SIAM: కార్ల ఎగుమతులు 18% పెరిగాయ్‌.. ఏప్రిల్‌-సెప్టెంబరుపై సియామ్
ఈ వార్తాకథనం ఏంటి
ప్రస్తుత ఆర్థిక సంవత్సరం ఏప్రిల్‌ నుంచి సెప్టెంబర్‌ వరకు భారతదేశం నుంచి మొత్తం 4,45,884 ప్రయాణికుల వాహనాలు (కార్లు, ఎస్‌యూవీలు, వ్యాన్లు) విదేశాలకు ఎగుమతి అయ్యాయని తయారీదారుల సమాఖ్య సియామ్ (SIAM) వెల్లడించింది. గత ఆర్థిక సంవత్సరం ఇదే కాలంలో ఎగుమతి చేసిన 3,76,679 వాహనాలతో పోల్చితే, ఈసారి ఎగుమతులు 18.4 శాతం పెరిగాయి. వాహనాల విభాగాల వారీగా పరిశీలిస్తే: కార్ల ఎగుమతులు గత ఏడాది 2,05,091 నుంచి 12% వృద్ధితో 2,29,281 యూనిట్లకు చేరాయి. ఎస్‌యూవీలు, వినియోగ వాహనాలు 26% పెరిగి 2,11,373 యూనిట్లు ఎగుమతి అయ్యాయి. వ్యాన్ల ఎగుమతులు 36.5% పెరిగి 5,230 యూనిట్లకు చేరాయి.
వివరాలు
మారుతీ ముందంజలో..
ఎగుమతి అయిన మొత్తం ప్రయాణికుల వాహనాల్లో మారుతీ సుజుకీ ఇండియాదే అగ్రస్థానం. కంపెనీ 2,05,763 వాహనాలను విదేశాలకు పంపింది. ఇది గత సంవత్సరం ఇదే కాలంలో ఎగుమతి చేసిన 1,47,063 యూనిట్లతో పోల్చితే 40% అధికం. ఇతర కంపెనీల ప్రదర్శన: హ్యుందాయ్‌ మోటార్‌ ఇండియా ఎగుమతులు 84,900 నుంచి 17% పెరిగి 99,540 యూనిట్లకు చేరాయి. నిస్సాన్‌ మోటార్‌ ఇండియా 33,059 నుంచి 37,605 యూనిట్లకు పెరిగింది. ఫోక్స్‌వ్యాగన్‌ ఇండియా 28,011 వాహనాలు, టయోటా కిర్లోస్కర్‌ మోటార్‌ 18,880, కియా ఇండియా 13,666, హోండా కార్స్‌ ఇండియా 13,243 వాహనాలను ఎగుమతి చేశాయి.
వివరాలు
అమెరికాకు తగ్గినా, ఇతర దేశాలకు పెరిగిన ఎగుమతులు
సెప్టెంబరులో అమెరికా అధిక టారిఫ్‌లు విధించడంతో ఆ దేశానికి మన వాహనాల ఎగుమతులు తగ్గాయి. అయితే ఇతర 24 దేశాలకు ఎగుమతులు గణనీయంగా పెరిగాయి. ముఖ్యంగా పశ్చిమ ఆసియా, లాటిన్‌ అమెరికా ప్రాంతాలకు అధిక వాహనాలు వెళ్లాయి. ఎగుమతులు పెరిగిన దేశాలు: కొరియా, యూఏఈ, జర్మనీ, టాగో, ఈజిప్ట్, వియత్నాం, ఇరాక్, మెక్సికో, రష్యా, కెన్యా, నైజీరియా, కెనడా, పోలండ్, శ్రీలంక, ఒమన్, థాయిలాండ్, బంగ్లాదేశ్, బ్రెజిల్, బెల్జియం, ఇటలీ, టాంజానియా తదితర దేశాలు.