EPFO: పీఎఫ్ ఖాతాదారు మరణిస్తే కుటుంబానికి మూడు ప్రయోజనాలు.. క్లెయిమ్ విధానం ఇదే..
ఈ వార్తాకథనం ఏంటి
ఉద్యోగుల భవిష్య నిధి సంస్థ (EPFO) పరిధిలో పనిచేసే ఉద్యోగులకు పీఎఫ్తో పాటు వారి కుటుంబానికి ఆర్థిక భద్రత కల్పించే పలు పథకాలు ఉన్నాయి. ఈపీఎఫ్ సభ్యుడు సర్వీసులో ఉండగా లేదా అనంతరం మరణించిన సందర్భంలో అర్హులైన కుటుంబ సభ్యులు పీఎఫ్ మొత్తం, పెన్షన్, బీమా వంటి ప్రయోజనాలను పొందవచ్చు. వీటిని సరైన విధానంలో క్లెయిమ్ చేసుకోవడం ద్వారా కుటుంబానికి ఆర్థికంగా కొంత భరోసా లభిస్తుంది. కుటుంబానికి అందే మూడు కీలక ప్రయోజనాలు ఈపీఎఫ్ సభ్యుడు మరణించిన తర్వాత ఆయన నామినీ లేదా అర్హులైన కుటుంబ సభ్యులకు మూడు ప్రధాన ప్రయోజనాలు అందే అవకాశం ఉంటుంది. అవి పీఎఫ్ మొత్తం, కుటుంబ పెన్షన్, ఈడీఎల్ఐ బీమా ప్రయోజనం.
వివరాలు
1. పీఎఫ్ మొత్తం
మరణించిన సభ్యుడి ఈపీఎఫ్ ఖాతాలో ఉన్న మొత్తాన్ని, వర్తించే వడ్డీతో కలిపి నామినీ లేదా అర్హులైన కుటుంబ సభ్యులకు చెల్లిస్తారు.
ఇది ఒకేసారి అందే మొత్తం. దీనికోసం సాధారణంగా 'ఫారం 20' ద్వారా క్లెయిమ్ చేయాల్సి ఉంటుంది.
2. కుటుంబ పెన్షన్
ఉద్యోగి ఈపీఎస్ పరిధిలో అర్హత సాధించి ఉంటే, ఆయన మరణం తర్వాత అర్హులైన జీవిత భాగస్వామికి నెలవారీ పెన్షన్ లభిస్తుంది.
నిబంధనలకు అనుగుణంగా పిల్లలకు కూడా పెన్షన్ ప్రయోజనం అందే అవకాశం ఉంటుంది. దీనినే సర్వైవర్ లేదా కుటుంబ పెన్షన్గా పేర్కొంటారు.
ఈ ప్రయోజనం కోసం 'ఫారం 10D' సమర్పించాలి. కుటుంబానికి ఇది నిరంతర ఆదాయ వనరుగా ఉపయోగపడుతుంది.
వివరాలు
3. ఈడీఎల్ఐ బీమా ప్రయోజనం
ఈపీఎఫ్ సభ్యుడు ఉద్యోగంలో కొనసాగుతున్న సమయంలో మరణిస్తే, ఆయన కుటుంబానికి ఉద్యోగుల డిపాజిట్ లింక్డ్ ఇన్సూరెన్స్ (EDLI) పథకం ద్వారా బీమా ప్రయోజనం లభిస్తుంది.
ఈ పథకం కింద గరిష్ఠంగా రూ.7 లక్షల వరకు బీమా ప్రయోజనం పొందే అవకాశం ఉంది.
ఈ పథకానికి ఉద్యోగి తన జీతం నుంచి ప్రత్యేకంగా ప్రీమియం చెల్లించాల్సిన అవసరం లేదు. ఈడీఎల్ఐ క్లెయిమ్ కోసం 'ఫారం 5IF' ఉపయోగిస్తారు.
వివరాలు
ఎవరు క్లెయిమ్ చేసుకోవచ్చు?
