Electric Scooter: ఒక్కసారి ఛార్జ్ చేస్తే 176 కి.మీ.. పెట్రోల్ ఖర్చుకు చెక్ పెట్టే ఓలా S1X..!

వ్రాసిన వారు Moogati Shabari

Jun 18, 2026

03:11 pm

ఈ వార్తాకథనం ఏంటి

పెట్రోల్, డీజిల్ ధరలు రోజురోజుకూ పెరుగుతుండటంతో వాహనదారులపై ఆర్థిక భారం మరింత పెరుగుతోంది. ముఖ్యంగా సామాన్య, మధ్యతరగతి కుటుంబాలు ప్రతి నెలా ఇంధనం కోసం వేల రూపాయలు వెచ్చించాల్సి వస్తోంది. రోజువారీ ప్రయాణాలు ఎక్కువగా చేసే వారికి నెలకు సుమారు రూ.3 వేల వరకు ఖర్చు కావడం సాధారణమే. ఇలాంటి పరిస్థితుల్లో ఇంధన వ్యయాన్ని తగ్గించుకోవాలనే ఉద్దేశంతో చాలా మంది ఎలక్ట్రిక్ వాహనాల వైపు మొగ్గు చూపుతున్నారు. తక్కువ నిర్వహణ ఖర్చు, తక్కువ చార్జింగ్ వ్యయం, అందుబాటు ధరలు వంటి కారణాలతో ఎలక్ట్రిక్ స్కూటర్లకు మార్కెట్లో మంచి ఆదరణ లభిస్తోంది.

వివరాలు

ఒక్కసారి ఛార్జ్ చేస్తే ఎక్కువ దూరం ప్రయాణం..

ఈ పెరుగుతున్న డిమాండ్‌ను దృష్టిలో పెట్టుకుని ప్రముఖ కంపెనీలు కొత్త కొత్త ఈవీ మోడళ్లను మార్కెట్లోకి తీసుకొస్తున్నాయి. అలాంటి వాటిలో వినియోగదారుల దృష్టిని ఆకర్షిస్తున్న మోడల్ ఓలా S1X ఎలక్ట్రిక్ స్కూటర్. ఓలా S1X ఎలక్ట్రిక్ స్కూటర్ ఒకసారి పూర్తి ఛార్జ్ చేస్తే గరిష్టంగా 176 కిలోమీటర్ల వరకు ప్రయాణించే సామర్థ్యాన్ని అందిస్తుంది. నగర ప్రాంతాల్లో ట్రాఫిక్ పరిస్థితుల్లో కూడా సుమారు 110 కిలోమీటర్ల వరకు ప్రయాణించవచ్చు. రోజుకు సుమారు 40 కిలోమీటర్లు ప్రయాణించే వారు మూడు రోజులకు ఒకసారి ఛార్జ్ చేస్తే సరిపోతుంది.

వివరాలు

ఇంధన ఖర్చులో భారీ ఆదా..

ప్రస్తుతం పెట్రోల్ వాహనాలను నడపడానికి కిలోమీటర్‌కు సుమారు రూ.2 నుంచి రూ.2.50 వరకు ఖర్చు అవుతోంది. రోజుకు 40 కిలోమీటర్లు ప్రయాణించే వ్యక్తి నెలకు సుమారు రూ.3 వేల వరకు ఇంధన ఖర్చు చేయాల్సి రావచ్చు. అదే ఎలక్ట్రిక్ స్కూటర్‌ను ఉపయోగిస్తే కిలోమీటర్‌కు కేవలం 20 నుంచి 30 పైసల వరకు మాత్రమే విద్యుత్ ఖర్చు అవుతుంది. దీంతో నెలవారీ ప్రయాణ వ్యయంలో గణనీయమైన తగ్గుదల కనిపిస్తుంది.

వివరాలు

నిర్వహణ ఖర్చు కూడా తక్కువ..

పెట్రోల్ వాహనాలకు ఇంజిన్ ఆయిల్ మార్చడం, ఎయిర్ ఫిల్టర్ శుభ్రం చేయడం, క్లచ్ ప్లేట్ల నిర్వహణ వంటి పనుల కోసం అదనపు ఖర్చు అవుతుంది. అయితే ఎలక్ట్రిక్ స్కూటర్లలో అలాంటి నిర్వహణ అవసరాలు చాలా తక్కువగా ఉండటంతో మెయింటెనెన్స్ ఖర్చు కూడా తగ్గుతుంది. అలాగే లక్ష రూపాయల లోపు ధరలోనే ఈ స్కూటర్ అందుబాటులో ఉండటం మరో ప్రత్యేకత. ఇదే తరహా ఫీచర్లతో ఇతర కంపెనీల మోడళ్ల ధరలు లక్ష రూపాయలకు మించి ఉండగా, ఓలా మాత్రం ప్రీమియం ఫీచర్లతో పోటీ ధరలో ఈ మోడల్‌ను అందిస్తోంది. హైస్పీడ్ ఎలక్ట్రిక్ స్కూటర్ కావడంతో వేగవంతమైన ప్రయాణానికి కూడా అనుకూలంగా ఉంటుంది.

వివరాలు

ఓలా S1X ఎలక్ట్రిక్ స్కూటర్ ముఖ్య ఫీచర్లు..

3kWh, 4kWh బ్యాటరీ వేరియంట్లలో అందుబాటులో ఉంది. 3kWh మోడల్‌ను ఒక్కసారి పూర్తి ఛార్జ్ చేస్తే గరిష్టంగా 176 కిలోమీటర్ల వరకు రేంజ్ లభిస్తుంది. 3kWh వేరియంట్ ఎక్స్‌షోరూమ్ ధర రూ.97,381. 4kWh వేరియంట్ ఎక్స్‌షోరూమ్ ధర రూ.1,13,881. బ్యాటరీపై 8 సంవత్సరాల వారంటీ అందుబాటులో ఉంటుంది.