EPF Interest Rate:ఈపీఎఫ్‌ డిపాజిట్లపై 8.25 శాతం వడ్డీ రేటు
ఈ వార్తాకథనం ఏంటి
ఉద్యోగుల భవిష్య నిధి (EPF) ఖాతాలలో నిల్వలపై వడ్డీ రేటును నిర్ణయించారు.
2024-25 ఆర్థిక సంవత్సరానికి కూడా 8.25 శాతం వడ్డీరేటును (Interest Rate) కొనసాగించాలని నిర్ణయించారు.
ఈ విషయాన్ని శుక్రవారం నిర్వహించిన సెంట్రల్ బోర్డ్ ఆఫ్ ట్రస్టీస్ (CBT) సమావేశంలో ఆమోదించారని ఈపీఎఫ్‌వో (EPFO) వర్గాలు వెల్లడించాయి.
2023-24 ఆర్థిక సంవత్సరంలోనూ ఇదే వడ్డీ రేటును అమలు చేసిన సంగతి తెలిసిందే.
సీబీటీ తీసుకున్న ఈ నిర్ణయాన్ని కేంద్ర ఆర్థిక శాఖకు పంపనున్నారు.
ప్రభుత్వ అనుమతి లభించిన తర్వాత,ఈపీఎఫ్‌ఓ వడ్డీ రేటును అధికారికంగా ప్రకటిస్తుంది.
ఆ తర్వాత, 7కోట్ల మంది చందాదారుల ఖాతాల్లో వడ్డీ మొత్తాన్ని జమ చేయనుంది.
సీబీటీ ప్రతిపాదనలపై కేంద్ర ఆర్థిక శాఖ త్వరలో నిర్ణయం తీసుకోనున్నట్లు సమాచారం.
వివరాలు
గత పదేళ్లలో ఈపీఎఫ్‌ (EPF) వడ్డీ రేట్లు ఇలా ఉన్నాయి..
ఇదివరకు, 2022 మార్చిలో 2021-22 ఆర్థిక సంవత్సరానికి గాను ఈపీఎఫ్‌ వడ్డీ రేటును 8.1 శాతానికి తగ్గించారు.
1977-78 తర్వాత ఇంత తక్కువ స్థాయికి చేరుకోవడం విశేషం.
అనంతరం రెండు సంవత్సరాల పాటు స్వల్పంగా పెంచిన ఈపీఎఫ్‌ఓ, తాజాగా 8.25 శాతంగా నిలిపినట్లు గమనించవచ్చు.
2014-15 : 8.75 శాతం
2015-16 : 8.8 శాతం
2016-17 : 8.65 శాతం
2017-18 : 8.55 శాతం
2018-19 : 8.65 శాతం
2019-20 : 8.5 శాతం
2020-21 : 8.5 శాతం
2021-22 : 8.1 శాతం
2022-23 : 8.15 శాతం
2023-24 : 8.25 శాతం