ఈపీఎఫ్ ప్రయోజనాల విషయంలో సభ్యుడు ముందుగా నమోదు చేసిన నామినీకి ప్రాధాన్యత ఉంటుంది.
అయితే నామినేషన్ నమోదు చేయకపోయినా, అది చెల్లుబాటు కాకపోయినా అర్హులైన కుటుంబ సభ్యులు లేదా చట్టపరమైన వారసులు క్లెయిమ్ చేసుకోవచ్చు.
జీవిత భాగస్వామి, పిల్లలు వంటి కుటుంబ సభ్యులు సంబంధిత నిబంధనలకు అనుగుణంగా ప్రయోజనాలకు అర్హత పొందవచ్చు.
నామినీ లేకపోతే లేదా చట్టపరమైన వారసులు క్లెయిమ్ చేస్తున్న సందర్భాల్లో అవసరమైన వారసత్వ ధ్రువీకరణ పత్రాలను సమర్పించాల్సి రావచ్చు.
వివరాలు
క్లెయిమ్ ఎలా చేయాలి?
ఈపీఎఫ్ మరణ ప్రయోజనాల క్లెయిమ్ను ఆన్లైన్ లేదా ఆఫ్లైన్ విధానంలో చేసుకోవచ్చు.
ఆన్లైన్లో ఈపీఎఫ్ఓకు సంబంధించిన సభ్యుల సేవల ద్వారా దరఖాస్తు చేసుకునే అవకాశం ఉంది.
ప్రక్రియను ప్రారంభించే ముందు అవసరమైన పత్రాలను సిద్ధంగా ఉంచుకోవడం వల్ల క్లెయిమ్లో ఆలస్యం తగ్గుతుంది.
సాధారణంగా అవసరమయ్యే పత్రాలు ఇవే.. మరణించిన ఈపీఎఫ్ సభ్యుడి మరణ ధ్రువీకరణ పత్రం సభ్యుడి 12 అంకెల యూనివర్సల్ అకౌంట్ నంబర్ (UAN) నామినీ లేదా క్లెయిమ్ చేస్తున్న కుటుంబ సభ్యుడి ఆధార్ వివరాలు పేరు, పుట్టిన తేదీ వంటి గుర్తింపు వివరాలు లబ్ధిదారుడి బ్యాంకు ఖాతా వివరాలు రద్దు చేసిన చెక్కు లేదా బ్యాంకు పాస్బుక్ కాపీ
వివరాలు
కుటుంబ సభ్యులు ఏం చేయాలి?
క్లెయిమ్ పరిస్థితిని బట్టి పిల్లల వయసు ధ్రువీకరణ పత్రం, ఫ్యామిలీ మెంబర్ సర్టిఫికెట్, లీగల్ హెయిర్ సర్టిఫికెట్ వంటి అదనపు పత్రాలు కూడా అవసరం కావచ్చు.
ఉద్యోగి మరణించిన వెంటనే ఆయన పనిచేసిన చివరి సంస్థ లేదా యాజమాన్యానికి సమాచారం అందించడం మంచిది.
అనంతరం పీఎఫ్, పెన్షన్, ఈడీఎల్ఐ ప్రయోజనాలకు సంబంధించిన క్లెయిమ్ ప్రక్రియను ప్రారంభించాలి.
పీఎఫ్ క్లెయిమ్ సాధారణంగా త్వరగా పరిష్కారమయ్యే అవకాశం ఉన్నప్పటికీ, పెన్షన్ లేదా ఈడీఎల్ఐ క్లెయిమ్లకు పత్రాల పరిశీలన కారణంగా కొంత సమయం పట్టవచ్చు.
నిబంధనలు, అవసరమైన పత్రాలు, క్లెయిమ్ విధానాల్లో మార్పులు ఉండే అవకాశం ఉన్నందున దరఖాస్తు చేసే ముందు అధికారిక ఈపీఎఫ్ఓ సమాచారం పరిశీలించడం లేదా సమీప ప్రాంతీయ కార్యాలయాన్ని సంప్రదించడం మంచిది.