Toyota: భారత్లో టయోటా తొలి ఎలక్ట్రిక్ కారు.. అర్బన్ క్రూయిజర్ ఎబెల్లా ఆవిష్కరణ
ఈ వార్తాకథనం ఏంటి
భారత ఆటో మొబైల్ రంగంలో తనకంటూ ప్రత్యేక గుర్తింపు పొందిన జపాన్ దిగ్గజ సంస్థ టయోటా, ఎలక్ట్రిక్ వాహనాల విభాగంలో అధికారికంగా అడుగుపెట్టింది. దేశీయ మార్కెట్ను లక్ష్యంగా చేసుకుని తన తొలి పూర్తిస్థాయి ఎలక్ట్రిక్ కారుగా 'టయోటా అర్బన్ క్రూయిజర్ ఎబెల్లా'ను మంగళవారం ఆవిష్కరించింది. మిడ్-సైజ్ ఎలక్ట్రిక్ SUVగా రూపొందిన ఈ మోడల్కు దేశవ్యాప్తంగా రూ.25,000 టోకెన్ అమౌంట్తో బుకింగ్స్ను కూడా ప్రారంభించింది. అధికారిక ధరలను త్వరలో వెల్లడించనున్నట్లు కంపెనీ తెలిపింది. దేశంలో ఎలక్ట్రిక్ వాహనాలపై పెరుగుతున్న డిమాండ్ను దృష్టిలో ఉంచుకుని టయోటా ఈ కీలక నిర్ణయం తీసుకున్నట్లు తెలుస్తోంది.
Details
బ్యాటరీ, రేంజ్ వివరాలు
అర్బన్ క్రూయిజర్ ఎబెల్లా, మారుతీ సుజుకీ e-విటారా ప్లాట్ఫామ్ ఆధారంగా రూపొందినప్పటికీ, టయోటా తనదైన ప్రత్యేక డిజైన్ మార్పులతో దీనిని మార్కెట్లోకి తీసుకొచ్చింది. ఈ ఎలక్ట్రిక్ SUV, హ్యుందాయ్ క్రెటా ఈవీ, ఎంజీ జెడ్ఎస్ ఈవీ, టాటా కర్వ్ ఈవీ వంటి మోడళ్లకు గట్టి పోటీ ఇవ్వనుంది. టయోటా అర్బన్ క్రూయిజర్ ఎబెల్లాను రెండు బ్యాటరీ ప్యాక్ ఆప్షన్లతో అందిస్తోంది. 49kWh బ్యాటరీ ప్యాక్తో వచ్చే వేరియంట్ 142బీహెచ్పీ పవర్, 189 ఎన్ఎమ్ టార్క్ను ఉత్పత్తి చేస్తుంది. 69kWh బ్యాటరీ ప్యాక్తో కూడిన వేరియంట్ 172బీహెచ్పీ పవర్, 189 ఎన్ఎమ్ టార్క్ను అందిస్తుంది. ఈవేరియంట్ ఒక్కసారి పూర్తి ఛార్జ్తో ARAIసర్టిఫైడ్ సైకిల్ ప్రకారం గరిష్ఠంగా 543 కిలోమీటర్ల రేంజ్ను ఇస్తుందని కంపెనీ ప్రకటించింది.
Details
డిజైన్, ఫీచర్లు
డిజైన్ విషయంలో ఎబెల్లాకు టయోటా ప్రత్యేక ప్రాధాన్యం ఇచ్చింది. ముందు భాగంలో ఆకర్షణీయమైన LED DRLలు, కొత్త డిజైన్ బంపర్, టయోటా బ్రాండింగ్తో కూడిన గ్రిల్ ప్రీమియం లుక్ను ఇస్తున్నాయి. సైడ్ ప్రొఫైల్లో 18 అంగుళాల అల్లాయ్ వీల్స్ ప్రత్యేక ఆకర్షణగా నిలుస్తున్నాయి. ఈ కారు ఐదు మోనోటోన్, నాలుగు డ్యూయల్ టోన్ కలర్ ఆప్షన్లలో అందుబాటులోకి రానుంది.
Details
స్టాండర్డ్గా 7 ఎయిర్బ్యాగ్లు
ఇంటీరియర్లో 10.25 అంగుళాల డిజిటల్ ఇన్స్ట్రుమెంట్ క్లస్టర్, వైర్లెస్ ఆండ్రాయిడ్ ఆటో, ఆపిల్ కార్ప్లే సపోర్ట్తో 10.1 అంగుళాల టచ్స్క్రీన్ ఇన్ఫోటైన్మెంట్ సిస్టమ్ ఉన్నాయి. వీటితో పాటు పనోరమిక్ సన్రూఫ్, వెంటిలేటెడ్ ఫ్రంట్ సీట్స్, వైర్లెస్ ఫోన్ ఛార్జర్, JBL సౌండ్ సిస్టమ్, 12 రంగుల యాంబియెంట్ లైటింగ్ వంటి లగ్జరీ ఫీచర్లు అందించారు. భద్రత విషయంలోనూ రాజీ పడకుండా స్టాండర్డ్గా 7 ఎయిర్బ్యాగ్లు, 360 డిగ్రీ కెమెరా, లెవల్-2 ADAS ఫీచర్లను అందించారు.
Details
ధర, ఇతర ముఖ్య అంశాలు
ఇప్పటికైతే ధరలను టయోటా అధికారికంగా ప్రకటించలేదు. అయితే, ప్రారంభ ధర సుమారు రూ.18 లక్షల నుంచి (ఎక్స్-షోరూమ్) ఉండొచ్చని మార్కెట్ వర్గాలు అంచనా వేస్తున్నాయి. వినియోగదారుల నమ్మకాన్ని పెంచేలా బ్యాటరీపై 8 ఏళ్ల వారెంటీ, 60 శాతం అష్యూర్డ్ బైబ్యాక్ ఆఫర్, 'బ్యాటరీ యాజ్ ఏ సర్వీస్ (BaaS)' వంటి సదుపాయాలను కూడా కంపెనీ అందిస్తోంది. ఈ మోడల్తో భారత ఎలక్ట్రిక్ వాహన మార్కెట్లో టయోటా తనదైన ముద్ర వేయాలని లక్ష్యంగా పెట్టుకుంది.