Tesla Roadster: గాల్లోకి ఎగిరి ల్యాండ్ అయ్యే కారు.. మస్క్ ప్లాన్ మామూలుగా లేదుగా!
ఈ వార్తాకథనం ఏంటి
టెస్లా అధినేత ఎలాన్ మస్క్ మరోసారి తన వినూత్న ఆలోచనలతో ఆటోమొబైల్ రంగంలో ఆసక్తి రేకెత్తిస్తున్నారు. కంపెనీ తదుపరి తరం ఎలక్ట్రిక్ స్పోర్ట్స్ కారైన టెస్లా రోడ్స్టర్ (Tesla Roadster)తో భవిష్యత్తులో మరింత సంచలనాత్మక ప్రదర్శనలు నిర్వహించనున్నట్లు సంకేతాలిచ్చారు. ఈ కారు స్నేక్ రివర్ లేదా గ్రాండ్ కాన్యన్‌పై నుంచి గాల్లో ఎగిరి, తిరిగి చక్రాలపై సురక్షితంగా ల్యాండ్ కావడంతో పాటు, ధ్వని వేగంలో సగానికి మించిన వేగాన్ని అందుకునే అవకాశం ఉందని ఆయన సూచించారు. ఇటీవల టెస్లా రోడ్‌స్టర్‌ను తలకిందులుగా నడిపించడం, కొద్దిసేపు గాల్లోకి ఎగిరేలా ప్రదర్శించడం వంటి విన్యాసాలను చూపించింది.
వివరాలు
స్పేస్‌ఎక్స్ థ్రస్టర్లతో గాల్లోకి రోడ్స్టర్
ఈ ప్రదర్శనకు సంబంధించిన వీడియోలు సోషల్ మీడియాలో వైరల్ అవుతున్న నేపథ్యంలో మస్క్ తాజాగా ఎక్స్‌ (X) వేదికగా భవిష్యత్తులో నిర్వహించబోయే ప్రదర్శనల గురించి వెల్లడించారు.
టెస్లా రోడ్స్టర్ గాల్లోకి ఎగరడానికి ఉపయోగించే సాంకేతికతపై కంపెనీ వెహికల్ ఇంజినీరింగ్ విభాగం అధిపతి లార్స్ మొరావీ వివరణ ఇచ్చారు.
ఈ కారు ఎగిరే సామర్థ్యం స్పేస్‌ఎక్స్ (SpaceX) రూపొందించిన థ్రస్టర్లపై ఆధారపడి ఉంటుందని తెలిపారు. రోడ్‌స్టర్‌లో మొత్తం 10 థ్రస్టర్లు ఉంటాయి.
వీటిని 600 లీటర్ల సామర్థ్యం గల కంప్రెస్డ్ ఎయిర్ వ్యవస్థకు అనుసంధానించారు.
ఈ వ్యవస్థ సాయంతో కారు కొద్దిసేపు గాల్లోకి లేవడంతో పాటు, గాలిలో తిరిగే విన్యాసాలు చేయగలదు. సాధారణ రాకెట్లు ఇంధనాన్ని మండించి థ్రస్ట్‌ను ఉత్పత్తి చేస్తాయి.
వివరాలు
గాల్లో ఎంతసేపు ఉంటుంది?
అయితే స్పేస్‌ఎక్స్ అభివృద్ధి చేసిన ఈ కోల్డ్ గ్యాస్ థ్రస్టర్లు ఒత్తిడితో కూడిన వాయువును విడుదల చేయడం ద్వారా అవసరమైన థ్రస్ట్‌ను సృష్టిస్తాయి.
దీని ద్వారా రోడ్స్టర్ కొద్దిసేపు గాల్లో విన్యాసాలు చేసి, అనంతరం తిరిగి నేలపై ల్యాండ్ అయ్యేలా రూపొందించారు.
టెస్లా రోడ్స్టర్ ఎంతసేపు గాల్లో ఉండగలదన్నది దానిలో అందుబాటులో ఉన్న కంప్రెస్డ్ గ్యాస్ పరిమాణంపై ఆధారపడి ఉంటుంది.
అంటే థ్రస్టర్లకు అవసరమైన ఒత్తిడితో కూడిన వాయువు ఎంత ఎక్కువగా ఉంటే, దాని గాల్లోకి ఎగిరే సామర్థ్యంపై అంత ప్రభావం ఉంటుంది.
ఎలాన్ మస్క్ ప్రతిపాదించిన భవిష్యత్తు ప్రదర్శనలు ఈ అత్యాధునిక ఎలక్ట్రిక్ కారుపై అంచనాలను మరింత పెంచుతున్నాయి.
వివరాలు
భవిష్యత్తు ప్రదర్శనలకు ప్రణాళికల మాత్రమే
రోడ్స్టర్ ఇటీవల చేసిన విన్యాసాలకు సంబంధించిన వీడియోలు సోషల్ మీడియా వేదికల్లో విస్తృతంగా ప్రచారం పొందడంతో ఈ కారు మరోసారి చర్చనీయాంశంగా మారింది.
అయితే స్నేక్ రివర్ లేదా గ్రాండ్ కాన్యన్‌పై ఎగరడం, ధ్వని వేగంలో సగానికి మించిన వేగాన్ని అందుకోవడం వంటి అంశాలు మస్క్ సూచించిన భవిష్యత్తు ప్రదర్శనల ప్రణాళికలే.
అవి ఇప్పటికే పూర్తిగా నిరూపితమైన సామర్థ్యాలని భావించకూడదు.