New Airfare Rules: విమాన టికెట్ ధరల నియంత్రణకు నిబంధనలు ఖరారు.. కేంద్రం కీలక ప్రకటన
ఈ వార్తాకథనం ఏంటి
విమాన టికెట్ ధరలను నియంత్రించేందుకు నిబంధనలను ఖరారు చేసినట్లు కేంద్ర ప్రభుత్వం శుక్రవారం సుప్రీంకోర్టుకు తెలిపింది. మరో రెండు వారాల్లో వీటిని అధికారికంగా ప్రచురిస్తామని వెల్లడించింది. ఈ నిబంధనలను నవంబర్ 16న జరిగే తదుపరి విచారణకు ముందు కోర్టు ముందు ఉంచాలని సుప్రీంకోర్టు కేంద్రాన్ని ఆదేశించింది. ప్రైవేటు విమానయాన సంస్థలు ఇష్టానుసారంగా, అధిక ధరలకు టికెట్లు విక్రయిస్తున్నాయనే అంశంపై దాఖలైన ప్రజాప్రయోజన వ్యాజ్యాన్ని(PIL)సుప్రీంకోర్టు విచారించింది. జస్టిస్ విక్రమ్ నాథ్, జస్టిస్ ఆర్. మహదేవన్, జస్టిస్ అపరేశ్ సింగ్‌లతో కూడిన ధర్మాసనం ముందు సొలిసిటర్ జనరల్ తుషార్ మెహతా ప్రభుత్వ తరఫున వాదనలు వినిపించారు. విమాన టికెట్ ధరల నియంత్రణకు సంబంధించిన నిబంధనలను ఖరారు చేశామని,వాటికి పరిపాలనా ఆమోదం కూడా లభించిందని ఆయన తెలిపారు.
వివరాలు
నిబంధనలు పాటించని విమానయాన సంస్థలపై చర్యలు
రెండు వారాల్లో వాటిని ప్రచురిస్తామని కోర్టుకు వివరించారు. దీంతో ప్రచురించిన నిబంధనలను నవంబర్ 16న తమ ముందు ఉంచాలని ధర్మాసనం ఆదేశించింది.
గత ఆగస్టులో జరిగిన విచారణ సందర్భంగా కూడా సుప్రీంకోర్టు విమాన టికెట్ ధరల అంశంపై కీలక వ్యాఖ్యలు చేసింది.
నిబంధనలు పాటించని విమానయాన సంస్థల విమానాలను నిలిపివేయాలని కేంద్రాన్ని ఆదేశించింది.
తుది నిబంధనలు సిద్ధమయ్యే వరకు టికెట్ ధరల విషయంలో విమానయాన సంస్థలకు కార్యాలయ ఉత్తర్వులు (Office Memorandums) జారీ చేస్తున్నామని అప్పట్లో కేంద్రం కోర్టుకు తెలిపింది.
అయితే, విమానయాన సంస్థలు ఈ ఆదేశాలను పాటించడం లేదని పౌర విమానయాన మంత్రిత్వ శాఖ కోర్టు దృష్టికి తీసుకెళ్లింది.
వివరాలు
ఇండిగో మాతృసంస్థ షేర్లు పతనం
విమాన టికెట్ ధరల నియంత్రణకు సంబంధించి ప్రభుత్వం రూపొందించిన ముసాయిదా నిబంధనలను కూడా సుప్రీంకోర్టు గతంలో పరిశీలించింది.
వీటిని ప్రభుత్వం సీల్డ్ కవర్‌లో కోర్టుకు సమర్పించింది.
మరోవైపు, విమాన టికెట్ ధరల నియంత్రణకు సంబంధించిన పరిణామాల నేపథ్యంలో ఇండిగో విమానయాన సంస్థ మాతృసంస్థ ఇంటర్‌గ్లోబ్ ఏవియేషన్ షేర్లు స్టాక్ మార్కెట్‌లో నష్టాలను చవిచూశాయి.
శుక్రవారం మధ్యాహ్నం 1.19 గంటల సమయానికి నేషనల్ స్టాక్ ఎక్స్ఛేంజ్‌ (NSE)లో ఈ కంపెనీ షేరు 2.86 శాతం పడిపోయి రూ.4,641.50 వద్ద ట్రేడయింది.