2023లో ప్రపంచ ఆర్థిక వృద్ధిలో సగం వాటా భారత్, చైనాలదే: ఐఎంఎఫ్
ఈ వార్తాకథనం ఏంటి
గత ఏడాది మాదిరిగానే ప్రపంచ ఆర్థిక వ్యవస్థలో తీవ్ర మందగమనం 2023లో కూడా కొనసాగుతుందని అంతర్జాతీయ ద్రవ్య నిధి (ఐఎంఎఫ్) మేనేజింగ్ డైరెక్టర్ క్రిస్టాలినా జార్జివా హెచ్చరించారు.
2023లో ప్రపంచ ఆర్థిక వ్యవస్థ 3శాతం కంటే తక్కువ వృద్ధి చెందుతుందని అంచనా వేశారు. ఈ వృద్ధిలో భారత్, చైనాల వాటనే సగం ఉంటుందని ఆమె అన్నారు.
2023లోనే కాదు, వచ్చే ఐదేళ్లలో 3 శాతం కంటే తక్కువ వృద్ధిని సాధించడంతో పాటు మందగించిన ఆర్థిక కార్యకలాపాలు దీర్ఘకాలం కొనసాగుతాయని ఆమె చెప్పారు.
90శాతం అడ్వాన్స్‌డ్ ఎకానమీలు ఈ ఏడాది తమ వృద్ధి రేటులో క్షీణతను చూస్తాయని అంచనా వేస్తున్నట్లు ఆమె చెప్పారు.
ఐఎంఎఫ్
2022లో సగానికి పడిపోయిన ప్రపంచ వృద్ధి
గత సంవత్సరం ఉక్రెయిన్‌పై రష్యా సైనిక దాడి, మళ్లీ కరోనా పుంజుకోవడం తదనంతర పరిణామాల నేపథ్యంలో ఆర్థిక వృద్ధి రేటు తగ్గుతుందని క్రిస్టాలినా జార్జివా పేర్కొన్నారు.
అభివృద్ధి చెందుతున్న ఆర్థిక వ్యవస్థలు కొంత మేరకు ఊపందుకుటాయని, ముఖ్యంగా ఆసియా దేశాల్లో మెజార్టీ వృద్ధిని ఆశించవచ్చని తెలిపారు. 2023లో ప్రపంచ వృద్ధిలో సగం వాటా భారతదేశం, చైనా కలిగి ఉంటాయని ఆమె అంచనా వేశారు.
కరోనా నుంచి కోలుకున్న తర్వాత, ఉక్రెయిన్‌- రష్యా యుద్ధం, ఆ తర్వాత పరిణామాల కారణంగా 2022లో ప్రపంచ వృద్ధి దాదాపు సగానికి పడిపోయింది. 6.1 నుంచి 3.4 శాతానికి పడిపోయినట్లు జార్జివా చెప్పారు.