BYD Factory: చైనాలోని షెన్జెన్ BYD ఫ్యాక్టరీలో భారీ అగ్ని ప్రమాదం
ఈ వార్తాకథనం ఏంటి
చైనాలోని షెన్జెన్ నగరంలోని పింగ్షాన్ జిల్లాలో ఉన్న ప్రముఖ ఎలక్ట్రిక్ వాహన తయారీ సంస్థ BYD ఫ్యాక్టరీలో భారీ అగ్నిప్రమాదం జరిగింది. ఫ్యాక్టరీలోని బహుళ అంతస్తుల పార్కింగ్ భవనంలో ఒక్కసారిగా మంటలు చెలరేగి,భారీగా నల్లటి పొగ ఆకాశాన్ని కమ్మేసింది. ఈ ఘటనతో అక్కడ అత్యవసర సిబ్బంది పెద్ద ఎత్తున రంగంలోకి దిగారు. మా లువాన్ ఉపప్రాంతంలో ఉన్న ఈ త్రీ-డైమెన్షనల్ పార్కింగ్ నిర్మాణంలో మంటలు వ్యాపించినప్పటికీ, ఫైర్ సిబ్బంది సమయానికి అదుపులోకి తీసుకువచ్చారు. ఇప్పటివరకు ఎలాంటి ప్రాణనష్టం జరగలేదని అధికారులు తెలిపారు. ఈ గ్యారేజీలో కేవలం టెస్ట్ వాహనాలు, స్క్రాప్ వాహనాలే ఉన్నాయని, ఉత్పత్తి లేదా కస్టమర్లకు పంపాల్సిన వాహనాలు ఏవీ లేవని సంస్థ స్పష్టం చేసింది.
వివరాలు
నిర్మాణ పనుల్లో నిర్లక్ష్యం కారణంగానే ఈ ప్రమాదం
సోషల్ మీడియాలో వైరల్ అవుతున్న వీడియోల్లో మంటలు భవనం మొత్తం వ్యాపించిన దృశ్యాలు కనిపిస్తున్నాయి. భారీగా అగ్నిమాపక వాహనాలు, పోలీసులు అక్కడికి చేరుకుని మంటలను పూర్తిగా ఆర్పేశారు. ప్రాథమిక సమాచారం ప్రకారం, బయట జరుగుతున్న నిర్మాణ పనుల్లో నిర్లక్ష్యం కారణంగానే ఈ ప్రమాదం జరిగిందని చెబుతున్నారు. బ్యాటరీలో లోపం వల్ల ప్రమాదం జరగలేదని అధికారులు క్లారిటీ ఇచ్చారు. ఈ ఘటన వల్ల ఉత్పత్తి ప్రక్రియపై ఎలాంటి ప్రభావం లేదని సంస్థ తెలిపింది. ఇదే సమయంలో దేశవ్యాప్తంగా 5,000 ఫ్లాష్ చార్జింగ్ స్టేషన్లను విస్తరించే పనిలో కంపెనీ బిజీగా ఉంది.