EPS 2026: పెన్షనర్లకు ఊరట.. EPS 1995, EFPS 1971 ప్రయోజనాలు యథాతథం
ఈ వార్తాకథనం ఏంటి
ఉద్యోగుల పెన్షన్ స్కీమ్ (EPS) 1995,ఉద్యోగుల కుటుంబ పెన్షన్ స్కీమ్ (EFPS) 1971 కింద ప్రస్తుతం పెన్షన్ పొందుతున్న వారందరికీ కొత్తగా ప్రకటించిన ఉద్యోగుల పెన్షన్ స్కీమ్ (EPS) 2026 కింద కూడా అదే పెన్షన్తో పాటు సంబంధిత ప్రయోజనాలు కొనసాగుతాయని కేంద్ర ప్రభుత్వం స్పష్టం చేసింది. కొత్త పథకం అమలుతో పాత లబ్ధిదారుల ప్రయోజనాలపై ఎలాంటి ప్రభావం ఉంటుందనే సందేహాలకు ప్రభుత్వం ఈ ప్రకటనతో తెరదించింది. లోక్సభలో మే 27న ఇచ్చిన లిఖితపూర్వక సమాధానంలో కేంద్ర కార్మిక,ఉపాధి శాఖ సహాయ మంత్రి శోభా కరంద్లాజే ఈ విషయాన్ని వెల్లడించారు.
వివరాలు
ఇప్పటికే సంపాదించుకున్న పెన్షన్ హక్కుల్లో ఎలాంటి కోత ఉండదు
EPS 2026 అమల్లోకి వచ్చినప్పటికీ,ఇప్పటికే EPS 1995, EFPS 1971 కింద పొందుతున్న పెన్షన్ హక్కులు, ఇతర ప్రయోజనాలు పూర్తిగా రక్షించబడతాయని ఆమె పేర్కొన్నారు.
కొత్త పథకం ద్వారా పాత రెండు పథకాల స్థానంలో ఒకే విధానాన్ని అమలు చేస్తున్నప్పటికీ, ఇప్పటికే సంపాదించుకున్న పెన్షన్ హక్కుల్లో ఎలాంటి కోత ఉండదని స్పష్టం చేశారు.
ఈ వివరణ పెన్షనర్లు, ఉద్యోగులు, పదవీ విరమణకు సిద్ధమవుతున్న వారికి ఎంతో కీలకంగా మారింది.
కొత్త పథకం కారణంగా తమ పెన్షన్ తగ్గుతుందా లేదా మార్పులు వస్తాయా అనే అనుమానాలు తొలగిపోవడంతో పాటు, భవిష్యత్ పదవీ విరమణ ప్రణాళికలు రూపొందించుకునేందుకు కూడా ఇది ఉపయోగపడనుంది.
వివరాలు
జూన్ 29 నుంచి అమల్లోకి వచ్చిన EPS 2026
ఎంపీ సుధీర్ గుప్త అడిగిన ప్రశ్నకు సమాధానంగా మంత్రి మాట్లాడుతూ, EPS 2026లో ప్రస్తుతం ఉన్న పెన్షన్ నిధి కొనసాగుతుందని, గత పథకాల కింద లభించిన అన్ని ప్రయోజనాలను కాపాడేందుకు ప్రత్యేకంగా చర్యలు తీసుకున్నట్లు తెలిపారు.
అదే సమయంలో కొత్త పథకంలో పెన్షన్ పంపిణీ విధానాన్ని మరింత ఆధునికంగా మార్చారు.
గుర్తింపు పొందిన సంస్థల ద్వారా డిజిటల్, ఎలక్ట్రానిక్ విధానాల్లో పెన్షన్ చెల్లింపులు చేసే అవకాశాన్ని కల్పించారు.
అలాగే ఈ పథకాన్ని సోషల్ సెక్యూరిటీ కోడ్-2020 నిబంధనలకు అనుగుణంగా రూపొందించారు.
EPS 2026 అధికారికంగా 2026 జూన్ 29 నుంచి అమల్లోకి వచ్చినట్లు ప్రభుత్వం వెల్లడించింది.
వివరాలు
కీలకమైన నిబంధనల్లో ఎలాంటి మార్పులు లేవు
కొత్త పథకం ప్రధానంగా పెన్షన్ నిర్వహణ వ్యవస్థను ఆధునికీకరించడంపైనే దృష్టి పెట్టింది. అయితే కీలకమైన నిబంధనల్లో ఎలాంటి మార్పులు చేయలేదు.
పెన్షన్ లెక్కించే విధానం, కనీస పెన్షన్ మొత్తం, ఉద్యోగి-యజమాని చెల్లించే విరాళాల రేట్లు యథాతథంగానే కొనసాగుతాయి.
EPS 2026లో కూడా నెలవారీ పెన్షన్ను పాత విధానంలోనే లెక్కిస్తారు. దాని ప్రకారం నెలవారీ పెన్షన్ = (పెన్షన్కు అర్హమైన జీతం × పెన్షన్ సేవా కాలం) ÷ 70 అనే సూత్రం అమల్లో ఉంటుంది.
అలాగే పెన్షన్కు అర్హమైన జీతంగా, ఉద్యోగి పెన్షన్ ఫండ్ నుంచి నిష్క్రమించే ముందు చివరి 60 నెలల సగటు నెలవారీ వేతనాన్నే పరిగణనలోకి తీసుకుంటారు.