India's Bullet Train: భూకంపం వస్తే బుల్లెట్ రైలు ఏం చేస్తుంది?
ఈ వార్తాకథనం ఏంటి
ముంబై-అహ్మదాబాద్ మధ్య పరుగులు పెట్టనున్న భారత బుల్లెట్ రైలు ప్రాజెక్టులో వేగంతో పాటు ప్రయాణికుల భద్రతకూ అత్యంత ప్రాధాన్యం ఇస్తున్నారు. గంటకు వందల కిలోమీటర్ల వేగంతో రైలు ప్రయాణించే మార్గంలో భూకంపం వంటి ప్రకృతి విపత్తులు సంభవిస్తే పరిస్థితిని ఎలా నియంత్రించాలన్న దానిపై ప్రత్యేక భద్రతా వ్యవస్థను సిద్ధం చేస్తున్నారు. ఇందులో భాగంగా మొత్తం 28సీస్మోమీటర్లను ఏర్పాటు చేయనున్నారు. 320 కిలోమీటర్ల వేగంతో ప్రయాణం ముంబై-అహ్మదాబాద్ హైస్పీడ్ రైలు కారిడార్ 508కిలోమీటర్ల పొడవున నిర్మితమవుతోంది. ఈ మార్గంలో బుల్లెట్ రైలు గరిష్ఠంగా గంటకు 320కిలోమీటర్ల వేగంతో ప్రయాణించనుంది. రైలు డిజైన్ వేగం గంటకు 350 కిలోమీటర్లుగా ఉంది. తొలిదశలో సూరత్-వాపి మధ్య 97 కిలోమీటర్ల మార్గంలో సేవలను ప్రారంభించేందుకు రైల్వే ప్రణాళికలు రూపొందిస్తోంది.
వివరాలు
భూకంపం వస్తే రైలు ఏం చేస్తుంది?
B28 ట్రైన్ సెట్గా పిలిచే తొలి బుల్లెట్ రైలును 2027 ఆగస్టు 15న ప్రారంభించాలని భావిస్తున్నారు.
హైస్పీడ్ రైలు ప్రయాణిస్తున్న సమయంలో భూకంపం సంభవిస్తే తీవ్ర పరిణామాలు చోటుచేసుకునే అవకాశం ఉంటుంది.
సాధారణ రైళ్లతో పోలిస్తే బుల్లెట్ రైళ్లు అత్యంత వేగంగా ప్రయాణిస్తాయి. అందువల్ల భూకంప ప్రకంపనలు గుర్తించిన వెంటనే స్పందించడం కీలకం.
ఈ నేపథ్యంలో బుల్లెట్ రైలు కారిడార్లో ప్రత్యేక భూకంప గుర్తింపు వ్యవస్థను ఏర్పాటు చేస్తున్నారు.
భూమిలో ప్రకంపనలు ప్రారంభమైనట్లు సీస్మోమీటర్లు గుర్తించిన వెంటనే సంబంధిత భద్రతా వ్యవస్థ అప్రమత్తమవుతుంది.
ప్రభావిత ప్రాంతానికి విద్యుత్ సరఫరాను ఆటోమేటిక్గా నిలిపివేస్తుంది. విద్యుత్ సరఫరాలో మార్పును రైలు గుర్తించిన తర్వాత ఎమర్జెన్సీ బ్రేకులు పనిచేస్తాయి.
వివరాలు
సీస్మోమీటర్లను ఎక్కడ ఏర్పాటు చేస్తారు?
దీంతో భూకంప ప్రభావిత ప్రాంతంలో ప్రయాణిస్తున్న రైలును వేగం తగ్గించి సురక్షితంగా నిలిపేందుకు అవకాశం ఉంటుంది.
ఈ భద్రతా వ్యవస్థలో భాగంగా మొత్తం 28 సీస్మోమీటర్లను ఏర్పాటు చేయనున్నారు.
