Tata Motors-Ashok Leyland: స్పేర్ పార్ట్స్ నుంచి ఫైనాన్స్ వరకు.. వ్యాపార విస్తరణపై దృష్టి పెట్టిన వాణిజ్య వాహన కంపెనీలు
ఈ వార్తాకథనం ఏంటి
భారతదేశంలోని వాణిజ్య వాహన (కమర్షియల్ వెహికల్ - CV) తయారీ సంస్థలు ఇప్పుడు కేవలం ట్రక్కులు, బస్సుల అమ్మకాలపైనే ఆధారపడకుండా తమ వ్యాపారాలను విస్తరిస్తున్నాయి. మార్కెట్లో ఉండే హెచ్చుతగ్గులు, ఆర్థిక వృద్ధి, సరుకు రవాణా కార్యకలాపాలు, ప్రభుత్వ మౌలిక సదుపాయాల వ్యయాలపై ఆధారపడే వాణిజ్య వాహన రంగంలోని చక్రీయ ప్రభావాల నుంచి ఆదాయం, లాభాలను కాపాడుకోవడమే ఈ వ్యూహం వెనుక ప్రధాన ఉద్దేశం. ఈ క్రమంలో దేశంలోని ప్రముఖ వాణిజ్య వాహన తయారీ సంస్థలైన టాటా మోటార్స్, అశోక్ లేలాండ్, వీఈ కమర్షియల్ వెహికల్స్ (VECV) 2025-26 ఆర్థిక సంవత్సరంలో అద్భుతమైన పనితీరును నమోదు చేశాయి. ముఖ్యంగా వాహన విక్రయాలకు సంబంధం లేని అనుబంధ వ్యాపారాల ద్వారా గణనీయమైన ఆదాయ వృద్ధిని సాధించాయి.
వివరాలు
స్పేర్ పార్ట్స్, ఫైనాన్స్ వ్యాపారాలకు భారీ ఆదరణ
తాజా ఆర్థిక ఫలితాల సందర్భంగా నిర్వహించిన సమావేశాల్లో ఈ సంస్థలు స్పేర్ పార్ట్స్, ఫైనాన్స్ సేవలు, ఫ్లీట్ మేనేజ్మెంట్, నిర్వహణ సేవలు వంటి అనుబంధ వ్యాపారాలు వేగంగా వృద్ధి చెందుతున్నాయని వెల్లడించాయి. అశోక్ లేలాండ్కు చెందిన ఆఫ్టర్మార్కెట్ (స్పేర్ పార్ట్స్, సేవలు) వ్యాపారం ద్వారా 2025-26లో దాదాపు ₹3,800 కోట్ల ఆదాయం వచ్చింది. వీఈ కమర్షియల్ వెహికల్స్ స్పేర్ పార్ట్స్ వ్యాపారం ₹3,000 కోట్ల మార్క్ను దాటగా, ఏడాదికి 14 శాతం వృద్ధి నమోదు చేసింది. టాటా మోటార్స్ ప్రకారం, తమ నాన్-సైక్లికల్ రెవెన్యూ (స్థిర ఆదాయ వనరులు) వృద్ధి రేటు, సంప్రదాయ వాహన విక్రయాల ఆదాయ వృద్ధి కంటే 2.7 రెట్లు ఎక్కువగా ఉంది.
వివరాలు
ఆఫ్టర్-సేల్స్ సేవలే స్థిర ఆదాయానికి బలం
వాణిజ్య వాహనాల డిమాండ్ తగ్గిన సమయంలో కూడా స్పేర్ పార్ట్స్ విక్రయాలు, నిర్వహణ సేవలు, మరమ్మత్తు సేవల ద్వారా సంస్థలకు నిరంతర ఆదాయం లభిస్తుంటుంది. అందుకే కంపెనీలు ఈ విభాగాలపై ప్రత్యేక దృష్టి సారిస్తున్నాయి. టాటా మోటార్స్ ఫ్లీట్ మేనేజ్మెంట్ సేవలు, కనెక్టెడ్ వెహికల్ ప్లాట్ఫారమ్లు, ఆఫ్టర్మార్కెట్ సేవల విస్తరణపై భారీగా పెట్టుబడులు పెట్టింది. టాటా మోటార్స్ కమర్షియల్ వెహికల్స్ సీఎఫ్వో జి.వి. రమణన్ మాట్లాడుతూ, "మేము గత కొన్నేళ్లుగా ఈ వ్యాపార విభాగాలను ఉద్దేశపూర్వకంగా అభివృద్ధి చేస్తున్నాం. ఇప్పుడు వాటి ఫలితాలు ఆర్థిక గణాంకాల్లో స్పష్టంగా కనిపిస్తున్నాయని తెలిపారు.
వివరాలు
అశోక్ లేలాండ్కు అనుబంధ వ్యాపారాల నుంచి భారీ వృద్ధి
అశోక్ లేలాండ్ కూడా 2025-26లో వాహన విక్రయాలకు మించిన ఇతర వ్యాపారాల్లో బలమైన వృద్ధిని నమోదు చేసింది. దేశీయ స్పేర్ పార్ట్స్ ఆదాయం 9.5 శాతం పెరిగింది. పవర్ సొల్యూషన్స్ వ్యాపారం 16.4 శాతం వృద్ధి సాధించింది. రక్షణ (డిఫెన్స్) విభాగం ఆదాయం 20 శాతం పెరిగింది. హిందూజా లేలాండ్ ఫైనాన్స్ నిర్వహణలోని ఆస్తుల విలువ (AUM) 24 శాతం పెరిగి సుమారు ₹59,500 కోట్లకు చేరుకుంది. అశోక్ లేలాండ్ మేనేజింగ్ డైరెక్టర్ & సీఈఓ షేను అగర్వాల్ మాట్లాడుతూ, "మా నాన్-సీవీ వ్యాపారాలు అసాధారణ వృద్ధిని నమోదు చేశాయి. భవిష్యత్తులో కూడా ఇవే కంపెనీ వృద్ధికి కీలకంగా మారనున్నాయని పేర్కొన్నారు.
వివరాలు
చక్రీయ ప్రభావాల నుంచి రక్షణే లక్ష్యం
మార్కెట్ పరిస్థితులు మారినా ఆదాయం నిలకడగా ఉండేందుకు వాణిజ్య వాహన తయారీ సంస్థలు ఇప్పుడు స్పేర్ పార్ట్స్, సేవలు, ఫైనాన్స్, డిఫెన్స్, పవర్ సొల్యూషన్స్ వంటి విభాగాల్లో పెట్టుబడులు పెడుతున్నాయి. దీంతో ట్రక్కులు, బస్సుల అమ్మకాలు తగ్గినా కంపెనీల ఆదాయంపై పెద్దగా ప్రభావం పడకుండా చూసుకోవాలని ఈ సంస్థలు భావిస్తున్నాయి.