Accenture: యాక్సెంచర్ కీలక నిర్ణయం.. చైనా వ్యాపారాన్ని విక్రయించేందుకు సన్నాహాలు!
ఈ వార్తాకథనం ఏంటి
అంతర్జాతీయ ఐటీ సేవల దిగ్గజం యాక్సెంచర్ (Accenture) చైనాలో తన వ్యాపార కార్యకలాపాలను విక్రయించే ఆలోచనలో ఉన్నట్లు సమాచారం. ఈ విక్రయానికి సంబంధించిన అవకాశాలను పరిశీలించేందుకు ఆర్థిక సేవల సంస్థ జేపీమోర్గాన్‌ (JPMorgan) సహాయం తీసుకుంటున్నట్లు తాజాగా వెలువడిన పలు నివేదికలు వెల్లడించాయి. యాక్సెంచర్ తన చైనా వ్యాపారాన్ని 1.5 బిలియన్ డాలర్లకు, అంటే సుమారు రూ.14 వేల కోట్లకు విక్రయించేందుకు ప్రయత్నాలు చేస్తున్నట్లు తెలుస్తోంది. ఈ వ్యాపారాన్ని కొనుగోలు చేసేందుకు కొన్ని ప్రైవేట్ ఈక్విటీ సంస్థలతో పాటు పరిమిత సంఖ్యలో వ్యూహాత్మక కొనుగోలుదారులు ఆసక్తి చూపిస్తున్నట్లు సమాచారం. అయితే, ఈ విక్రయానికి సంబంధించిన విషయాలపై యాక్సెంచర్ నుంచి అధికారిక ప్రకటన రావాల్సి ఉంది.
వివరాలు
ఉద్యోగుల ఏఐ ఖర్చులపై యాక్సెంచర్ పరిమితులు
కంపెనీ అధికారిక వెబ్‌సైట్‌లోని వివరాల ప్రకారం.. యాక్సెంచర్‌కు చెందిన గ్రేటర్ చైనా కార్యకలాపాలు చైనాతో పాటు హాంకాంగ్‌, తైవాన్‌లలోనూ విస్తరించి ఉన్నాయి.
చైనాలో డేటా నిర్వహణ,వినియోగానికి సంబంధించి అమలులో ఉన్న కఠిన నిబంధనలు ఈ వ్యాపార విక్రయ ఆలోచనకు కారణమై ఉండవచ్చని తెలుస్తోంది.
మరోవైపు, యాక్సెంచర్ తన ఉద్యోగులు కృత్రిమ మేధ (ఏఐ) సేవలను వినియోగించే ఖర్చులపైనా నియంత్రణలు విధిస్తోంది.
ఆంత్రోపిక్‌ సంస్థకు చెందిన క్లాడ్‌ ఏఐ(Claude AI)సేవలకు ఉద్యోగుల యాక్సెస్‌ను పరిమితం చేసినట్లు ఇటీవల వార్తలు వెలువడ్డాయి.
ఈ నివేదికల ప్రకారం.. అక్టోబర్‌ 1 నుంచి క్లాడ్‌ ఎంటర్‌ప్రైజ్‌ సేవల వినియోగానికి ఒక్కో ఉద్యోగికి నెలకు సుమారు రూ.2,700 పరిమితిని కంపెనీ అమల్లోకి తీసుకొచ్చింది.
ఏఐ టోకెన్ల వినియోగంపైనా పరిమితులు విధించింది.
వివరాలు
ఏఐ వినియోగంపై ఆంక్షలు.. సిబ్బంది సంఖ్యను పెంచిన యాక్సెంచర్
ఈ పరిమితికి మించి క్లాడ్‌ ఏఐ సేవలను ఉపయోగించాలనుకునే ఉద్యోగులు అదనపు ఖర్చును భరించే ప్రాజెక్ట్‌ లేదా బృందాన్ని గుర్తించాలి.
ఇందుకోసం సంబంధిత పనుల వివరాలు, ఖర్చులకు సంబంధించిన విభజనతో కూడిన వర్క్‌ బ్రేక్‌డౌన్‌ స్ట్రక్చర్‌ (WBS)ను సమర్పించాల్సి ఉంటుంది.
అయితే, ఈ ప్రక్రియ ద్వారా లైసెన్స్‌ పొందినంత మాత్రాన అదనపు ఏఐ సేవలకు యాక్సెస్‌ నిరంతరం కొనసాగుతుందని హామీ లేదని నివేదికలు పేర్కొంటున్నాయి.
ఇదిలా ఉండగా, యాక్సెంచర్ తన ఏఐ సామర్థ్యాలను విస్తరించే ప్రయత్నాలను కూడా వేగవంతం చేస్తోంది.
కంపెనీ తన ఏఐ, డేటా విభాగాల్లో పనిచేసే ఉద్యోగుల సంఖ్యను 40 వేల నుంచి సుమారు 1,10,000కు పెంచింది.
వివరాలు
ఏఐ వినియోగంపై ఆంక్షలు.. సిబ్బంది సంఖ్యను పెంచిన యాక్సెంచర్
ఏఐ ద్వారా లభించే సామర్థ్యాలను పూర్తిస్థాయిలో వినియోగించుకోవడం, సంస్థ కార్యకలాపాల్లో వాటిని సమర్థంగా అమలు చేయడం లక్ష్యంగా ఈ చర్యలు చేపట్టినట్లు కంపెనీ సీఈఓ జూలీ స్వీట్‌ వెల్లడించారు.
ఒకవైపు ఏఐ రంగంలో సిబ్బందిని పెంచుతూ, కొత్త సాంకేతిక సామర్థ్యాలపై దృష్టి సారిస్తున్న యాక్సెంచర్.. మరోవైపు ఉద్యోగుల ఏఐ వినియోగ ఖర్చులపై పరిమితులు విధిస్తోంది.
ఇదే సమయంలో చైనా వ్యాపార విక్రయానికి సంబంధించిన నివేదికలు వెలువడటం ఐటీ రంగంలో చర్చనీయాంశంగా మారింది.