వాటిలో 22 పరికరాలను రైల్వే మార్గానికి సంబంధించిన ట్రాక్షన్ సబ్స్టేషన్లు, స్విచింగ్ పోస్టుల వద్ద ఏర్పాటు చేస్తారు.
మహారాష్ట్రలోని ముంబై, థానే, విరార్, బోయిసార్ ప్రాంతాల్లో ఎనిమిది సీస్మోమీటర్లను ఏర్పాటు చేయనున్నారు.
గుజరాత్లోని వాపి, బిలిమోరా, సూరత్, భరూచ్, వడోదర, ఆనంద్, మహేమదాబాద్, అహ్మదాబాద్ ప్రాంతాల్లో మరో 14 పరికరాలను ఏర్పాటు చేయనున్నారు.
వివరాలు
భూకంప భద్రతా వ్యవస్థలో మరో ఆరు అంతర్గత సీస్మోమీటర్లు
భూకంప భద్రతా వ్యవస్థలో మరో ఆరు అంతర్గత సీస్మోమీటర్లు కూడా కీలకంగా ఉండనున్నాయి.
వీటిని నేరుగా రైల్వే మార్గం వద్ద కాకుండా భూకంప ప్రమాదం ఎక్కువగా ఉన్న ప్రాంతాల్లో ఏర్పాటు చేయనున్నారు.
గత 100 ఏళ్లలో బుల్లెట్ రైలు మార్గానికి సమీపంలో 5.5 కంటే ఎక్కువ తీవ్రతతో భూకంపాలు నమోదైన ప్రాంతాలను పరిగణనలోకి తీసుకుని ఈ పరికరాల కోసం ప్రదేశాలను ఎంపిక చేశారు.
మహారాష్ట్రలోని ఖేడా, రత్నగిరి, లాతూర్, పాంగ్రి, గుజరాత్లోని ఆదేసర్, ఓల్డ్ భుజ్ ప్రాంతాల్లో ఈ ఆరు సీస్మోమీటర్లను ఏర్పాటు చేయనున్నారు.
వివరాలు
జపాన్ అనుభవంతో కీలక భద్రతా వ్యవస్థ
బుల్లెట్ రైలు కోసం ఏర్పాటు చేస్తున్న ఈ భూకంప గుర్తింపు వ్యవస్థను జపాన్ షింకన్సెన్ సాంకేతికత ఆధారంగా అభివృద్ధి చేస్తున్నారు.
జపాన్ నిపుణులు ఎంపిక చేసిన ప్రాంతాల్లో ప్రత్యేక సర్వేలు నిర్వహించారు.
నేలలో చోటుచేసుకునే సూక్ష్మ ప్రకంపనలను పరిశీలించి సెన్సార్లను ఏర్పాటు చేసేందుకు అనువైన ప్రదేశాలను గుర్తించారు.
ఈ వ్యవస్థ ఉద్దేశం భూకంపం పూర్తిగా సంభవించిన తర్వాత స్పందించడం మాత్రమే కాదు.
వివరాలు
జపాన్ అనుభవంతో కీలక భద్రతా వ్యవస్థ
భూమిలో ప్రకంపనలు ప్రారంభమైన విషయాన్ని వీలైనంత త్వరగా గుర్తించి, రైలు వేగాన్ని నియంత్రించేందుకు ముందస్తు చర్యలు తీసుకోవడం దీని ప్రధాన లక్ష్యం.
బుల్లెట్ రైలు ప్రాజెక్టులో అత్యంత వేగంతో ప్రయాణించడం ఎంత ముఖ్యమో.. అత్యవసర పరిస్థితుల్లో అదే వేగాన్ని సురక్షితంగా నియంత్రించడం కూడా అంతే కీలకం.
అందుకే భూకంపాలు వంటి ప్రకృతి వైపరీత్యాల ముప్పును దృష్టిలో పెట్టుకుని ముంబై-అహ్మదాబాద్ హైస్పీడ్ రైలు కారిడార్లో ప్రత్యేక భద్రతా వ్యవస్థను ఏర్పాటు చేస్తున్నారు.