం ఉంది. వారి కోర్సు కాలపరిమితి నాలుగేళ్లను దాటితే, వీసా గడువు పొడిగింపు కోసం ఇమిగ్రేషన్ అధికారులను సంప్రదించాల్సి ఉంటుంది.
వివరాలు
'డ్యూరేషన్ ఆఫ్ స్టేటస్' విధానానికి ముగింపు?
ప్రస్తుతం అమల్లో ఉన్న 'డ్యూరేషన్ ఆఫ్ స్టేటస్' (Duration of Status) విధానం ప్రకారం, విద్యార్థులు తమ కోర్సును కొనసాగిస్తూ వీసా నిబంధనలు పాటిస్తున్నంతకాలం అమెరికాలో ఉండేందుకు అనుమతి ఉంటుంది. ఈ విధానం కారణంగా విద్యార్థులు తమ చదువును పొడిగించుకోవడం, ఒక విశ్వవిద్యాలయం నుంచి మరొకదానికి మారడం, కోర్సులు మార్చుకోవడం లేదా డిగ్రీ నుంచి పీజీ స్థాయికి వెళ్లడం వంటి అంశాల్లో ఎలాంటి అదనపు అనుమతులు అవసరం ఉండవు. అలాగే, ఆప్షనల్ ప్రాక్టికల్ ట్రైనింగ్ (OPT), స్టెమ్ OPT కార్యక్రమాలను పూర్తి చేసేందుకు కూడా అదనపు ప్రవేశ అనుమతులు అవసరం ఉండవు. అయితే కొత్త విధానం అమల్లోకి వస్తే ఈ సౌలభ్యాలు తగ్గిపోతాయి.
వివరాలు
ఇకపై నిర్దిష్ట కాలపరిమితి
కొత్త నిబంధనల ప్రకారం విద్యార్థులకు అమెరికాలో చట్టబద్ధంగా ఉండేందుకు ఇమిగ్రేషన్ అధికారులు ముందుగానే నిర్దిష్ట కాలపరిమితిని కేటాయిస్తారు. ఈ నిబంధన ఇంకా అమల్లోకి రాకపోయినా, గతంలో విడుదలైన సూచనల ప్రకారం ఎక్కువ మంది విద్యార్థులకు నాలుగేళ్ల గడువు మాత్రమే లభించే అవకాశం ఉందని అధికారులు పేర్కొంటున్నారు. నాలుగేళ్లకు మించిన కోర్సులు చేస్తున్న విద్యార్థులు అమెరికాలో చట్టబద్ధంగా కొనసాగాలంటే 'యూఎస్ సిటిజన్షిప్ అండ్ ఇమ్మిగ్రేషన్ సర్వీసెస్' (USCIS) నుంచి ప్రత్యేక అనుమతి పొందాల్సి ఉంటుంది.
వివరాలు
అదనపు పత్రాలు.. మరింత పరిశీలన
వీసా గడువు పొడిగింపుకు దరఖాస్తు చేసుకునే విద్యార్థులు అదనపు పత్రాలు సమర్పించాల్సి రావచ్చు. బయోమెట్రిక్ నమోదు, కఠినమైన పరిశీలన, ప్రాసెసింగ్లో ఆలస్యం వంటి సమస్యలు ఎదురయ్యే అవకాశం ఉంది. ఈ ప్రతిపాదన ఇప్పటికే వైట్హౌస్లోని 'ఆఫీస్ ఆఫ్ మేనేజ్మెంట్ అండ్ బడ్జెట్' (OMB) సమీక్షను పూర్తి చేసింది. అధికారిక ప్రకటన, అమలుకు ముందు ఉండే చివరి విధానపరమైన దశల్లో ఇది ఒకటి.
వివరాలు
అమెరికాలో 30 శాతం మంది భారతీయులే..
ఈ మార్పు భారతీయ విద్యార్థులపై గణనీయ ప్రభావం చూపే అవకాశం ఉంది. అమెరికాలో చదువుతున్న విదేశీ విద్యార్థుల్లో అత్యధికులు భారతీయులే. 'ఓపెన్ డోర్స్' నివేదిక ప్రకారం, 2023-24 విద్యా సంవత్సరంలో అమెరికాలోని ఉన్నత విద్యా సంస్థల్లో 3.31 లక్షలకుపైగా భారతీయ విద్యార్థులు చదువుకున్నారు. అమెరికాలోని మొత్తం అంతర్జాతీయ విద్యార్థుల్లో భారతీయుల వాటా దాదాపు 30 శాతంగా ఉండటం విశేషం.
