Electric SUVs : భారత మార్కెట్లో ఈవీల దూకుడు.. రాబోతున్న ఐదు కొత్త ఎస్యూవీలు ఇవే!
ఈ వార్తాకథనం ఏంటి
భారత ఆటో మొబైల్ రంగం ఇప్పుడు 'గ్రీన్ ఎనర్జీ' దిశగా వేగంగా పయనిస్తోంది. ఒకప్పుడు చిన్న కార్లకే పరిమితమైన ఎలక్ట్రిక్ టెక్నాలజీ, ఇప్పుడు భారీ ఎస్యూవీల్లోనూ విస్తరిస్తోంది. పూర్తిస్థాయి ఎలక్ట్రిక్ వాహనాలతో పాటు ప్లగ్-ఇన్ హైబ్రిడ్ మోడళ్లను కూడా కంపెనీలు భారత మార్కెట్లో ప్రవేశపెడుతున్నాయి. రాబోయే పండుగ సీజన్ నాటికి దేశంలో విడుదలకు సిద్ధంగా ఉన్న టాప్-5 మోడళ్లు ఇవి
వివరాలు
1. టయోటా అర్బన్ క్రూయిజర్ ఎబెలియా (మే 2026)
టయోటా భారత్లో విడుదల చేయనున్న తొలి పూర్తిస్థాయి ఎలక్ట్రిక్ కారు ఇదే. ఇది మారుతి సుజుకి ఇ-విటారా ప్లాట్ఫారమ్పై ఆధారపడి రూపొందింది. రెండు బ్యాటరీ ఆప్షన్లతో రానున్న ఈ కారు 440 కిలోమీటర్లు, 543 కిలోమీటర్ల రేంజ్లను అందిస్తుంది. డిజైన్ విషయంలో ఎలిగెంట్, మోడ్రన్ లుక్ ఉండనుందని కంపెనీ చెబుతోంది. 2. టాటా సియెర్రా EV (జూన్ 2026) గతంలో ఐకానిక్గా నిలిచిన 'సియెర్రా' మోడల్ ఇప్పుడు ఎలక్ట్రిక్ రూపంలో రాబోతోంది. టాటా మోటార్స్ దీనిని సింగిల్ మోటార్ (RWD), డ్యూయల్ మోటార్ (AWD) వేరియంట్లలో అందించనుంది. ఒకసారి ఛార్జ్ చేస్తే 600 కిలోమీటర్ల వరకు ప్రయాణించగలదు. వీ2ఎల్ (Vehicle-to-Load), వీ2వీ (Vehicle-to-Vehicle) వంటి బై-డైరెక్షనల్ ఛార్జింగ్ ఫీచర్లు ఇందులో ప్రత్యేకం.
వివరాలు
3. JSW SUV (జెటూర్ ట్రావెలర్ ఆధారిత) (సెప్టెంబర్ 2026)
JSW Motors నుంచి వస్తున్న తొలి మోడల్ ఇది. చైనా కంపెనీ చెర్రీకి చెందిన జెటూర్ ట్రావెలర్ ఆధారంగా రూపొందించిన ఈ ప్లగ్-ఇన్ హైబ్రిడ్ ఎస్యూవీలో 1.5 లీటర్ టర్బో పెట్రోల్ ఇంజిన్తో పాటు ఎలక్ట్రిక్ మోటార్లు ఉంటాయి. కేవలం బ్యాటరీపై మాత్రమే 162 కిలోమీటర్ల వరకు ప్రయాణించగలదు.
వివరాలు
4. టాటా సఫారి ఈవీ (సెప్టెంబర్ 2026)
టాటా మోటార్స్ ఫ్లాగ్షిప్ ఎస్యూవీ 'సఫారి' ఇప్పుడు ఎలక్ట్రిక్ అవతార్లో రాబోతోంది. టాటా హారియర్ ఈవీ తరహాలో ఇది కూడా 600 కిలోమీటర్ల రేంజ్ ఇవ్వగలదని అంచనా. 6, 7 సీటర్ ఆప్షన్లు ఉండగా, 'సమ్మన్ మోడ్', ఆటో పార్క్ అసిస్ట్ వంటి ఆధునిక ఫీచర్లు ఉన్నాయి. మల్టీ-లింక్ రియర్ సస్పెన్షన్ వల్ల కఠిన రోడ్లపై కూడా సౌకర్యవంతమైన ప్రయాణం సాధ్యం.
వివరాలు
5. MG స్టార్లైట్ 560 (అక్టోబర్ 2026)
JSW MG Motor నుంచి రానున్న ఈ మోడల్ ప్లగ్-ఇన్ హైబ్రిడ్, ప్యూర్ ఎలక్ట్రిక్ రెండింటిలోనూ అందుబాటులోకి రానుంది. హైబ్రిడ్ వెర్షన్ 125 కిమీ ప్యూర్ ఈవీ రేంజ్ ఇస్తే, ఎలక్ట్రిక్ వెర్షన్ 500 కిలోమీటర్ల వరకు ప్రయాణిస్తుంది. ఇది మహీంద్రా XUV 7XO, టాటా సఫారీ వంటి మోడళ్లకు గట్టి పోటీ ఇవ్వనుంది. ఈ విధంగా ఎలక్ట్రిక్ మరియు హైబ్రిడ్ టెక్నాలజీలతో భారత ఆటోమొబైల్ రంగం కొత్త దిశలో ముందుకు సాగుతోంది. ఈ మోడళ్లు మార్కెట్లోకి రావడం ద్వారా వినియోగదారులకు మరింత విభిన్న ఎంపికలు లభించనున్నాయి.