ఆర్థిక సర్వే 2023: బడ్జెట్ వేళ ఆర్థిక సర్వే ప్రాముఖ్యతను తెలుసుకోండి
ఈ వార్తాకథనం ఏంటి
కేంద్ర బడ్జెట్-2023 సమావేశాలు మంగళవారం ప్రారంభయ్యమాయి. ఈ క్రమంలో 'ఆర్థిక సర్వే 2023'ను కేంద్ర ఆర్థిక మంత్రి నిర్మలా సీతారామన్ లోక్‌సభలో ప్రవేశపెట్టారు. రాష్ట్రపతి ప్రసంగం అనంతరం ఆర్థిక సర్వేను నిర్మల లోక్‌సభ ముందుంచారు. బడ్జెట్ సమావేశాల నేపథ్యంలో ఆర్థిక సర్వే ప్రముఖ్యత, చరిత్రను ఇప్పుడు తెలుసుకుందాం.
గత ఆర్థిక సంవత్సరంలో జరిగిన అభివృద్ధికి సంబంధించిన సమాచారాన్ని ఆర్థిక సర్వే క్రోడీకరించి అందిస్తుంది. ఒక రకంగా చెప్పాలంటే దేశ ఆర్థిక వ్యవస్థకు ఇది రోడ్ మ్యాప్ లాంటిది అన్నమాట. భారత ఆర్థిక వ్యవస్థ, వ్యవసాయం పరిస్థితి , ఎగుమతులు, దిగుమతులు, మారక నిల్వలు, పారిశ్రామికాభివృద్ధి ఇలా అనేక రంగాలను విశ్లేషించి ప్రధాన ఆర్థిక సలహాదారు(సీఈఏ) ఆధ్వర్యంలో ఆర్థిక సర్వే రిపోర్టును తయారు చేస్తారు.
ఆర్థిక సర్వే
1960నుంచి కొనసాగుతున్న ఆనవాయితీ
మొదటి ఆర్థిక సర్వే 1950-51లో ప్రవేశ పెట్టారు. అప్పుడు బడ్జెట్‌తో కలిపి సర్వేను ప్రవేశ‌పెట్టే వారు. 1960లో బడ్జెట్ పత్రాల నుంచి ఆర్థిక సర్వేను వేరు చేశారు. బడ్జెట్‌కు ఒక‌రోజు ముందు సమర్పించడం మొదలు పెట్టారు. అప్పటి నుంచి ఆ ఆనవాయితీ కొనసాగుతూ వస్తోంది.
గతంలో ఆర్థిక సర్వేను ఒక వాల్యూమ్‌గా సిద్ధం చేసేవారు. వ్యవసాయ, తయారీ రంగాలు, ఆర్థిక పరిణామాలు, ద్రవ్యోల్బణం వంటి కీలక అంశాల గురించి, వాటి పాలసీల గురించి విపులంగా ఒక వాల్యూమ్‌లో చెప్పడం కష్టమవుతుందని 2010-11 నుంచి ఆర్థిక సర్వేను రెండు వాల్యూమ్‌లు సిద్ధం చేయడం ప్రారంభించారు.
సీఈఏగా అనంత నాగేశ్వరన్ బాధ్యతలు చేపట్టాక గత బడ్జెట్ నుంచి సర్వేను తిరిగి ఒక వాల్యూమ్‌గా ముద్రిస్తున్నారు.