Nissan Tekton: జూలై 9న నిస్సాన్ టెక్టాన్ ఎంట్రీ.. క్రెటా, డస్టర్‌కు గట్టి పోటీ!

వ్రాసిన వారు Sirish Praharaju

May 21, 2026

01:10 pm

ఈ వార్తాకథనం ఏంటి

భారత మార్కెట్లో తమ SUV లైనప్‌ను విస్తరించేందుకు నిస్సాన్ సిద్ధమవుతోంది. కంపెనీ కొత్త మిడ్‌సైజ్ SUV 'నిస్సాన్ టెక్టాన్'ను జూలై 9, 2026న అధికారికంగా ఆవిష్కరించనుంది. ఈ SUV నేరుగా హ్యుందాయ్ క్రెటా, కియా సెల్టోస్, మారుతి గ్రాండ్ విటారా, టయోటా హైరైడర్‌తో పాటు ఇటీవల విడుదలైన రెనాల్ట్ డస్టర్‌కు పోటీగా రానుంది. నిస్సాన్ టెక్టాన్ కొత్త రెనాల్ట్ డస్టర్‌లో ఉపయోగించిన CMF-B మాడ్యులర్ ప్లాట్‌ఫామ్‌పై రూపొందుతోంది. అయితే డస్టర్‌తో పోలిస్తే టెక్టాన్‌కు ప్రత్యేకమైన ప్రీమియం డిజైన్ ఇవ్వాలని నిస్సాన్ ప్రయత్నిస్తోంది. డస్టర్ మాదిరిగా రగ్గడ్ లుక్ కాకుండా, మరింత అర్బన్ స్టైల్‌తో ఈ SUV ఉండే అవకాశముంది.

వివరాలు

'బేబీ పట్రోల్'

ఫ్రంట్ డిజైన్‌లో పెద్ద గ్రిల్,ఎక్కువ క్రోమ్ ఎలిమెంట్స్, స్లిమ్ LED DRLs,కనెక్టెడ్ LED లైటింగ్ ఉండొచ్చని సమాచారం. అలాగే మస్క్యులర్ బానెట్,స్క్వేర్ వీల్ ఆర్చెస్, స్ట్రైట్ SUV స్టాన్స్ ఈ వాహనానికి ప్రత్యేక ఆకర్షణగా ఉండనున్నాయి. గ్లోబల్ మార్కెట్లో ఉన్న నిస్సాన్ పట్రోల్ నుంచి ప్రేరణ పొందిన ఈ మోడల్‌ను కంపెనీ అంతర్గతంగా 'బేబీ పట్రోల్'గా పిలుస్తున్నట్లు నివేదికలు చెబుతున్నాయి. సైడ్ ప్రొఫైల్‌లో హై గ్రౌండ్ క్లియరెన్స్‌తో సంప్రదాయ SUV డిజైన్ కనిపించనుంది. సుమారు 212 మిల్లీమీటర్ల గ్రౌండ్ క్లియరెన్స్‌తో పాటు కొత్త 18 అంగుళాల అల్లాయ్ వీల్స్, 225 సెక్షన్ టైర్లు ఉండే అవకాశం ఉంది. వెనుక భాగంలో ఫుల్-విడ్త్ LED లైట్ బార్, కనెక్టెడ్ టెయిల్ ల్యాంప్స్ ఇవ్వొచ్చని తెలుస్తోంది.

వివరాలు

ఫీచర్స్

ఇంటీరియర్ విషయానికి వస్తే.. కొత్త డ్యాష్‌బోర్డ్ డిజైన్, ప్రీమియం మెటీరియల్స్, కొత్త కలర్ థీమ్స్ ఉండే అవకాశం ఉంది. 10.1 అంగుళాల టచ్‌స్క్రీన్ ఇన్ఫోటైన్‌మెంట్ సిస్టమ్, గూగుల్ బిల్ట్-ఇన్ సపోర్ట్, 10.25 అంగుళాల డిజిటల్ ఇన్‌స్ట్రుమెంట్ క్లస్టర్, వైర్‌లెస్ ఆపిల్ కార్‌ప్లే, ఆండ్రాయిడ్ ఆటో, వెంటిలేటెడ్ పవర్డ్ ఫ్రంట్ సీట్లు, పానోరమిక్ సన్‌రూఫ్, వైర్‌లెస్ ఛార్జర్, కనెక్టెడ్ కార్ టెక్నాలజీ, డ్యూయల్ జోన్ క్లైమేట్ కంట్రోల్ వంటి ఫీచర్లు ఉండొచ్చని అంచనా. భద్రత పరంగా ఆరు ఎయిర్‌బ్యాగ్స్, 360 డిగ్రీ కెమెరా, ఎలక్ట్రానిక్ స్టెబిలిటీ కంట్రోల్‌తో పాటు లేన్ అసిస్ట్, అడాప్టివ్ క్రూయిజ్ కంట్రోల్ వంటి ఫీచర్లతో లెవల్-2 ADAS టెక్నాలజీ కూడా అందించే అవకాశం ఉంది.

వివరాలు

బేస్ వేరియంట్స్

ఇంజిన్ ఆప్షన్ల విషయానికి వస్తే.. నిస్సాన్ టెక్టాన్ మూడు పవర్‌ట్రైన్ ఎంపికలతో వచ్చే అవకాశముంది. బేస్ వేరియంట్లలో 1.0 లీటర్ టర్బో పెట్రోల్ ఇంజిన్ ఉండగా, ఇది సుమారు 100 bhp పవర్ ఇవ్వొచ్చు. టాప్ వేరియంట్లలో 1.3 లీటర్ టర్బో పెట్రోల్ ఇంజిన్ ఉండే అవకాశం ఉంది. ఇది 163 bhp పవర్, 280 Nm టార్క్ ఉత్పత్తి చేయనుంది. అదనంగా 1.8 లీటర్ పెట్రోల్ ఇంజిన్‌తో పాటు ఎలక్ట్రిక్ మోటార్లు, 1.4 kWh బ్యాటరీ ప్యాక్‌తో స్ట్రాంగ్ హైబ్రిడ్ వెర్షన్ కూడా తీసుకురావొచ్చని సమాచారం.