Gold Rate: భారీగా పెరిగిన పసిడి ధర.. ఔన్సు బంగారం ధర 4,495 డాలర్లు
ఈ వార్తాకథనం ఏంటి
దేశీయ మార్కెట్లో బంగారం,వెండి ధరలు రోజుకో కొత్త గరిష్ఠాలను నమోదు చేస్తూ దూసుకుపోతున్నాయి. హైదరాబాద్ బులియన్ మార్కెట్లో బుధవారం 24 క్యారెట్ల స్వచ్ఛమైన బంగారం 10 గ్రాముల ధర రూ.1,41,150కి చేరి రికార్డు స్థాయిని తాకింది. వెండి కూడా అదే బాటలో పరుగులు తీస్తోంది.కేజీ వెండి ధర ఏకంగా రూ.2,25,393గా నమోదైంది (Hyderabad Gold Price). అంతర్జాతీయంగా కూడా పసిడి,వెండి ధరలు ఆకాశాన్ని అంటుతున్నాయి. గ్లోబల్ మార్కెట్లో ఔన్సు బంగారం ధర 4,495 డాలర్లకు చేరగా,వెండి ఔన్సు ధర 72.22 డాలర్లుగా ఉంది. నేటి ట్రేడింగ్లో ఒక దశలో బంగారం ధర 4,500 డాలర్లను దాటడం విశేషం. ఈ ఉదయం స్పాట్ మార్కెట్లో ఔన్సు పసిడి ధర 4,507.27 డాలర్ల స్థాయికి ఎగబాకింది.
వివరాలు
బంగారం ధర ఇప్పటికే సుమారు 70 శాతం వరకు పెరిగినట్లు గణాంకాలు
ఈ ఏడాది ప్రారంభం నుంచి చూస్తే బంగారం ధర ఇప్పటికే సుమారు 70 శాతం వరకు పెరిగినట్లు గణాంకాలు చెబుతున్నాయి. వచ్చే ఏడాది అమెరికా ఫెడరల్ రిజర్వ్ మరోసారి వడ్డీ రేట్ల తగ్గింపుకు అవకాశం ఉందన్న అంచనాలు బలపడటంతో,మదుపర్లు బంగారం, వెండిని భద్రమైన పెట్టుబడులుగా చూస్తున్నారు. ఇదే ఈ లోహాల ధరల పెరుగుదలకు ప్రధాన కారణంగా నిపుణులు పేర్కొంటున్నారు. దీనికి తోడు, ప్రపంచవ్యాప్తంగా కొనసాగుతున్న భౌగోళిక రాజకీయ అనిశ్చితులు కూడా పసిడి, వెండి ధరలను మరింత ఎత్తుకు నెట్టుతున్నాయి.