Cadillac Escalade SUV: అధ్యక్షుడి కాన్వాయ్ కోసం 250 క్యాడిలాక్ ఎస్కలేడ్ ఎస్యూవీల కొనుగోలు.. ట్రంప్ ప్రకటన
ఈ వార్తాకథనం ఏంటి
అమెరికా అధ్యక్షుడు డొనాల్డ్ ట్రంప్ అధ్యక్షుడి అధికారిక కాన్వాయ్ను మరింత బలోపేతం చేసే దిశగా కీలక నిర్ణయం తీసుకున్నారు. ఇందుకోసం వైట్ హౌస్ 250 క్యాడిలాక్ ఎస్కలేడ్ (Cadillac Escalade) ఎస్యూవీలను కొనుగోలు చేయాలని ఆర్డర్ ఇచ్చినట్లు ఆయన వెల్లడించారు. మిచిగన్ రాష్ట్రంలోని జనరల్ మోటార్స్ (GM)కు చెందిన మిల్ఫోర్డ్ ప్రూవింగ్ గ్రౌండ్లో జరిగిన కార్యక్రమంలో ట్రంప్ ఈ విషయాన్ని ప్రకటించారు. ఈ సందర్భంగా ఆయన మాట్లాడుతూ, "మేము దాదాపు 250 ఎస్కలేడ్ ఎస్యూవీలను ఆర్డర్ చేశాం. ఆ వాహనాల్లో ప్రయాణిస్తే ఎంతో ఆకర్షణీయంగా కనిపిస్తాం" అని వ్యాఖ్యానించారు.
వివరాలు
జీఎం మిల్ఫోర్డ్ ప్రూవింగ్ గ్రౌండ్ను సందర్శించిన తొలి అమెరికా అధ్యక్షుడు..
శతాబ్దానికి పైగా చరిత్ర కలిగిన జీఎం మిల్ఫోర్డ్ ప్రూవింగ్ గ్రౌండ్ను అధికారంలో ఉన్న అమెరికా అధ్యక్షుడు సందర్శించడం ఇదే తొలిసారి కావడం విశేషం.
ఈ ప్రైవేట్ వాహన పరీక్షా కేంద్రంలో జనరల్ మోటార్స్ కొత్త వాహనాలు, అత్యాధునిక సాంకేతికతలను అభివృద్ధి చేసి, వాటి పనితీరును పరీక్షిస్తుంది.
సందర్శన సందర్భంగా ట్రంప్ డ్రాగ్ రేస్ను ప్రత్యక్షంగా వీక్షించారు.
అనంతరం చెవ్రోలెట్ సిల్వరాడో, క్యాడిలాక్ సెలెస్టిక్ (Cadillac CELESTIQ) సహా పలు జీఎం వాహనాలను పరిశీలించారు.
అనంతరం గంటకు పైగా సాగిన ప్రసంగంలో పలు అంశాలపై మాట్లాడారు.
వివరాలు
ట్రంప్కు ఘన స్వాగతం పలికిన జీఎం..
ఈ కార్యక్రమంలో జనరల్ మోటార్స్ చైర్పర్సన్, సీఈఓ మేరీ బర్రా ట్రంప్తో పాటు ఇతర ప్రముఖులకు స్వాగతం పలికారు.
ఈ ఏడాది అమెరికాలో తయారీ రంగం, పరిశోధన, అభివృద్ధి (R&D) కార్యకలాపాల కోసం 16 బిలియన్ డాలర్లకు పైగా పెట్టుబడులు పెట్టినట్లు జీఎం ఈ సందర్భంగా వెల్లడించింది.
తన ప్రసంగంలో ట్రంప్ చెవ్రోలెట్ సిల్వరాడో, జీఎంసీ సియెరా, హమ్మర్, ఎస్కలేడ్ వంటి ప్రముఖ మోడళ్లను ప్రశంసించారు.
అమెరికా తయారీ రంగ అభివృద్ధికి జీఎం ఉద్యోగులు అందిస్తున్న సేవలను ప్రత్యేకంగా అభినందించారు.