Stock market: యాంటీ-ఏఐ సెంటిమెంట్‌తో దూసుకెళ్లిన సెన్సెక్స్‌.. 1100 పాయింట్ల లాభం
ఈ వార్తాకథనం ఏంటి
దేశీయ స్టాక్‌ మార్కెట్లు భారీ లాభాలతో దూసుకెళ్తున్నాయి. అంతర్జాతీయ మార్కెట్ల నుంచి ప్రతికూల సంకేతాలు ఎదురవుతున్నప్పటికీ భారత సూచీలు మాత్రం జోరును కొనసాగిస్తున్నాయి. గతంలో ఆర్టిఫిషియల్ ఇంటెలిజెన్స్ (AI) రంగంలో పెట్టుబడులు లేకపోవడంతో భారత మార్కెట్లకు దూరంగా ఉన్న విదేశీ మదుపర్లు.. ఇప్పుడు యాంటీ-ఏఐ సెంటిమెంట్‌ కారణంగా మన మార్కెట్లలో పెట్టుబడులు పెట్టేందుకు ఆసక్తి చూపిస్తున్నారు. ఈ పరిణామం దేశీయ స్టాక్‌ మార్కెట్లకు కలిసొచ్చింది. దీంతో సెన్సెక్స్‌ ఏకంగా 1,100 పాయింట్లకు చేరువలో లాభపడగా.. నిఫ్టీ 24,800 పాయింట్ల స్థాయిని అందుకుంది.
వివరాలు
నిఫ్టీ @ 24,795
శుక్రవారం ఉదయం సెన్సెక్స్‌ క్రితం ముగింపు 79,310.01 పాయింట్లతో పోలిస్తే స్వల్ప లాభంతో 79,413.66 పాయింట్ల వద్ద ప్రారంభమైంది.
అయితే కొద్దిసేపటికే కొనుగోళ్ల మద్దతు పెరగడంతో భారీ లాభాల్లోకి వెళ్లింది.
మధ్యాహ్నం 2 గంటల సమయానికి సెన్సెక్స్‌ 1,095 పాయింట్లు పెరిగి 80,405 పాయింట్ల వద్ద ట్రేడవుతోంది. మరోవైపు నిఫ్టీ 259 పాయింట్లు లాభపడి 24,795 వద్ద కొనసాగుతోంది.
సెన్సెక్స్‌-30 సూచీలో మహీంద్రా అండ్‌ మహీంద్రా, ఐసీఐసీఐ బ్యాంక్‌, టైటాన్‌, హెచ్‌డీఎఫ్‌సీ బ్యాంక్‌, సన్‌ఫార్మా షేర్లు గణనీయమైన లాభాలను నమోదు చేస్తున్నాయి.
మరోవైపు పవర్‌గ్రిడ్‌ కార్పొరేషన్‌, బీఈఎల్‌, ఇండిగో, బజాజ్‌ ఫైనాన్స్‌, ఏషియన్‌ పెయింట్స్‌ షేర్లు నష్టాల్లో కొనసాగుతున్నాయి.
వివరాలు
మార్కెట్లు పెరగడానికి కారణాలివే..
అమెరికాలో రాజకీయ పరిణామాలు: అమెరికా మధ్యంతర ఎన్నికల్లో డెమోక్రాట్లు విజయం సాధించడంతో ఆర్టిఫిషియల్ ఇంటెలిజెన్స్ రంగంపై నియంత్రణలు మరింత కఠినమయ్యే అవకాశం ఉందన్న ఆందోళనలు వ్యక్తమవుతున్నాయి. ఈ నేపథ్యంలో ప్రపంచవ్యాప్తంగా టెక్నాలజీ కంపెనీల షేర్లలో అమ్మకాల ఒత్తిడి పెరిగింది. అయితే ఇదే పరిణామం భారత మార్కెట్లకు అనుకూలంగా మారుతుందని నిపుణులు విశ్లేషిస్తున్నారు. యాంటీ-ఏఐ సెంటిమెంట్‌ కారణంగా భారత్‌ ప్రయోజనం పొందే అవకాశాలున్నాయని అభిప్రాయపడుతున్నారు.
వివరాలు
మార్కెట్లు పెరగడానికి కారణాలివే..
విదేశీ పెట్టుబడుల వెల్లువ: విదేశీ సంస్థాగత మదుపర్లు (FII) గురువారం ఒక్కరోజే భారత మార్కెట్లలో రూ.14,975 కోట్ల విలువైన షేర్లను కొనుగోలు చేశారు. గత ఆరేళ్లలో ఒకే రోజు ఈ స్థాయిలో విదేశీ పెట్టుబడులు రావడం ఇదే తొలిసారి. భారీగా నిధులు రావడంతో మార్కెట్‌పై మదుపర్ల విశ్వాసం పెరిగి సానుకూల వాతావరణం ఏర్పడింది.
వివరాలు
మార్కెట్లు పెరగడానికి కారణాలివే..
మెరుగైన కంపెనీల ఫలితాలు: దేశీయ కంపెనీలు ప్రకటించిన రెండో త్రైమాసిక ఆర్థిక ఫలితాలు మార్కెట్‌ అంచనాలను మించాయి. దీంతో మదుపర్లలో కొనుగోళ్ల ఆసక్తి పెరిగింది. మరోవైపు గత కొంతకాలంగా లార్జ్‌క్యాప్‌ కంపెనీల షేర్లు గణనీయంగా పడిపోయాయి. ప్రస్తుత ధరల వద్ద అవి ఆకర్షణీయంగా కనిపిస్తుండటంతో మదుపర్లు వాటిని కొనుగోలు చేసేందుకు ఆసక్తి చూపిస్తున్నారు. ఈ అంశాలు కూడా దేశీయ స్టాక్‌ మార్కెట్ల ర్యాలీకి ప్రధాన కారణాలుగా విశ్లేషకులు పేర్కొంటున్నారు.