Amazon: అమెజాన్‌పై వికలాంగుల సెలవుల విధానం కేసు.. గోదాం ఉద్యోగుల ఫిర్యాదు
ఈ వార్తాకథనం ఏంటి
అమెరికాలో వాల్‌మార్ట్‌ తర్వాత అతిపెద్ద ప్రైవేట్‌ కంపెనీగా ఉన్న అమెజాన్‌పై కొత్తగా ఒక పెద్ద కేసు నమోదైంది. న్యూయార్క్‌లోని మాన్‌హాటన్‌ ఫెడరల్‌ కోర్టులో దాఖలైన ఈ సమూహ దావా (Class Action Lawsuit) ప్రకారం, వికలాంగతతో బాధపడుతున్న గోదాం కార్మికులపై కంపెనీ "కఠినమైన" హాజరు విధానం అమలు చేస్తోందని ఆరోపణలు ఉన్నాయి. కోర్టు పత్రాల ప్రకారం, వికలాంగుల సౌకర్యాల కోసం ఇంట్లో ఉండమని సూచించినా, అమెజాన్ ఆ సమయాన్ని అవేతన సెలవుగా లెక్కించి ఉద్యోగులను నష్టపరుస్తోందని ఫిర్యాదు తెలిపింది.
వివరాలు
ఎక్కువగా గైర్హాజరు అయితే ఉద్యోగులను తొలగిస్తామని అమెజాన్ బెదిరిస్తోంది : దావా
ఈ కేసులో మరో ముఖ్య ఆరోపణ ఏమిటంటే.. అమెజాన్ ఉద్యోగులు ఎక్కువ రోజులు గైర్హాజరైతే వారిని పనినుంచి తొలగిస్తామంటూ బెదిరిస్తోందట. "ఈ విధానం వల్ల ఉద్యోగులు తమ చట్టపరమైన హక్కులను వినియోగించుకోవడానికే భయపడుతున్నారు. ఎందుకంటే తాము కూడా శిక్షించబడతామో, ఉద్యోగం పోతుందో అన్న భయం వారిలో ఉంది," అని ఫిర్యాదులో పేర్కొన్నారు. ప్రధాన ఫిర్యాదుదారు కైలా లిస్టర్, న్యూయార్క్‌లోని సైరాక్యూస్‌ సమీపంలోని అమెజాన్ గోదాంలో పనిచేస్తున్నారు. ఆమెకు ఎహ్లర్స్-డాన్లోస్‌ సిండ్రోమ్‌ అనే వ్యాధి ఉండగా, తాను సౌకర్యాల కోసం అభ్యర్థించిన సమయంలో కంపెనీ అనేకసార్లు తనను అవేతన సెలవుపై పంపిందని లిస్టర్ చెప్పారు.
వివరాలు
ఉద్యోగులను భయపెట్టే మెయిల్స్‌ పంపిస్తుందంటూ ఆరోపణ
లిస్టర్ ఫిర్యాదు ప్రకారం, అమెజాన్ "కఠినమైన గైర్హాజరు నియంత్రణ వ్యవస్థ" ద్వారా ఉద్యోగులను శిక్షిస్తోంది. ఉద్యోగులు చట్టబద్ధంగా సెలవు తీసుకున్నా, వారిని వివరణ అడుగుతూ 48 గంటల్లో సమాధానం ఇవ్వకపోతే తొలగిస్తామంటూ మెయిల్స్‌ పంపుతున్నారని ఆమె ఆరోపించింది. "ఈ మెయిల్స్‌ ఉద్యోగులను భయపెడతాయి, తమ హక్కులను వినియోగించుకోవడం నుంచి వెనక్కు తగ్గేలా చేస్తాయి," అని లిస్టర్ వ్యాఖ్యానించారు.
వివరాలు
గత మూడు సంవత్సరాల ఉద్యోగులందరికీ నష్టపరిహారం కోరుతూ కేసు
ఈ దావా ప్రకారం, న్యూయార్క్‌ రాష్ట్రంలోని గత మూడు సంవత్సరాలుగా గోదాంలో పని చేసిన, వికలాంగ సౌకర్యాల కోసం దరఖాస్తు చేసిన లేదా చేయాలనుకున్న గంటలవారీ ఉద్యోగులందరికీ నష్టపరిహారం ఇవ్వాలని డిమాండ్‌ చేశారు. "ఉద్యోగులు తమ భద్రత, జీవనోపాధి మధ్య ఒకదాన్ని ఎంచుకోవాల్సిన పరిస్థితి రాకూడదు," అని 'ఏ బెట్టర్‌ బ్యాలెన్స్‌' అనే ఉద్యోగుల హక్కుల సంఘం అధ్యక్షురాలు ఇనిమై చెట్టియర్ పేర్కొన్నారు.
వివరాలు
న్యూజెర్సీలోనూ ఇలాంటి కేసు.. ఖండించిన అమెజాన్
తాజా కేసుపై అమెజాన్ ఇంకా అధికారిక వ్యాఖ్య చేయలేదు. అయితే మూడు వారాల క్రితం, న్యూజెర్సీ అటార్నీ జనరల్‌ మాథ్యూ ప్లాట్కిన్ కూడా ఇలాంటి ఆరోపణలతో అమెజాన్‌పై కేసు వేశారు. ఆ కేసులో, గర్భిణీ మహిళలు మరియు వికలాంగ ఉద్యోగులకు తగిన సౌకర్యాలు ఇవ్వకుండా, వారిని అవేతన సెలవుపై పంపించిందని ఆరోపించారు. అయితే అమెజాన్ ఆ ఆరోపణలను ఖండిస్తూ, "గర్భధారణ సంబంధిత సౌకర్యాల కోసం వచ్చిన అభ్యర్థనల్లో 99% కంటే ఎక్కువను మేము ఆమోదిస్తాం" అని స్పష్టీకరించింది.