వివరాలు
పీహెచ్డీ విద్యార్థులకు ఎక్కువ ప్రభావం
అమెరికాలో చదువుతున్న భారతీయ విద్యార్థుల్లో చాలా మంది డాక్టోరల్ డిగ్రీలు, పరిశోధన ఆధారిత మాస్టర్స్ ప్రోగ్రాంలు, కొన్ని ప్రత్యేక ప్రొఫెషనల్ కోర్సుల్లో చేరారు. వీటిలో చాలా వరకు నాలుగేళ్లకు మించి కొనసాగుతాయి. కొత్త నిబంధనలు అమల్లోకి వస్తే, ఈ విద్యార్థులు తమ చదువును నిరంతరాయంగా కొనసాగించాలంటే తరచూ అదనపు ధ్రువీకరణలు సమర్పించాల్సి రావచ్చు. అలాగే ఇమిగ్రేషన్ అధికారుల మరింత కఠిన పరిశీలనను ఎదుర్కోవాల్సి ఉంటుంది.
వివరాలు
అనిశ్చితి పెరుగుతుందంటున్న విద్యాసంస్థలు
అసోసియేషన్ ఆఫ్ అమెరికన్ యూనివర్సిటీస్ (AAU), అమెరికన్ కౌన్సిల్ ఆన్ ఎడ్యుకేషన్ (ACE), ఎన్ఏఎఫ్ఎస్ఏ (NAFSA) వంటి ప్రముఖ విద్యాసంస్థల కూటములు ఈ ప్రతిపాదనను తీవ్రంగా వ్యతిరేకిస్తున్నాయి. చదువు, పరిశోధన కాలపరిమితులు తరచూ మారే కోర్సుల విద్యార్థులకు ఈ విధానం అనిశ్చితిని పెంచుతుందని అవి పేర్కొంటున్నాయి. అలాగే విశ్వవిద్యాలయాలపై పరిపాలనా భారం పెరగడంతో పాటు, దీర్ఘకాలిక పరిశోధన, పీహెచ్డీ విద్యార్థులు తమ చట్టబద్ధ హోదాను కొనసాగించుకోవడం మరింత కష్టతరం అవుతుందని హెచ్చరిస్తున్నాయి.
వివరాలు
ఓపీటీపై కూడా ప్రభావం
విద్యార్థులు చదువు పూర్తయ్యాక అమెరికాలో పని అనుభవం పొందేందుకు ఉపయోగపడే 'ఆప్షనల్ ప్రాక్టికల్ ట్రైనింగ్' (OPT) కార్యక్రమంపై కూడా ఈ మార్పులు ప్రభావం చూపే అవకాశం ఉంది. వీసా గడువు పొడిగింపు దరఖాస్తులను అధికారులు ఆమోదించడంలో ఆలస్యం జరిగితే, విద్యార్థులు చదువు పూర్తిచేసి ఉద్యోగాల్లో చేరే ప్రక్రియ మరింత క్లిష్టంగా మారవచ్చు.
వివరాలు
గడువు ముగిస్తే అక్రమ నివాసంగానే..
వైట్హౌస్ ఆమోదించిన ప్రతిపాదనల్లో మరో కీలక అంశం కూడా ఉంది. విద్యార్థులకు అనుమతించిన కాలపరిమితి ముగిసిన వెంటనే వారు అమెరికాను విడిచి వెళ్లాలి. లేకపోతే అక్రమంగా దేశంలో ఉంటున్నట్లుగా పరిగణిస్తారు. ప్రభుత్వ కార్యాలయాల్లో పరిపాలనా ఆలస్యం, దరఖాస్తుల పెండింగ్, సాంకేతిక లేదా చిన్నపాటి పొరపాట్ల కారణంగా కూడా విద్యార్థులు ఇలాంటి పరిస్థితిని ఎదుర్కొనే ప్రమాదం ఉంది. దీనివల్ల జరిమానాలు, భవిష్యత్తులో అమెరికా ప్రవేశంపై ఆంక్షలు వంటి కఠిన చర్యలు ఎదురయ్యే అవకాశం ఉంది.
వివరాలు
ట్రంప్ తొలి హయాంలోనే ప్రతిపాదన
ఈ ప్రతిపాదనను అమెరికా హోమ్ల్యాండ్ సెక్యూరిటీ విభాగం తొలిసారిగా డొనాల్డ్ ట్రంప్ తొలి అధ్యక్ష పదవీకాలంలోనే తీసుకొచ్చింది. అయితే అప్పట్లో అది అమల్లోకి రాలేదు. ట్రంప్ మళ్లీ అధికారంలోకి వచ్చిన తర్వాత 2025లో ఈ ఆలోచనను తిరిగి ముందుకు తీసుకొచ్చారు. ఇప్పుడు వైట్హౌస్ ఆమోదం లభించడంతో ఇది త్వరలోనే అధికారిక విధానంగా మారే అవకాశాలు కనిపిస్తున్నాయి. ప్రస్తుతం మాత్రం పాత 'డ్యూరేషన్ ఆఫ్ స్టేటస్' విధానమే అమల్లో ఉంది. ఒకవేళ ఈ కొత్త నిబంధనలు అమల్లోకి వస్తే, గత కొన్ని దశాబ్దాలుగా అమెరికా స్టూడెంట్ వీసా వ్యవస్థలో జరిగిన అత్యంత కీలక మార్పుల్లో ఇదొకటిగా నిలిచే అవకాశం ఉంది.