India-New Zealand FTA: రేపటి నుంచి అమల్లోకి భారత్‌-న్యూజిలాండ్‌ ఎఫ్‌టీఏ
ఈ వార్తాకథనం ఏంటి
భారత్‌-న్యూజిలాండ్‌ మధ్య కుదిరిన స్వేచ్ఛా వాణిజ్య ఒప్పందం (FTA) అక్టోబర్‌ 20 నుంచి అమల్లోకి రానుంది. ఈ ఒప్పందం ద్వారా రెండు దేశాల మధ్య వాణిజ్యం, పెట్టుబడులు, ఆర్థిక సంబంధాలు మరింత బలోపేతం కానున్నాయి. దీని ప్రకారం భారత్‌ నుంచి న్యూజిలాండ్‌కు ఎగుమతి చేసే అన్ని వస్తువులపై సుంకాలు ఉండవు. మరోవైపు వచ్చే 15 ఏళ్లలో భారత్‌లో 20 బిలియన్‌ డాలర్ల పెట్టుబడులు పెట్టనున్నట్లు న్యూజిలాండ్‌ హామీ ఇచ్చింది.
వివరాలు
నైపుణ్యం కలిగిన భారతీయులకు తాత్కాలిక ఉద్యోగ వీసాలు
ఈ వాణిజ్య ఒప్పందంలో భాగంగా నైపుణ్యం కలిగిన భారతీయ నిపుణుల కోసం తాత్కాలిక ఉద్యోగ ప్రవేశ వీసా పథకాన్ని కూడా తీసుకొచ్చారు.
దీని కింద 5,000 వీసాలు జారీ చేయనున్నారు. ఒక్కో వీసాపై గరిష్ఠంగా మూడేళ్ల వరకు న్యూజిలాండ్‌లో ఉండేందుకు అవకాశం ఉంటుంది.
ఈ పథకం వల్ల రెండు దేశాల మధ్య నైపుణ్యం కలిగిన ఉద్యోగుల రాకపోకలు పెరిగి, ఆర్థిక సంబంధాలు మరింత బలపడతాయని భావిస్తున్నారు.
వివరాలు
ఐదేళ్లలో ద్వైపాక్షిక వాణిజ్యాన్ని రెట్టింపు చేయడమే లక్ష్యం
వచ్చే ఐదేళ్లలో భారత్‌-న్యూజిలాండ్‌ మధ్య వాణిజ్యాన్ని రెండింతలు చేయాలని ఇరు దేశాలు లక్ష్యంగా పెట్టుకున్నాయి.
ఇందుకోసం భారత వాణిజ్య ప్రోత్సాహక సంస్థ (ITPO) న్యూజిలాండ్‌లో కార్యాలయాన్ని ప్రారంభించనుంది.
అదే సమయంలో కీలక రంగాలకు రక్షణ కల్పించేలా ఈ ఒప్పందాన్ని రూపొందించారు.
పాల ఉత్పత్తులు, ఉల్లిపాయలు, బాదం, చక్కెర వంటి కొన్ని వస్తువులపై దిగుమతి సుంకాల రాయితీలు ఇవ్వడం లేదు.
వివరాలు
భారత రైతులకు అండగా వ్యవసాయ ఉత్పాదకత భాగస్వామ్యం
ఈ ఒప్పందంలో భాగంగా భారత రైతులకు సహకారం అందించేందుకు వ్యవసాయ ఉత్పాదకత భాగస్వామ్యాన్ని ఏర్పాటు చేయనున్నట్లు న్యూజిలాండ్‌ హామీ ఇచ్చింది.
దీనివల్ల రెండు దేశాల మధ్య వ్యవసాయ రంగంలో సహకారం మరింత పెరగనుంది.
ఈ ఒప్పందంపై 2025 డిసెంబరులో తుది నిర్ణయం తీసుకోగా, 2026 ఏప్రిల్‌లో సంతకాలు చేశారు.
దీంతో చైనాను మినహాయిస్తే ప్రాంతీయ సమగ్ర ఆర్థిక భాగస్వామ్య (RCEP) కూటమిలోని మిగతా దేశాలతో భారత్‌కు వాణిజ్య ఒప్పందాలు ఉన్నట్లవుతుంది.
వివరాలు
న్యూజిలాండ్‌తో భారత్‌ వాణిజ్యం ఎంతంటే?
2024-25 ఆర్థిక సంవత్సరంలో భారత్‌-న్యూజిలాండ్‌ మధ్య వస్తువుల ద్వైపాక్షిక వాణిజ్యం 1.3 బిలియన్‌ డాలర్లకు చేరింది.
అంతకుముందు ఏడాదితో పోలిస్తే ఇది 49 శాతం పెరిగింది.
ఈ ఒప్పందం ప్రకారం న్యూజిలాండ్‌ నుంచి దిగుమతి చేసుకునే వస్తువుల్లో భారత్‌ 70 శాతం సుంకాల రాయితీలను కల్పించనుంది.
ఈ రాయితీల పరిధిలోకి ఇరు దేశాల మధ్య జరిగే మొత్తం వాణిజ్యంలో 95 శాతం వస్తుంది.
అయితే యాపిల్స్‌ వంటి కొన్ని ఉత్పత్తుల దిగుమతులకు నిర్దిష్ట పరిమితులు, ధరల ఆధారంగా సుంకాలు వర్తిస్తాయి.
కిలోకు 1.8 డాలర్ల కంటే ఎక్కువ ధర ఉన్న కివీ పండ్లకు మాత్రం సుంకం లేకుండా దిగుమతి చేసుకునే అవకాశం ఉంటుంది.