Volkswagen Tayron: భారత మార్కెట్లో రూ.41.99 లక్షలకు విడుదలైన ఫోక్స్వ్యాగన్ టైరాన్ లైఫ్
ఈ వార్తాకథనం ఏంటి
జర్మన్ కార్ల తయారీ సంస్థ ఫోక్స్వ్యాగన్ భారత మార్కెట్లో తన కొత్త టైరాన్ లైఫ్ (Tayron Life) ఎస్యూవీని రూ.41.99 లక్షల (ఎక్స్షోరూమ్) ప్రారంభ ధరతో అందుబాటులోకి తీసుకొచ్చింది. కంపెనీ శ్రేణిలో అత్యంత ప్రీమియం మోడల్గా ఉన్న టైరాన్ ఆర్-లైన్ (R-Line) కంటే ఈ కొత్త వేరియంట్ ధర రూ.5 లక్షలు తక్కువగా నిర్ణయించింది. ఇంజిన్, డ్రైవ్ట్రైన్ పరంగా ఎలాంటి మార్పులు చేయకపోయినా, స్పోర్టీ డిజైన్కు బదులుగా మరింత సాదాసీదా, హుందాతనాన్ని ప్రతిబింబించే స్టైలింగ్ను ఇందులో అందించారు. ఫోక్స్వ్యాగన్ ఐదు సీట్ల ఎస్యూవీ శ్రేణిలో టైరాన్ లైఫ్ ఇప్పుడు మరింత అందుబాటు ధరలో లభించే ఎంపికగా నిలిచింది.
వివరాలు
అద్భుతమైన ఫీచర్లు..
బ్రాండ్కు చెందిన సాధారణ ఎస్యూవీల కంటే ఇది ప్రీమియం స్థానంలో ఉండగా, మార్కెట్లో స్కోడా కొడియాక్ (Skoda Kodiaq), జీప్ మెరిడియన్ (Jeep Meridian) వంటి మోడళ్లకు ప్రత్యర్థిగా నిలుస్తుంది. ఆర్-లైన్ మాదిరిగానే ఈ వాహనాన్ని కూడా మహారాష్ట్రలోని ఛత్రపతి సంభాజీనగర్ ప్లాంట్లో స్థానికంగానే అసెంబుల్ చేస్తున్నారు. టైరాన్ లైఫ్, ఆర్-లైన్ మధ్య ప్రధాన తేడా బాహ్య డిజైన్లో కనిపిస్తుంది. ఆర్-లైన్లో ఉన్న స్పోర్టీ బ్లాక్ ఫినిష్ కాస్మెటిక్ ప్యాకేజీని లైఫ్ వేరియంట్లో తొలగించారు. దీంతో ముందు గ్రిల్, డోర్ క్లాడింగ్, వీల్ ఆర్చ్ చుట్టూ ఉన్న భాగాలు, వెనుక బంపర్ ట్రిమ్లకు గ్లోస్ బ్లాక్ ఫినిష్ ఇవ్వలేదు.
వివరాలు
అదిరిపోయే లుక్..
ముందు భాగంలో కొత్త బంపర్ డిజైన్తో పాటు గ్రిల్పై L ఆకారపు స్లాట్లు అమర్చారు. గ్రిల్ కింద భాగంలో సిల్వర్ స్ట్రిప్ను జోడించడం వల్ల ఎస్యూవీకి మరింత సొగసైన, హుందా రూపం వచ్చింది. అలాగే సన్నని మ్యాట్రిక్స్ ఎల్ఈడీ హెడ్ల్యాంప్స్, లైట్ బార్తో అనుసంధానమైన ప్రకాశించే VW లోగో వంటి అంశాలు మాత్రం ఆర్-లైన్ నుంచి యథాతథంగా కొనసాగించబడ్డాయి. ఈ ఎస్యూవీ మొత్తం 4,792 మిల్లీమీటర్ల పొడవు కలిగి ఉండగా, వీల్బేస్ 2,789 మిల్లీమీటర్లు ఉంది. ఇందులో 19 అంగుళాల అలాయ్ వీల్స్ అమర్చారు. ఇవి ఆర్-లైన్లో ఉన్న వీల్స్ కంటే కొద్దిగా చిన్నవిగా ఉంటాయి. పక్క భాగం డిజైన్ కూడా నిటారుగా, శుభ్రమైన లైన్లతో ఆకర్షణీయంగా కనిపిస్తుంది.
వివరాలు
వాటిలో ఏ మార్పూ లేదు..
వెనుక భాగంలో బంపర్ డిజైన్ను సరళంగా రూపొందించినప్పటికీ, టెయిల్ ల్యాంప్స్, రూఫ్ స్పాయిలర్, లైట్ బార్, ప్రకాశించే ఫోక్స్వ్యాగన్ లోగో వంటి అంశాల్లో ఎలాంటి మార్పులు చేయలేదు. ఇంటీరియర్ పరంగా చూస్తే టైరాన్ లైఫ్, ఆర్-లైన్ మోడల్తో దాదాపు ఒకే విధంగా ఉంటుంది. కొన్ని ఆర్-లైన్కు ప్రత్యేకమైన బ్యాడ్జ్లు మాత్రమే ఇందులో ఉండవు. ఫీచర్ల విషయానికి వస్తే రెండింటిలోనూ దాదాపు ఒకే సదుపాయాలు అందుబాటులో ఉన్నాయి.
వివరాలు
15 అంగుళాల టచ్ స్క్రీన్..
ఇందులో 15 అంగుళాల టచ్స్క్రీన్ ఇన్ఫోటైన్మెంట్ సిస్టమ్, 10.25 అంగుళాల డిజిటల్ ఇన్స్ట్రుమెంట్ క్లస్టర్, పనోరమిక్ సన్రూఫ్, మూడు జోన్ల క్లైమేట్ కంట్రోల్, పవర్డ్, వెంటిలేటెడ్ ఫ్రంట్ సీట్లు, 360 డిగ్రీ కెమెరా, తొమ్మిది ఎయిర్బ్యాగ్స్, అలాగే లెవల్-2 అడాస్ (ADAS) భద్రతా సాంకేతికత వంటి ఫీచర్లు ఉన్నాయి. ఇంజిన్ విషయానికి వస్తే టైరాన్ లైఫ్లో కూడా ఆర్-లైన్లో ఉపయోగించిన అదే 2.0 లీటర్ టర్బో పెట్రోల్ ఇంజిన్ను అందించారు. ఈ ఇంజిన్ 204 హెచ్పీ శక్తి, 320 ఎన్ఎమ్ టార్క్ ఉత్పత్తి చేస్తుంది. దీనికి 7-స్పీడ్ డ్యూయల్ క్లచ్ ఆటోమేటిక్ ట్రాన్స్మిషన్ను జత చేశారు. అంతేకాకుండా ఆల్-వీల్ డ్రైవ్ (AWD) వ్యవస్థ ద్వారా శక్తి నాలుగు చక్రాలకు చేరుతుంది.