ICRA: భారత్‌లో విమానయాన రంగానికి దెబ్బ.. FY26లో ₹170-180 బిలియన్ నష్టాలు

వ్రాసిన వారు Sirish Praharaju

Mar 27, 2026

01:40 pm

ఈ వార్తాకథనం ఏంటి

భారత విమానయాన రంగం ఆర్థికంగా మరింత ఒత్తిడిని ఎదుర్కోబోతోంది. పెరుగుతున్న ఇంధన ధరలు,రూపాయి బలహీనత కారణంగా FY2026లో ఈ రంగానికి ₹170-180 బిలియన్ నష్టాలు వచ్చే అవకాశముందని ICRA Limited తన తాజా నివేదికలో వెల్లడించింది. రేటింగ్ ఏజెన్సీ ఈ రంగంపై తన అవుట్‌లుక్‌ను "స్టేబుల్" నుంచి "నెగటివ్"గా మార్చింది. పశ్చిమ ఆసియా ప్రాంతంలో కొనసాగుతున్న ఉద్రిక్తతల కారణంగా క్రూడ్ ఆయిల్ ధరలు పెరగడం, రూపాయి విలువ పడిపోవడం వల్ల విమానయాన సంస్థల నిర్వహణ ఖర్చులు గణనీయంగా పెరిగాయని పేర్కొంది.

వివరాలు

ఇంధనం, ఫారెక్స్ ప్రభావం… లాభాలపై గట్టి దెబ్బ

2026 మార్చిలో ఎయివియేషన్ టర్బైన్ ఫ్యూయల్ (ATF) ధరలు వరుసగా 5.7% పెరగడం, అలాగే బ్రెంట్ క్రూడ్ ధర బ్యారెల్‌కు $72 నుంచి $105కి ఎగబాకడం విమానయాన సంస్థలపై భారీ భారం మోపుతోంది. ఇంధన వ్యయం మొత్తం ఆపరేటింగ్ ఖర్చుల్లో 30-40% వరకు ఉంటుంది. దీనితో పాటు లీజులు, మెయింటెనెన్స్ వంటి ఖర్చులు ఎక్కువగా డాలర్లలో ఉండటంతో రూపాయి బలహీనత మరింత ప్రభావం చూపుతోంది. దీంతో ఇప్పటికే తక్కువ లాభాల మార్జిన్లతో ఉన్న ఎయిర్‌లైన్స్‌కు విదేశీ మారక నష్టాలు పెరుగుతున్నాయి. FY2026లో ఈ రంగంలో ఇంటరెస్ట్ కవరేజ్ రేషియో 0.7-0.9 రెట్లు మాత్రమే ఉండొచ్చని అంచనా. ఇది FY2025లో ఉన్న 1.8 రెట్లతో పోలిస్తే గణనీయంగా తగ్గుదల.

వివరాలు

ప్రయాణికుల వృద్ధి మందగింపు

దేశీయ ప్రయాణికుల ట్రాఫిక్ వృద్ధి FY2026లో 0-3%మధ్యే ఉండొచ్చని అంచనా. మొత్తం ప్రయాణికుల సంఖ్య 165-170మిలియన్లకు చేరే అవకాశముంది. గత సంవత్సరాలతో పోలిస్తే ఇది స్పష్టమైన మందగమనంగా కనిపిస్తోంది. FY2026లో తొలి 11నెలల్లో దేశీయ ప్రయాణికుల వృద్ధి కేవలం 1.6% మాత్రమే నమోదైంది. అంతర్జాతీయ ట్రాఫిక్ మాత్రం కొంత మెరుగ్గా ఉంది. FY2026లో 7-9% వృద్ధి ఉండొచ్చని అంచనా వేస్తున్నా,విమాన రద్దులు,టికెట్ ధరల పెరుగుదల వల్ల దీనిపై కూడా ప్రభావం ఉండొచ్చు. ముందుగా FY2027లో నష్టాలు ₹110-120బిలియన్‌కు తగ్గుతాయని ICRA అంచనా వేసింది. కానీ తాజా భౌగోళిక రాజకీయ ఉద్రిక్తతలతో ఈ అంచనాలకు కూడా ప్రమాదం ఏర్పడింది. ఇంధన సర్‌చార్జ్‌ల కారణంగా టికెట్ ధరలు 5-6% పెరగడం డిమాండ్‌ను తగ్గించే అవకాశం ఉంది.

వివరాలు

ఆపరేషనల్ సమస్యలు

ఆపరేషనల్ సమస్యలు కూడా విమానయాన రంగాన్ని ఇబ్బంది పెడుతున్నాయి. 2026 ఫిబ్రవరి నాటికి మొత్తం ఫ్లీట్‌లో 13-15% (సుమారు 117 విమానాలు) ఇంజిన్ సమస్యలు, సరఫరా అంతరాయం కారణంగా గ్రౌండ్ అయ్యాయి. ముఖ్యంగా Pratt & Whitney ఇంజిన్‌ల సమస్యలు దీనికి కారణంగా మారాయి. ఈ పరిస్థితులు లీజింగ్ ఖర్చులను పెంచడంతో పాటు పాత విమానాల వినియోగాన్ని పెంచుతున్నాయి. దాంతో ఇంధన సామర్థ్యం తగ్గి, ఖర్చులు మరింత పెరుగుతున్నాయి. అయితే ఈ ప్రతికూల పరిస్థితుల మధ్య కూడా ప్రయాణికుల లోడ్ ఫ్యాక్టర్ సుమారు 93% వద్ద నిలకడగా ఉంది. అంటే డిమాండ్ మాత్రం బలంగా ఉందని అర్థం. కానీ పెరుగుతున్న ఖర్చులు, ఆపరేషనల్ సమస్యల వల్ల ఆ లాభాలు పూర్తిగా కనిపించడం లేదు.