lpg consumption: వార్ ఎఫెక్ట్తో గ్యాస్ డిమాండ్ డౌన్.. మార్చిలో 13శాతం డౌన్
ఈ వార్తాకథనం ఏంటి
పశ్చిమాసియాలో కొనసాగుతున్న ఉద్రిక్త పరిస్థితుల కారణంగా ఇంధన సరఫరా వ్యవస్థపై తీవ్ర ప్రభావం పడింది. ముఖ్యంగా వంటగ్యాస్ సరఫరాలో అంతరాయం స్పష్టంగా కనిపిస్తోంది. భారత్లో మార్చి నెలలో ఎల్పీజీ వినియోగం గణనీయంగా తగ్గింది. పెట్రోలియం ప్రణాళిక, విశ్లేషణ సెల్ (పీపీఏసీ) గణాంకాల ప్రకారం, గతేడాది ఇదే కాలంలో 2.729 మిలియన్ టన్నులుగా ఉన్న ఎల్పీజీ వినియోగం, ఈసారి 12.8శాతం తగ్గి 2.379 మిలియన్ టన్నులకు పడిపోయింది. దేశం తన ఎల్పీజీ అవసరాల కోసం ప్రధానంగా దిగుమతులపై ఆధారపడటం, అలాగే కీలక సరఫరా మార్గమైన హర్ముజ్ జలసంధిపై ఆధారపడటం ఈ పరిస్థితికి ప్రధాన కారణాలుగా భావిస్తున్నారు. పశ్చిమాసియాలో నెలకొన్న సంక్షోభం కారణంగా సరఫరా గొలుసులో ఆటంకాలు ఏర్పడి, దేశంలో గ్యాస్ అందుబాటుపై ప్రభావం చూపింది.
వివరాలు
దేశీయ ఉత్పత్తిని పెంచేందుకు చర్యలు
దీని ప్రభావంగా గృహ అవసరాలకు వినియోగించే డొమెస్టిక్ సిలిండర్ల విక్రయాలు 8.1 శాతం తగ్గాయి. ఇక వాణిజ్య అవసరాల కోసం వినియోగించే నాన్-డొమెస్టిక్ సిలిండర్ల విక్రయాలు 48 శాతం పడిపోయాయి. బల్క్ ఎల్పీజీ విక్రయాలు మరింతగా తగ్గి 75.5 శాతం క్షీణించాయి. గ్యాస్ కొరతను ఎదుర్కొనేందుకు భారత్ ప్రత్యామ్నాయ మార్గాలను అన్వేషిస్తోంది. ఈ నేపథ్యంలో దేశీయ ఉత్పత్తిని పెంచేందుకు చర్యలు చేపట్టింది. 2025-26 ఆర్థిక సంవత్సరంలో ఎల్పీజీ ఉత్పత్తి 12.8 మిలియన్ టన్నుల నుంచి 13.1 మిలియన్ టన్నులకు పెరిగినట్లు ప్రభుత్వం వెల్లడించింది.
వివరాలు
పెట్రోల్, డీజిల్కు డిమాండ్
ఇక చమురు కొరత ఏర్పడుతుందన్న ఆందోళనతో పెట్రోల్, డీజిల్కు డిమాండ్ పెరిగింది. మార్చి నెలలో పెట్రోల్ విక్రయాలు 7.6 శాతం పెరిగి 3.78 మిలియన్ టన్నులకు చేరగా, డీజిల్ వినియోగం 8.1 శాతం పెరిగి 8.727 మిలియన్ టన్నులకు చేరింది. పూర్తి ఆర్థిక సంవత్సరం (2025-26) గణాంకాల ప్రకారం, ఏటీఎఫ్ (విమాన ఇంధనం) విక్రయాలు 2 శాతం పెరిగి 9.161 మిలియన్ టన్నులకు చేరాయి. అదే సమయంలో పెట్రోల్ వినియోగం 6.5 శాతం పెరిగి 42.586 మిలియన్ టన్నులకు, డీజిల్ విక్రయాలు 3.6 శాతం పెరిగి 94.705 మిలియన్ టన్నులకు చేరినట్లు వెల్లడైంది.